النهارده حصل موقف مؤثر جدا
المهندس خياط جابلي هديه
:)
امبارح كان متضايق أنه مكنش يعرف من قبلها
وأن ازاي حاتم يجبلي هديه وهو لأ - مكنش يعرف أن حاتم جابلي أكتر من هديه مش هديه واحده
فأشترالي هديه وأحرجت جدا النهارده الصبح لما أدهالي
بيتهيالي الموقف دي مفروض الواحد يفتكرها كتير لما يكون عنده شك في اد ايه الناس ممكن تكون بتحب من غير ما احنا ناخد بالنا من ده
أنا كنت ناول الشغل النهارده ومش متفائل أنه هيكون يوم كويس
بس الحمد لله لغايه دلوقت هو أحسن مما كنت اتوقع أو أتمنى
الحمد لله
وأنا بكتب دلوقت فكرت في حاجه
من فتره وانا شاغلني جدا الناس اللي بتاخد مميزات مش من حقها
مهما كانت الميزه دي بسيطه بس هي برضه مش من حق الانسان ده فهل مفروض يفرح ويستمتع بيها ولا لأ
هو انا ممكن دلوقت أكون بفرح وأنا مستحقش ده
أمبارح حسيت بناس كتير حواليا
ومنكرش أن أمبارح برضه للحظه وقفت وقلت ما يمكن شايفني غلط
ما يمكن مجامله لأنهم ناس من جوه كويسه مش اكتر
الموضوع ملوش علاقه بمعزتي عندهم أو كوني انا زي ما بيقولوا ولا لأ
بس ساعتها طردت الفكره لأني كان نفسي أوي أفرح
دلوقت كمان مش هفكر ليه المهندس خياط عمل كده
يمكن يكون فعلا بيعتبرني أخوه الصغير عشان هو مبيحبش يقول أبنه عشان ميكبرش نفسه ولا يصغرني
:)
ويمكن كمان امبارح كانوا فعلا زمايلي فرحنين عشاني
رغم أني كنت متصور أن أكتر أعياد ميلادي تأثيرا هيكون عيد ميلادي التلاتين وبعده الاربعين لو عشنا وكان لينا عمر
يارب
