الأحساس نعمة أم نقمة؟

وأنا في طريقي للشغل في المترو

كان في بنت محجبه قاعده معايه على الكنبه اللي بيقعد عليها تمانيه وسايبه مساحه كبيره بيني وبينها لان الكنبه مش كان عليها ناس كتير وفي رمسيس ناس كتير ركبوا وكانوا تبع بعض ، رجاله كبار يعني رايحين على شغلهم
المهم قاعدوا على الكنبه وبيتهيالي كمان الكنبه بقى عليها تسعه مش ثمانيه او حتى تمانيه مش هتفرق

بس قبل الاخير ده ما يقعد كنا يدوب على الكنبه على الرغم اني مش تخين خالص والله
بس المهم الاخ الاخير وهو بيزنق نفسه جنب البنت اللي كانت ممكن تتفعص فقامت

وعايز اوضح انها كاننت محجبه
ومع ذك الراجل فضل يبصلها لما قامت وكأنها عملت جريمه او قتلتله حد

رغم انها مقلتش حاجه

يعني لا قلتله خلي عندك دم واحترم اني بنت

ولا قلتله حس ومتقعدش

ولا قلتله ولا قلتله ولاقلتله

رغم اني شايف ان من حقها انها تقول
اه انا مش من انصار ان البنت وخصوصا لو كانت لوحدها تركب في العربيه المختلطه بس يمكن عشان احنا الصبح والمترو كان تقريبا فاضي ويمكن عشان كمان البنت مستعجله ودي كانت العربيه اللي قدمها ويمكن ويمكن يمكن

السؤال هو ليه الراجل محاولش يافترض عذر للبنت انها تركب العربيه دي لان مش معقوله طبعا يكون كل استنكاره انها قامت من جنب جنابه وفضلت انها تقف على انها تقعد وهو لازق جنبها كده

ولو افترضنا انه مش كان بصصلها استنكارا لانها قامت ولكن استنكارا لان لبسها في نظره ميتناسبش مع الحجاب فهو ملوش الحق انه يبصلها لا بالشكل ده ولا بغيره.
بس اللي ضايقني اكتر تعليق من زميل ليه على تصرف البنت لما قامت وقاله اصل مفيش في بيتهم رجاله
الجمله دي صعقتني
ممكن يكون كان قصده ان اللي قعد جنبها ده زي اخوها الكبير او باباها فيمكن يكون قصده انها جايز يتيمه ووحيده من غير اخوه ولاد يعني وده اللي خلاها بتتعامل كده، بس مين قال أن ده منطق واحساسه بأنها قال دعابه كأن شيء بجد مستفز

والبنت وقفت جنب الباب وهي ساكته

المهم اني في الوقت ده كنت بفكر في جمله سمعتها في فيلم امبارح وكنت هكلمكم عنها وهي احنا ليه بنقول كلام شم بنحسه

بس هنا انا عايز اعرف احنا ليه مش بنحس بالكلام اللي بنقوله

الجمله دي رغم انها مكنتش ليا بس جرحتني كأنها اتقالت ليا واللي جرحني اكتر ان تصرفت تصرفي الطبيعي في هذه المواقف حسيت بالغضب وبعدها بالخوف واتقوقعت على نفسي وفضلت في حاله مزيج من التعجب والرعب لغايه ما وصلت الشغل وابتديت اكتب وبعدين دلوقت ممكن أبدأ أول قاموس من الكلام اللي كان ممكن اواجه بيه الراجل ده

هو انا ليه بسكت في المواقف دي مأعتقدش انه بطء في الأستجابه بس يمكن عدم الرغبه في إقحام نفسي في مشاكل الغير أو يمكن لأني ملوش الحق إني الومه زي ما هو مكنش ليه الحق إنه يلومها

أنا متلغبط بصراحه بس مش مفروض أسكت تاني

الراجل كان مفروض يعرف انه غلط

غلط لما حشر نفسه جنب البنت

وغلط لما بصلها بطريقه مش لطيفه

وصاحبه غلط لما قال تعليقه السمج

والبنت كمان كان لازم تعرف انها مكنتش غلطانه لما قامت

ومكنتش غلطانه لما مردتش عليه

بس في نظري أكبر غلطه كانت لما وقفت اتفرج على كل ده ومحاولتش اني اعمل حاجه واكتفيت بويه كلام كنت هكتبهم على اي ورقه لو مكتبتهمش هنا

