ياه وحشني الرغي والنهارده يوم الرغي
اولا انا مش عارف ليه الناس بيقولي العيد فرخه رغم ان العيد عندنا في البيت دايما بطه
اه والله
حاتم دايما يتريق علينا وكمان زوجه احمد اخويا بعد الجواز استغربتنا جدا
بس احنا متعودين على كده منذ قديم الازل
لازم كل عيد صغير بعد الصلاه وطبعا السلام على بابا واخد العديه المحترمه نجلس بكل وقار وادب ونحتسي مرق البط مع الجلاش باللحمه المفرومه وطبعا عزيزتي البطه
اه واللهي على الصبح
بس طبعا ماما بتغلب فينا قبلها اننا قبل الصلاه نفطر على بلح عشان السنه بس احنا مش بنقدر وبنكتفي بالمياه عشان نتفرغ بعد كده لعزيزتنا البطه نظرا لمكانتها الغاليه عندنا
*********************************
أمبارح وانا ماشي في الشارع كان ورايا واحد بيسأل صاحبه ان من زمان وهو بيسمع اغنيه صفاء السعود ويسمعها بتقول سعد نبيها كان بيستغرب اوي
وساعتها صديقي الصدوق قالي انه هو كمان كان بيستغرب لأن الطفل مفروض يتسمى على اسم بابا هو مش ماما هو
وانا قلتلله لأ يا غبي هي مش بتقول سعد ابن الحاجه نبيها هي بتتكلم عن نبي انا معرفوش بس اسمه سعد
******************************
امبارح اكتشفت اني بقول كلمات كتير وبكررها
يعني مثلا لما اتضايق من حاجه اقوله ربنا يحرقها دنيا واخره
يعني مثلا متضايق من الشغل
يبقى ربنا يحرقه دنيا واخره
متضايق من شخص فقول ربنا يحرقه دنيا واخره ورغم ان ماما غلبه فيا مدعيش الدعوه دي لكنها اكتر حاجه لازقه في لساني ولو حد بيقرا الكلام ده وميعرفنيش وسمع واحد بيقول ربنا يحرقهم دنيا واخره يعرف اني هو مقيد وانه بيتكلم عن شركته والعاملين بها
سامحني يارب
بس هما يستاهلوا
كمان من الكلام اللي لازق في دماغي جمله بكررها كتير الا وهي
اوفر اوي بصراحه
بس اوفر بتكون ممطوطه حبتين وفي الغالب الجمله بيسبقها اتنين لأ
يعني تلاقيني بقول لأ لأ أووووفر أوي بصراحه
وده طبعا واضح اني بقولها طول اليوم لأن بشوف حاجات كتير أوفر أوي بصراحه
والغريبه اني لازم اضيف كلمه الصراحه في الاخر
وطبعا كلتي المفضله اللي بيتهيألي الناس بتسمعها مني كتير هي ميرسي
ومش عارف ليه بقولها في مواقف بعدها شفت برنامج للفنانه المحترمه جدا اليسا
:)
كان بيتهيالي لطوني خليفه وكان بيحرجها بالاسئله وكانت هي بترد بسخافه فالجمهور يسقف فتلتفت ببرود وتقول بقرف ميرسي
اللي هي تحس انها بتشتمك بيها وللاسف اكتشفت ان هو اللي بعمله انا بميرسي بتاعتي
وطبعا كلمتي الشهيره بالتوفيق
اي حد بيقولي انا هعمل كذا ارد بسخافه واقوله بالتوفيق
كنت زمان بقولها بذوق وكنت بذود وراها يا توفيق لزوم القافيه بس دلوقت بكتفي بلفظ بالتوفيق
واخر حاجه فاكرها دلوقت هي لما حد يسألني ويقولي عامل ايه ارد واقوله انا حلو
كل يوم الصبح يتكرر نفس السناريو
حد يدخل يقولي صباح الخير سمسمه اقوله صباح النور يقولي انت عامل ايه اقوله انا حلو
يقولي حلو بس اقوله لأ حلو كتيرررررررر
لدرجه ان بيجيلي ناس تصبح من الادور الاخره ومنهم اللي بيغير السناريو ويبدأ معايه بجمله أنت حلو
اقوله وي حلو كتير
:)
**************************
النهارده الراجل في خطبه العيد اللي هي مفروض بيتهيالي تحس الناس على التفاؤل لاقينه اشتغل وانتوا بعد رمضان حالكوا هيبقى زفت
انتوا اصلا في رمضان كان حالكوا زفت
ودخل في الشيعه واشتغل
وقعد يقول الكلب حسن نصر نصرالله
القبيح
