سالم

سالم

سالم بطل روايه نقطة النور كنت حاسس انه يشبهني كتير من بدايه الروايه وانا حسيت بكده مش بس عشان كان بيحب الرياضيات ومش ليه تقل اوي على اللغات ولا عشان تأكيد بابا هو من البدايه ليه على أن ملامحه مختلفه فيخلي باله من ده شويه وان كنت مش عارف ليه الكاتب اثار النقطة دي ومستخدمهاش بعد كده بس حسيت كانه بيوصل صوره حقيقه لحد يقصده شخصيا أو هو بس دقيق شويتين في رسم شخصياته وان كان مدخلش ملامحه في محور الأحداث بعد كده ولو كان فعل كنت حسيت انه فعلا أنا

بس الشيء الرئيسي اللي جذبني لسالم هو نوبات الصرع اللي كانت بتجيله لو كان ده صرع واللي فيها كان بيفضل يشتم ويمكن يضرب كل اللي في البيت باباه وجده حضرة الباشكاتب ويمكن اخته الوحيده فوزيه واللي كان مرتبط جدا بيها وان كنت استريحت اكتر لتفسير اول دكتور راحوله بسالم وقالهم خلوه يشتم يبخته وبالذات انه بعدها بينام تماما ويصحى ناسي الي حصل كله

ساعتها ابتديت اغير من سالم لأنه بيخرج الشحنه السلبيه اللي جواه حتى لو بطريقه غلط بس بتخرج وبعدها يرجع من تاني الانسان اللطيف الطيوب البسيط وده اللي مش قادر اعمله مش قادر الاقي الطريقه اللي اخرج بيها الشحنه السلبيه دي

وده يفكرني بأحمد أخويا لما زوجته اشتطيت لماما انه في نوبات غضبه وما أكثرها بيكسر أي حاجه قدامه سواء كانت عفش البيت أو حتى متعلقاته لشخصيه واخرها موبيله الشخصي وكان ردي ساعتها هو نفس كلامي دلوقت ان ده يمكن يكون افضله لأنه بكده هيخرج الشحنه العصبيه اللي جواه ويهدا وطبعا ردي معجبش ماما ولا زوجتي ولا حتى أختي وكلموني من النقطه اللي انا طول النهار بره البيت بقولها لكل الناس في الشارع وفي الشغل ان الانسان لازم يكتم غيظه تنفيذا لكلام الرسول صلى الله عليه وسلم في الحديث الشريف اتدرون ما الصرعة؟
وان الناس كلها لازم تكون حليمة مع بعضها وتتسامح طالما تقدر

بس برضه الشحنه السلبيه بتفضل تعذبنا لو مخرجتش ويمكن عشان كده ممكن تلاقيني اوقات كتير بصرخ جامد بس من غير صوت صرخه صامته يعني بكل ما تحمله الصرخه من انفعال بأستثناء الصوت بس برضه ده مش بيمكني اني اخرج الطاقه السلبيه

ومن هنا كانت غيرتي نم سالم لأنه بعد ما كنت ماشي انا وهو في بدايه القصه في نفس المسار لاقيته تفوق عليا ولاقى طريقه يخرج بيها طاقته السلبيه


بس كل ده مش مظبوط

لأنه شقى ايما شقاء بمرضه ويمكن يكون كان سبب في فقدانه حبه حياته لولا عطف الكاتب عليا وشفقته اللي خلاه يرجعهاله تاني في نهايه الروايه فيمكن يكون غيظي من سالم ما هو الا محاوله للنظر للامور بطريقه ايجابيه وان احنا نلاقي في الشيء السلبي حاجه ايجابيه عشان نقدر نستحمله ونتخطاه


على الهامش

فيلم احمد حلمي الف مبروك كان فيه جمله رئيسيه في الفيلم بتقول انت ممكن تغير واقعك لأنك انت اللي بتعمله بس مش ممكن تغير قدرك لأنه بيتعمل فيك