على الهامش

البوست ده من يوم الاربعاء بس حاتم السبب في التأخير

تاجي الأول

كل سنه وانتم طيبين

هجاوب على التاج بما إن شخصيتي بقيت معروفه فمفيش خوف

أولا أحب أشكر صديقي توما لو سمحلي أناديله بأسم الدلع لأني بحب أوي فكره التاج وأحب أعتذر لأني من قبل ما أبدأ أجاوب عن الاسئله عارف إن هجاوب إجابات طويله

هل كنت طالب شاطر فى المدرسة ؟

مش عارف حقيقي بس وأنا في أبتدائي كنت شاطر أو كانوا بيقولوا عليه كده بس دايما كان في حد أشطر مني وأنا في أعدادي كمثل بس أفتكر في تالته اعدادي اني طلعت الاول على الفصل وده كان إنجاز و أنا في ثانوي كنت في المدرسه محدش يعرف إذا كنت شاطر ولا لأ بس في الدروس كان مستوايه مش بطال أما عن اللعينه الكليه فدي مشكله المشاكل لأني كنت معروف كطالب كسول لفتره ثم كطالب مجتهد لفتره وأخيرا كطالب شديد المذاكره قليل الدرجات وطبعا مفهوم الناس دي بيتبصلها أزاي بس والله دي مش حقيقه والحقيقه اني من الطلبه الكسوله اللي مش بيذكروا الا في الحالات الحرجه زي ايام الامتحانات مثلا بس على مدار العام بكون ملم بالمواضيع بس مش المام تام.

فالمحصله أني وأنا في المدرسه كنت مقيد بكل القيود المنزليه اللي بتجبر الأنسان أنه يكون متفوق ولكني كنت دايما أضعف من قيودي فكنت بس مجرد طالب مجتهد

كنت عايز تتطلع ايه وأنت صغير ؟

مدرس دي كانت أمنية حياتي وحلمي الوحيد وبعديها أتمنيت أكون دكتور صيدلي وأقضي حياتي في المعمل والأبحاث وطبعا فيس الواقع لا حققت ده ولا ده.

ايه كانت احب مادة و اكره مادة ليك فى المدرسة و الكلية؟

أكتر مادة كنت بحبها وأنا في الابتدائي كانت الحساب

وأنا في أعدادي كانت الرياضات

وأنا في الثانوي كانت الكيمياء والفيزياء بالإضافه طبعا للرياضيات

أما أكتر ماده كنت بكرهها فكانت بلا منازع كل المواد الصديقه للبيئه من عينه

التاريخ والجغرافيا والعربي أحيانا حيث أني من يومي طالب فاشل في الحفظ وإن كان أكثر المواد اللي كرهتها على الإطلاق هي الملعونه الأحياء على الرغم اني كنت بحبها لغايه ما شفت درجتي فيها في الثانويه العامه اتحول حبي لكره على طول

أما عن العزيزه الكليه فكانت طبعا وبلا منازع الرياضيات عشقي الاول تليها كل ماده تحتوي في أمتحانها على أي مسائل حسابيه ولا تحتوي على أسئله نظريه ايه نسيت اقول اني خريج المدعوه هندسه بس اداب هندسه زي ما كانوا بيقولوا علينا لاني وبدون اي فخر خريج بترول القاهره

اي نعم انا مهندس بترول وياريت لو حد ناوي يعلق ميقلش اي حاجه ليها علاقه بالجاز لاني مبحبش ريحته ولا بحب ريحه البنزين ولا البترول الخام

بالأضافه طبعا لأي ماده حصلت فيها على تقدير يفوق الجيد جدا فطبعا لازم يكون عندي ولاء وأقول أني بحبها ولو تحب أجبلك بيان حاله بالمواد دي معنديش مشكله طبعا حيث ده من مصادر فخري أني أكون من ذوي التقديرات

أما عن المواد اللي كرهتها في الكليه فكتير بحيث لا أستطيع أحصائهم تقدر تقول كل المواد ذات الصفه التلقنيه والتي تكون أمتحاناتها من عينه أذكر كل ما تعرفه عن

أو أكتب من الباب الاول الى الباب الخير

والسؤال المفضل لدى جميع الدكاتره أكتب بالتفصيل الشديد كل ما تعرفه عن المنهج

ويكون هذا الأمتحان عاده مصحوب بصيغه تحذيريه لعدم ترك سطر في ورقه الاجابه أو ترك أي فراغ يصلح أو لا يصلح للكتابة إلا ولابد أن يكون محشور بأي كلام والسلام وذلك لان الاجابه ستقاس بالمتر.