وانا عمال ادعي في سري ياعم الحج بلاش الكلام ده البوكس واقف على ناصيه الشارع وانا نازل من غير بطاقه مش كفايه لسه من اسبوع نازل من اتوبيس الشركه وانا محترم وبعدي اركب ميكروباص محترم الاقي واحد محترم بيقولي تعالى لحضره الظابط والاقي ظابط غــــــــــــــــــــــــير محترم قاعد في الظل وماسك كراسه والعسكري ولا المخبر اللي جراني ده ماشي يلم اي حد في اشلارع دقنه بتفكر تطلع والغريبه انه كان بيقولي يا شيخ
كنت عايز اقوله عيب عليك
والظابط اياه يالا بلاش نغلط واحنا بعد ايام مفترجه يسجل بياناتي في كراسه
واخيرا الحمد لله وبعد طول انتظار بقالي ملف في امن الدوله
لولللللللللللللللللللللللللللللللي
نرجع لخطبه العيد العصماء والشيخ مجلجل في الميكروفون والظباط من عينه الظباط اياه على اول الشارع وانا بقول يارتني كنت جبت بطاقتي معايه اعمل ايه دلوقت لو خدوني مع الموجودين وانا عندي شغل بعد شويه
لغايه ما الشيخ خلاص كل الدعاوي على الحكومه والشعب بالمره والحمد لله نجح في انه يصيب كل الموجودين بكل انواع الكآبه
بارك الله فيك يا شيخ
**************************
ماشي في الشارع عشان اروح اركب مواصلات في يوم العيد عشان الحق اجي المحروقه الشركه والبمب عمال يتساقط عليا وانا امشي افط وانط زي الفرقع لوز
وهموت في جلدي وبدعي على العيال في سري يتهدوا هما واهليهم اللي مسيبنهم علينا هو انا جسمي ناقص
وساعتها افتكرت انا كنت انا والبت زوزو بنعمل زيهم تمام وبعد نوبه حماس في فرقعه البمب وطرقعه المسدس الطلق قبل تصنيع المسدس الخرز اللي ملحقنهوش للاسف نفضل انا وهي نتناقش في جدوى اللي عملناه
وانه ازي تضييع للوقت والجهد والاهم الفلوس والافيد كان لينا اننا نجيبيلنا اتنين ايس كريم وكيس بوزو ومصاصه وناكلهم ونقضيها لعب اوله او سيجا او حتى استغمايه
فبلاش الوم العيال يمكن هما كمان بيعملوا زي انا وزوز وبعد ما يفرقعوا البمب بيفضلوا يحاسبوا نفسهم ويقولوا ان العيد الجاي مفيش مفرقعات
****************************
وانا جاي الشركه الصبح فضلت ادعي ان تحصل اي كارثه في المعدات اللي كانت نازله تقيس ضغط البئر عشان مقعدش اشتغل عليها لأني كنت حاسس بالقهر انهم جايبني في العيد واول ما وصلت اشلغل لاقيت ان المعدات اتقطعت وسقطت في البير
هاهاهاهاهاهاهاهاهاهاهاها
انا شرير
7 comments:
:))
ألف مبروك
بقالك ملف في أمن الدولة دة شرف الكل بيتمناه طبعا
:)
اممم...موضوع إنك تتدايق من حاجة فتتعطل دي صعبة أوي. مجرباها كتير :). بس أكيدمش بدعي على حد
بس فعلا مرات كتيرة حاجات اتدايق منها ألاقيها بازت أو لو كباية مع حد تقع منه :).حاجات غريبة كدة مش فاهمة معناها بس ساعتها بيخافوا ويقولوا مش هيعملوا حاجة انا مش حاباها بعد كدة
:)))
شفت انا اللي شريرة ازاي؟
عيد سعيد إن شاء الله
صحيح
أنا هانضم لحاتم و أخت أحمد لأن عمري ما أكلت بط في العيد :)، ولا أفتكر هخصصله يوم معين عشانه
تحياتي
عزيزتي الفراشه
لا مش شرف الكل يتمناه وبس ه كمان اتعملنا انا وصديقي الصدوق في نفس اليوم
مش حاجه تفرح
لأ انا بصراحه موضوع الدعا على الناس ده اللي نفسه ابطله بس هي من عادتي السيئه اللي ملازمني بس طالما كتبتها فانشاء الله اقدر اقلع عنها
:)
هو مش يوم مخصص واستغرابهم مش من اكلنا لللبط في اليوم ده ولكن من توقيت اكلنا للبط في اليوم ده عشان بناكله الصبح
بس والحمد لله ومن مكاني هذا اعلنك اننا نجحنا في ضم زوجه احمد لينا وان شاء الله انا ورا حاتم لما اضمه وبكده هنسيبك لوحدك
