اشم .... رائحة ذكرياتنا
اتذوق ...... مرارة كلامتك
اسمع... صدى مشاعرك
المس .... خشونة كلامك
ولكني لا أجدك حولي
هل أحتاج الحاسة السادسه؟
أنا عندي مشكله
طول عمري اسمع اغنيه شاديه وهي تهاتي وتنادي وتقول
أنا عندى مشكلة أنا ليا مشكلة
الحب جديد عليا وحكايته مطولة
والدنيا قصاد عينيا بالحب مقفلة
يا اللى حبيبتوا قبلى
وصادفتكم مشاكلى
اروح لمنين قولوا لى يحل المشكلة
وكنت بشوف ان مشكلتها قد تبان صعبه ولكنها في الحقيقه سهله جدا وده لأن مشكلتها بدأت كالتالي
حبيبى قبل منى كان حب وانظلم
وقضى سنين طويلة فى الهجر والندم
وانا فى طريق حياتى لاقيته فى سكتى
وجيت حبيته اكتر من روحى ودنيتى
وقلت اليوم ده عمرى ونصيبى وقسمتى
بس طبعا مفيش قصه حب تعادي بالساهل وعلى طول كده كان لازم يكون في مشكله يا عندها يا عند الحبيب وبالفعل المشكله كانت عنده
يبص فى نور عينيا ويفتكرنى هى
ويقول لى واحدة زيك زمان ضحكت عليا
يا حرام المشكين لسه منسيش حبه القديم ولسه مجروح منه بس الاخت شاديه مسكتتش وفضلت تسأل
يا اللى حبيبتوا قبلى
وصادفتكم مشاكلى
اروح لمنين قولوا لى يحل المشكلة
ومش بس أكتفت بالسؤال دي مدخرتش اي جهد
كتير كتير حاولت اهون عذابه وارحمه
مش قادرة اوصل لقلبه ولا قادرة افهمه
بس البعيد كان معندوش احساس وكان بيقابل الخير بالشر
لو اغلط مرة واضحك يخاف من ضحكنى
وان قلت كلمة يفضل يلوع كلمتى
حتى ان بكيت يقرب ويحلل دمعتى
وبدال ما يلين شويه يقول فيه واحدة تانية
زمان كانت بتبكى بعدين ضحكت عليا
طب الواحد يقول ايه في راجل زي ده بدل ما يشكرها بيعذبها بس برضه الاخت شاديه طول عمرها نفسها طويل ويشهد عليها فيلم الزوجه تلاتشر واللي عملته في رشدي اباظه فعشان كده قالت تدخل الناس بينهم
يا ناس قولوا لحبيبى يا ناس حكايته يفضها
قولوا له الناس قلوبهم مش زى بعضها
فيه واحدة غيرى قدرت تغير قلبها
أنا ذنبى ايه أقاسى واتحمل ذنبها
خلوه يدينى فرصة وأنا أموت حبها
قولوا له يحس بيا ويبطل ظلم فيا
وعمره مش هيندم لو سلم قلبه ليا
وبكلامها قدرت تحل المشكله اللي خلتنا نفتكر من البدايه انها مشكله عويصه وملهاش حل ولكن الحقيقه ان حلها سهل وان المشكله مش مشكلتها لكن مشكله المقروص في قلبه اللي حبته
طيب انا اعمل ايه في مشكلتي؟
اه افتكرت انا لسه مقولتش على مشكلتي
مشكلتي تبان سهله بس الحقيقه انها حلها صعب
من صغري اللي هو مش من زمان اوي يعني وانا دايما كل حياتي بتتوقف على الآخرين
من وانا صغير وانا دايما بتخيل ان حل مشاكلي هيجي على ايد حد تاني وافضل احلم واحلم واحلم
وابرر احلامي اني مش لازم اتمسك بالواقع وبس ولازم اسيب شويه من نفسي يعيشوا في الاحلام لغايه ما فقت يوم على الحقيقه الصعبه
اني فعلا بوقف كل حاجه في حياتي على الآخرين حتى لو كانت حاجه صغيره ويمكن تكون متستهلش
بس مش لازم اظلم نفسي كتير لازم كمان افتكر ان
اول مره تيجلي ورده هديه كانت مني
اول مره اتمشى على الكورنيش كنت لوحدي
اول مره اتعزم على الغدا بره كنت انا اللي عزمتني