اسم مدونتك؟

إنسان مقيد

لماذا اخترته..وماهي نيتك من وراء اختياره؟

وقت مأختارته كانت في بعض القيود اللي مكنتش قادر أتخلص منها ومنها ان حاتم ميعرفش انا مين بس مع الوقت اكتشفت ان في فحياتي قيود كتير وعشان كده لاقيته معبر جدا

نيتي كل خير إن شاء الله وهي اني يمكن مع الوقت افك شويه قيود

هل فكرت في إغلاق مدونتك؟..والسبب؟
لا مأعتقدتش لاني بالفعل عندي واحده تانيه وهي يوميات طفل كبيره ولما ملقتش وقت اني اكتب فيها بطلت كتابه وخلاص بس ليه اقفلها

صورتك في المدونة..رمزيتها؟

مليش صوره وإن كنت أعتقد أني لو وضعت صوره هتكون لصوره يد مقيده ها سماعنمي ياحاتم اتصرف يالا.

لماذا دخلت عالم التدوين من الاساس؟

لو تقصد مدونتي دي فهي بناء عن طلب حاتم قبل ما يعرف انا مين
أما مدونتي السابقه فعشان اكتب فيها يومياتي كنوع من التأريخ

أما لو التدوين كقاريء فلأني بلاقيه فيه ما يكفيني ويزيد من الأفكار والأراء والإتجاهات

احلى جمله قيلت لك فى وصف مدونتك؟

مش عندي كومنتات كتير بس بحب الادعيه وطبعا اكتر واحده بتدعيلي هي الفراشه

التعليقات بالنسبه لك ..اهميتها؟

بعرف منها أولا مين بيقرالي

ثانيا اللي أنا بقوله ده ليه قيمه عند مين

ثالثا وسيله للنقاش علنا نصل لحل

مااحلى بوست كتبته ...ضع اللينك ..ثم اذكر لماذا؟

لم أكتب شيء جيد وذلك لأني لا أجيد التعبير عن نفسي وكمان مش بكتب مواضيع عامه ولكن في الغالب بكتب عن نفسي بس ونظرا لاني شخص غلس فأي حد هيسيب كومنت هو اللي هيرد على السؤال ده مش بس وكده لأ كمان هيقول ايه أوحش بوست.

أحلى مدونة قريتها؟

كل المدونات اللي قريتها عجبتني جدا وعشان كده صعب أني أقول بس ممكن تقول اللي ضفت لينكهم بالاضافه الي الموجودين في يوميات طفل كبير بالاضافه الى الموجودين في الديبو في الشغل وكمان الموجودين في البيت ودول حوالي كده متنين مدونه ولا حاجه بس عشان مكونش رخم

طبعا في الاول لازم مدونه حبيبي عشان هو حبيبي وكمان عشان انا بحب كلامه فهي اقربهم لقلبي

أما ارق مدونه فهي طبعا مدونه الفراشه

اما احلى مدونه دينيه بحبها هي مدونه القلب النابض

واحلى مدونه كوميديه هي مدونه عايزه اتجوز بحبها اوي

واحلى مدونه ادبيه مدونة شقير بحبها وكفايه كده احسن هطول اوي

حد قل ادبه في التعليق؟

محدش بيعلق عشان يقل أدبه بس ياريت حد يقل أدبه لأني نفسي أعرف شخص من اللي بيقلوا أدبهم أيه اللي بيدفعوا لكده وبيكون تفكيره أزاي الخ

عملت ايه؟

ممكن أنا أطوره وأقول هعمل أيه لو حد قل أدبه

هحاول أتعرف عليه عشان أعرف أيه تحديدا اللي أثاره في كلامي وخلاه يقل أدبه وهو بعد ما قل أدبه أستفاد أيه و كان متوقع أن رد فعلي تكون أيه

كده يعني شويه معلومات عامه

ايه اللي حيصل لإيميلك لما تموت ؟

هو مش أيميل واحد بس على العموم حاتم يعرفهم كلهم ويعرف الباسورد عشان كده هيورثهم عني ياللا يا حبيبي مش حارمك من حاجه

اديت الباسوورد لحد قبل كده ؟

كتير أنا مره أديت الباسورد لمجموعه كبيره كانت دفعة التمهيدي ايام الماستر الاولاني

بس في العادي بغيره كل فتره

ايه كانت علاقتك بيه؟

مين بالضبط

اسمك؟

إنسان (أعيش وأتعايش)