نياهاهاهاهاهاها
:)
عيدك سعيد اولا
ثانيا شغل حتى النهارده؟
لا حول ولا قوه الا بالله بس والله اهو احسن من الفراغ اللى الواحد فيه ده
احنا بقى عندنا العيد فرخه مش بطه
انا مش مستغربه انه عندكوا بطه اصل عندى عقيده بتقول ان اكل اللحمه اذواق وانا مش بحب لحمة الجزارين :)
الاخت صفاء ابو السعود فضلت كتير برضو افهمها زى ماصاحبك فاهمها"سعد نبيها" بس مكنتش اعرف انه سعد ومامته تبقى طنط نبيها
انما مؤخرا يجى من تلات اربع سنين فهمت انها "سعدنا بيها"
يعنى فرحتنا بيها ياخايبين :)
اما عن شيخ الخطبه ده ؟ والنعمه عسل
بس قولى انت وهو ركبتوا فى بوكس واحد ولا قسموكوا؟؟ :)
وبعدين بخصوص ملف امن الدوله تستاهل يامحمد
امشى بماكينة ومعجون الحلاقه فى جيبك ومرايه كمان
واول ماتلمح حد من بعيد طلعهم من جيبك والحق خدلك وشين قبل ماحد يقفشك واهو كده يبقوا شافوك بالدليل القاطع انك مش شيخ :)
اما عن اللى انت عملته فى الشركه؟
انا دلوقت اطمنت ان الدنيا مش هتمطر عندنا الشتا ده خالص :))
كل سنة وانت طيب وكل عيد وانت اسعد ان شاء الله:)
بما ان العيد عندك بطه فمتنساش والنبي ياخويا تحوش ليا الورك
وبخصوص ان حضرتك اتحطيت في موفق وحش مع ظابط امووور طالع يترسم في يوم العيد فانتا محظوز يابختك ياعم
دي الحكومه يابني يعني الف سلام وتحيه
انما بخصوص الشيخ فده شئ يرثي عليه في كل مسجد مش معقول يعني نقدر نقول ان الشيخ يسكت وبلاش يتكلم في السياسه ولكن الاسلوب والطريقه لازم فعلا تكون مهزبه لانه بتكلم من بيت ربنا
ربنا نجاك الحمد لله علي خير
اوعي وياحت ابوك تنسا الورك لاحسن انا علي لحم بطني من الصبح
مش عيد ايه ده اللي كله بسكوت وكحك بس
-------
سامح خاطر
عزيزتي نور
عيدك ان شاء اله يكون كان اسعد
احنا شغلنا اربعه وعشرين ساعه طوال ايام الاسبوع رغم اننا شركة حكوميه او هكذا خدعونا بس متقلقيش عليا انا عودتهم اني مبردش على التليفون في اوقات متأخره عشان كده بيتصلوا بيا الصبح
:)
طيب ممكن جزء من الفرخه عشان احنا بطتنا خلصت
:)
طيب ما الاخت صفاء كانت تقولها صراحه على طريقه مقيد وتقول سعادة أحنا بيها عشان نفهم
لأ انا الحمد لله هربت من الشارع اللي ورا والناس والبوليس كانوا مشغولين بانهم يصطادوا البلالين اللي كانت متعلقه زينه عشان الصلاه
انتي بتقولي فيها احنا عندنا مهندس شايل في درج مكتبه عدة الحلاقه وساعات يجي الصبح يختفي وبعدين نلاقيه طالع من الحمام حالق ذقنه وتمام التمام بس انا كنت بفكر في فكره تانيه وهو اني ازور بطاقه واكتب فيها الاسم مايكل عشان لما يوقفني اشوف هيعمل ساعتها ايه
طيب بلا اقولك عن باقي بركاتي في العيد
ولا بلاش اقولك عشان تعرفي ان اللي يزعلني هدعي عليه
:)
في على اول شارعنا محل بيبيع لعب اطفال فتح من حوالي ست شهور والواد ابن اخويا في العيد كان كل شويه يروح يجيب منه صواريخ وانا بخاف منها بصراحه فتالت يوم العيد وانا رايح الشغل الصبح بقول هو المحل ده مش بيقفل ليه
وانا مروح من الشغل لاقيته قافل
نياهاهاهاهاهاهاها
سامح
طبعا ممكن اشيلك الورك وده لسبب وحيد هو اني مبحبش للاسف الورك في البطه بس خلاص العيد خلص اشوفلك الورك العيد الجاي ان شاء الله
:)
انت شكلك كده تعرف حد في الحكومه
طيب بالله عليك وصيهم يسيبوا الملف بتاعي ابيض احسن انا مش عايز مشاكل كفايه اللي حصلي وانا بطلع الباسبور مش ناقص مشاكل توقف السفر بعد كده
Post a Comment