اول مره في حاجات كتير كنت لوحدي
وكانت حياتي مبتقفش على الآخرين
بس مش عارف امتى كان الخط الفاصل اللي بدأت عنده حياتي تقف على الآخر
كلاكيت تاني مرة
العيد التاني على التوالي في الشركة
مش هقول حرام عشان أكيد أنا أستاهل بشكل ما من الأشكال يحصلي كده
أمبارح لاقيت هاري بيقولي ميعادنا في العيد كان نفسي اقوله لو سمحت حضرتك هو ده لو كان الكريسماس كنت انت جيت في العيد؟
عارف انها ظروف شغل بس برضه يعني شويه أحمر يا ناس
يعني العيد الصغير قولتلي تعالى وانت سافرت على باريس تقضي العيد بتاعنا مش بس كده انت قضيت تلات اسابيع كاملين وده مش حقد عشان انا نفسي اسافر باريس بس كنت عايزك تفتكر ان ده عيدنا احنا مش عيد جنابك ثم ليه الاستعجال مكنت انت اجلت سفرك لباريس لأسبوع بعد العيد ومكنش هيحصل مشكله ولا كان هيفوتك اسبوع الموضه؟
ثم صحيح كنت هتأجل سفرك لباريس ازاي وانت بعد ما رجعت بأسبوعين قلت اوف كفايه شغل كده انا زهقت انا هطلع على الغردقه العب جولف لمدة اسبوع في الجونه عشان وحشني جو الغردقه ورجعتلنا بلونك الاحمر عشان تفرسني أكتر
عارف انك يا عزيزي هاري هتكون موجود معايه في الشركه في العيد الكبير بس مش محتاج افكرك ان الشركة هتديلك في اليوم ده ما يعادل مرتبي في أكتر من سنه واللي بيعادل مرتب اختي الطبيبه في أكتر من سنتين والكارثه ان عشان الرقم اللي انت هتاخده في يوم وياريته هيوكون يوم ده انت هتتواجد لساعه او اتنين على الاطثر اضطريت اختي المدرسه انها تتغرب عن بلدها وناسها واصحابها وياريتها لوحدها ده ومعاها اطفالها التلاته لبلد آخر عشان تاخد اقل منه في شهر كامل وتزود اطفالها طفلين كمان يتربوا ويتعلموا في بلد قد يكون بيتحدث العربيه ولكنه مجتمع مختلف تماما عن مجتمعها وكمان مضطره تتعامل مع صعاب العمل
مش حقد واللهي لا عليك ولا على حد تاني بس انا عارف اني اكيد استاهل انا اعرف ان عندي عيوب كتير سواء في شخصيتي كإنسان أو في طباعي كإنسان مقيد أو في مهنتي كمهندس بس يعني شويه كده بحب الشكوى أو بمعنى تاني أوضح أدمنتها وكوني صعب اني أشتكي في حياتي العمليه أو حتى في حياتي الشخصيه فمفيش غير مدونتي حبيبتي أشتكي فيها
عيد تاني في الشركة كتير عليا
طبعا هاري كان لطيف معايه على الآخر بلغني أني اسيبله رقم موبيلي عشان الطبيعي من وجهة نظره اني مش هجي غير لما يديني الو يقولي تعالى كان نفسي ساعتها اقوله طب ممكن المكالمة تكون قبل سبعه عشان بنام بدري طب ممكن نخليها مسدج بدل المكالمه عشان انا من عيوبي اني فاشل في الكلام مع اي حد والموقف الوحيد اللي نجحت في التعبير كان من زمان اوي ايام الجامعه ودايما احكيه عشان ابين اني مش دايما فاشل في التعبير وده لما الدكتور طلب ان حد يتبرع انه يقف ويتكلم في دقيقه عن ورق سبهولنا كالعاده في مرك التصوير وطلب اننا منحضرش المحاضره الا والورق معانا وكالعاده كلنا اشترينا الورق قبل المحاضره بدقيقه واتبرعت ساعتها وفضلت افكر