الاجابه اللي فاتت كتبتها قبل ما حاتم يعرف انا مين

بس اسمي هو

MADA

وعلى فكره ده ليه قصه لو حد مهتم هحكيهالو

اسم الدلع المشهور وسط أصحابي؟

هو اللي فات اسم الدلع اسمي الحقيقي مش هيفرق كتير معاكم

مجال دراستك؟

ما أنا قلت الهندسه

شخصيتك نوعها ايه؟

اه انا بحب السؤال ده بجد

أنا شخصيه معقده وبيتهيالي اني مش بسيب انطباع كويس عند المقابله الاول لا التانيه ولا التالته الخ الخ

بيقولو ده اتهام الذات بس انا بقول رحم الله أمريء عرف قدر نفسه وعشان اوضح هقول مجموعه من التعليقات اللي ممكن اسمعها

ولد متدلع رغم اني مش مايع والله بس في ناس بيقولوا كده

في واحد مره قالي اني بخيل وانا ممكن اصدق اي حاجه تتقلي

فالمحصله ان شخصيتي معقده مش هتبان اوي من اجابه سؤال بس هتبان لما اتعامل مع نفسي اكتر ووعد مني هكتب بعد كده في النوته احساسي بشخصيتي من مواقف مختلفه وابقى انشرهم في بوست منفصل

مودك ايه؟

قلوق ده مودي يفي اغلب الاوقات

وكئيب برضه رغم ان اوقات كتير بحاول اطبق تبسمك في وجه اخيك صدقه وانا من الشخصيات اللي ممكن تتدعي حاجه معينه لدرجه اني اصدقها يعني مثلا اكون متضايق وحاتم يسالني فأغصب على نفسي وأضحك واقوله ابدا مش متضايق واضحك واهزر من ورا قلبي بس شويه واضحك من قلبي وانسى اني كنت بمثل من شويه اني مبسوط واحس اني فعلا مبسوط

بتعمل ايه في وقت فراغك؟

هو ايه وقت الفراغ ده

ياعزيزي انا كلي فراغ

بس في الغالب في المدونات او ماسك كتاب او امام التي في او في السينما او بعيط لان دي هوايتي المفضله

أكلتك المفضله؟

انا الحمد لله بحب الاكل كله ماعدا اللوبيا البيضا بس

بس لو في البيت بحب المحشي يمك عشان ماما بتعمله كتير

ولو بره بحب البيتزا رغم ان حاتم مش بيحبها بس انا بجبره عليها وياحاتم الاجازه الجايه لازم ناكل بيتزا سامعني

السفر بالنسبه ليك؟

مش بحبه كتير الا لو كان ليوم واحد او كان مع حاتم غير كده مش بحب انام غير في سريري بس السفر بسيبه يمثلي حلم بمعنى اني طول الوقت اقول ياه لو اقدر اسافر عشان اغير جو واشوف دنيا جديده واستمتع

بس الحقيقه ان الفرصه دايما موجوده بس انا اللي مش بحبه

انا لفتره كان شغلي بره القاهره وكنت بكرهه الفتره دي موووت

الصفات اللي اخدتها من بابا؟

حب الشغل

بابا صاحب صاحبه ويمكن اكون اخدت دي شويه منه

تكبير الدماغ

محاوله التأنق في اللبس مع الفشل المستمر

حب المظاهر الى حد ما

وكفايه على كده بس احيانا بيكون عندنا صفه معينه ومنعرفش اننا اخدنها من حد وبعدين نكتشف ده في يوم ما

الصفات اللي اخدتها من ماما ؟

ماما دي حبيبتي اخدت منها غير حب شغل البيت

شويه طيبه صغيرين

سرعه الانفعال

كثره الأسئله

حب البيت او القعده في البيت

شويه تدين صغيرين

يعني حاجدات كتير بس مش مجمع حاجه معينه اللي عنده اختيارات للموضوع ده ياريت يطرحها وانا احاول اشوف الصفه دي في ولا لأ ولو في أخدتها من مين

أكتر 6 حاجات بتكرهها؟

اولا احب اقول اني رغم كرهي ليها ممكن تكون فيا

الكراهيه نفسها مش بحبها

البخل مش بحبه

الضعف مش بطيقه

الظلم قاسي

عدم الاحساس قاتل

الكدب- فيه حديث ما معناه المؤمن لا يكدب

طبعا في حاجات تانيه كتير زي البرد او الشت عموما ومياه البحر والضلمه والخوف والكسل والجبن الخ الخ