نفسي في المسافه الفاصله من مكان جلوسي لمكان وقوف الدكتور اني مش لازم احط في دماغي النا بيسمعوا نبره صوتي ازاي وازاي بيبان ده في كلامهم وتعبيرات وشوهم واحيانا بشوفه بعيوني مكتوب جوه عيونهم بخطوط بارزه ولا كمان لازم احط في دماغي ان ازاي ايدي بحركه لا اراديه بتمسك طرف وداني لما افكر ولا ازاي بتلعب في شعر لما اتوتر ولا ازاي بتتحرك كتير لما انفعل في الكلام ووقفت يومها واتكلمت في دقيقه او تحديدا على حسب ميقات الدكتور سبعه واربعين ثانيه وموقفش معدل شجاعتي على كده لأ كمان في مواجهة الدكتور لما سأل كل اللي اتكلموا حد يقولي استفادوا ايه ورديت وان كان ردي فيه مبالغه اني هقدر اتكلم قدام اي حد في اي موضوع في اي وقت من غير ما اقلل من رد فعله ولا من عواقب التعبير عن رأيي
افتكرت الموقف ده لما كنت بتكلم مع زميل في الشغل على الشات الساعه واحده بعد منتصف الليل لما اضطرتني ظروف الشغل اني اسهر كمان قدام الاب توب في البيت عشان اخلص شغل لأن تأخري هيكلف الشركه الاف الدولارت واكتشف تاني يوم انهم وقفوا مل الشغل لتاني يوم الساعه تمانيه عشان ياخدوا قرار رئيس مجلس الإداره
كنت بكلم زميلي واقوله اني زي ما اعرف شويه من عيوبي اعرف كمان مميزتي ومش معنى اني بتكلم عن عيوبي كتير اني مأعرفش مميزتي اللي على سبيل المثال واحده منهم عبر عنها هاري نفسه لأحد الزملا واني يمكن اكون بعمل شغلي بسرعه وان كنت مش بشوفها انا الحاجه الواو اوي بس هو شايف كده فأتكلم انها حاجه كويسه ففكرته بالحدوته القديمه السلحفاه اللي سبقت الأرنب وساعتها قولتله اني كنت بشوف ان الحكايه دي مش مجرد حكايه لأن السلحفاه مكنتش بتعبر عن نفسها او بمعنى اصح لما قررت انها تسابق الارنب مش عشان هي كفرد يسبق ولكن كانت بتدافع عن حقوق كل بني جنسها كل السلاحف في الدنيا لكن الأرنب كان فرد بيدافع عن نفسه كفرد لأن كل الناس تعرف ان الارانب سريعه وان الميزه اللي عنده هي السرعه وسبب فشله مش كونه مش سريع بس عشان هو عارف انه سريع والسبب اللي خلاها تنجح هي انها صاحبت قضيه مش قضيه شخصيه لكن قضيه نظره المجتمع لكل بني جنسها
كنت دايما بشوف ان الاشخاص المبدعين عاديين مش عاديين عشان ببخسهم حقهم لكن هما مبدعين بطبعم مش محتاجين مجهود حتى التلامذه الشطار اللي كانوا معايه طول الوقت اشوفهم بيعيشوا في حدود امكانيتهم لكن اللي كنت بحبهم هما المجتهدين الناس اللي بتتعب عشان تعمل حاجه بتتعب عشان تفهم درس بتتعب عشان تتفوق وتكون من الأوائل
مأعتقدش اني كنت هقوله الكلام ده لو كان الكلام وجها لوجه لكنه كان اسهل اني اكتبه لأنك لما بتكلم حد هينظرلك النظره اللي بينظرها لشخص بوهيمي رأيه في الملابس انه مجرد شويه قماش بيغطي الجسم وفجاه بدأ يتكلم في الموضه أو رجل دين ابتدا فجأه يشتغل في النقد السينمائي هيكون على الصعب اللي بيسمعني انه يبصلي كسلحفاه لأني مش أرنب لكن هو هيفضل مقتنع بالصوره اللي شايفها واللي انا برسمهاله وبحددهاله
هاري ميعرفش كل ده لما شافني ارنب كل ميزته انه سريع لأنه ميعفرش اني بحب أكون فرد في مجتمع السلاحف ومش بحب اكون ارنب
بس ده ميمنعش ان اللي مقدرتش اقوله لهاري عشان مش بعرف اعبر عن نفسي ممكن اكتبهوله هنا دلوقت
واقوله عزيزي هاري
انت لو مكنتش طلبت مني اني اتواجد في العيد كنت برضه هتواجد
وهتواجد قبل اتصالك
وكنت هتواجد حتى لو الشغل ميخصنيش
عشان للأسف نفسي اكون سلحفاه مش ارنب
ليـه كــل الـنـاس بتتكـلـم عـلــى كـــل الــنــاس
لـيــه عـايـشـة حيـاتـهـا بتتسـلـى بـكـلام وخــلاص
حـتــى أنـــا أوقــــات بـتـاخدنـي حــــلات
وأهــمــس بـحــاجــات ولا لـيــهــا أســـــاس
وكلام وخلاص
وإزاي ... وإزاي من غير احساس وضمـيـر حنـلاقـي طـريـق
..ومـنـيـن
ومنين وقلـوب النـاس أغـراب حـنــلاقــي صــديـــق
لا حقـول مـن تـانـي كــلام و لا حهمـس تانـي خــلاص
دا العـمـر يــادوب أيـــام آه مــن جــرح الإحـسـاس
بحلم .. بحلـم لـو يـوم النـاس بقلوبـهـا تـحــب الـنــاس
واتمنى.. واتمنى نعيـش وتكـون كلماتـنـا مــن الإحـســاس
ونعـيـش والـحـب يـــدوم ونــدوب كلـنـا إخـــلاص
ولا نجـرح بعـض فـي يــوم وقلوبنـا فــي كــل مـكـان
على الهامش
امبارح حصل موقف غريب في اتوبيس الشركة
السواق كان بيتكلم في التليفون عشان يبلغ اهل الطفل اللي مش عارف يقربله ايه والمريض بالسرطان انه بيدور على الدوا في كل الصيدليات اللي بيقابلها عشان يجيهوله ولما وقف الاتوبيس في الطريق ودخل يسأل في صيدله فسأله واحد من الركاب وقاله هو الدوا اسمه ايه؟
مش عارف ليه سأل بصراحه بس اهو سأل فقاله دوا اسمه بوتاشسيوم لأن الولد عنده نتيجة العلاج بيكون فيه نقص في البوتاسيوم فلازم ياخده شراب ورغم ان الدوا رخيص بتلاته جنيه بس بس مش موجود خالص
ساعتها لاحظت ان في واحد في الكرسي اللي ورايا وبصوت واطي يعني مش كان مقصود أي شو في الموضوع نهائي سأل حد صاحبه في صيدله عن الدوا بس أعتقد انه متوفقش بعدها حصل الموقف الغريب
معانا في الباص مدام هاله او الحاجه زي ما بينادوها
انا مش بحبها كتير بصراحه بس لاقيتها كلمت سوس في التليفون واي كان سوسو هي قريبتها او صاحبتها او بنتها الدكتوره اللي كتير بتتكلم عنها فهي نجحت في انها تلاقيلها الدوا مش بس كده رغم ان مدام هاله ساكنه في نص خد سير الاتوبيس الا انها اصرت على السواق انه يوصل الناس كلها وهي معاه وبعدها يعدوا على سوسو في المستشفى تجيبله منها الدوا بس بعد اصرار السواق والركاب طبعا بس انا مكنتش واحد من اللي اصروا ان الاتوبيس يعدي على المستشفى وكلنا معاه نجيب الدوا ونكمل بعد كده خط السير وخصوصا ان المستفى في طريقنا وفعلا كان كل الوقت اللي اتأخرناه هو عشر دقايق
بس لما مدام هاله كانت راجعه بالدوا من عند سوسو كنت بسمع في وداني صوت تصفيق حاد لمدام هاله على موقفها
شكرا لكل حد بيرعي
شطرا بجد لكل حد بيعمل حاجه مش مطلوبه منه بس عشان هو عايز يساعد بها حد ممكن يكون غريب عنه
شكرا للحاجه ولسوسو طبعا