أكتر 6 حاجات بتحبهم؟

الحب نفسه او الرومانسيه فاهمني؟

اني اكون مع حبيبي ويكون هو مبسوط ومش زعلان مني كعادتة

الكرم بحبه اوي

العطف حلو كتير

الهدوء

النوم

واكيد في كمان القرايه وشغلي والحريه والحرجه الكتير والمشي الخ الخ الخ

الشغل بالنسبه ليك؟

مش عارف ساعات احبه وساعات اكره بس متكيف معاه وبيمثلي الى حد ما الامان رغم ان مشكلتي الكبرى هي عدم الاحسا بالامان بس على الاقل انا في الشغل بيكون عندي المظهر الاجماعي الكويس وبشغل دماغي كويس وكمان بكسب كويس

مش عايز طمع

أيه الكمبيوتر والنت بالنسبه ليك؟

الكمبيوتر كل شغلي والنت كل تسليتي ومش بقدر استغنى بجد عنهم

خلاص خلصت وطبعا اللي نفسه في التاج يتفضل المضوع مش أجبار خالص وخصوصا ان كل اللي بيعلقوا تقريبا اتمرر ليهم التاج سابقا

على الهامش

أنا قلت لحاتم حبيبي كتير وهو بيتكسف وكمان انا كتبت البوست ده من سيبر وبقالي ساعتين بكتب فيه وكأني بكتب على اله كاتبه لان الكي بورد حقيره وكمان الناس بتدخن وانا بتخنق وبيتخنقوا وانا مش بحب الصوت العالي

أطفال الشوارع

قررت أن أخلع ولو قليلا ثياب السلبيه

أمبارح وأنا في طريقي لشغلي لفت نظري موقف غريب، كنت في المترو وكان في مجموعه من الاطفال، كان سن أصغرهم لا يزيد عن ثماني سنوات ولا يزيد أكبرهم عن عشر سنوات، كان بيان عنهم أنهم زي الأغلبيه من الطبقة المتوسطة أعني، كان كل منهم يرتدي قميص وبنطلون وبلوفر يقيه البرد، أي أن لهم من يهتم بصحتهم

فهمت من كلام أصغرهم (وكان أكثرهم كلاماً) أنهم يعملون في ورشة وكان أشد ما لفت نظري أنهم وبأستمرار واقفين أمام الباب ليسدوا الطريق على الداخل والخارج بالاضافه الى محاولاتهم المستمرة في ايقاف فتح وغلق الباب ولو خرجت من نطاق التفكير الذاتي في انهم بذلك يعوقوا حركة المترو مما قد يسبب عطله وبالتالي تعطل جميع الموجودين ، وفكرت فيهم وفيما قد يحدث لهم من إصابات ولكن لا هذا ولا ذاك هو ما كان يشغل بالي.

كان يشغل بالي لغتهم المستخدمه في الحديث، وعشان أوضح هحكي موقف من اللي حصل

كان ياما كان - لا أنا مش بحكي حكايه- كان في واحد كبير راكب المترو وكان بيقولهم بس سيبوا المترو يقف عشان يتحرك فالولد الصغير قاله طيب براحه انت هتوجع دماغنا ليه ومجموعه أخرى من الالفاظ بجد وبدون أدعاء مني لا أستطيع أن أكررها حتى في ذهني، الراجل الكبير اتنرفز وقال للولد الصغير انا هوديك للعسكري الي في المحطة والولد برضه مسكتش ، المهم الراجل كان نازل المحطة اللي جايه فنزي وبعد ما نزل استمر الولد الصغير واصدقائه في السخريه منهم وحتى وصلنا لهذه النقطه لم يتحرك أحد من الموجدين بل كان الكثير منهم يضحكون من طول السنه هؤلاء الصبيه.

وكعادتي لم أكن أنوي أن أحرك ساكن أنا أيضا فأنا بأستمرار أرى نفسي من الضعف لدرجة لا أستطيع معها التحدث حتى مع الأطفال ولكن أثارني وبشده أن سب أصغر هؤلاء الصبيه أم الرجل الكبير بمجموعه من الالفاظ التي لا أستطيع أن أتخيل كيف وبمنتهى البساطة خرجت من فمه، وأيضا لم يتحرك أحد من الموجودين وأستمر الصغير في سب الرجل وأمه ونعته بأقذر الصفات وبالإضافه لذلك الجبن والتخاذل لأنه رحل بعدما هددهم ولم ينفذ شيء من تهديده.

لا أدري ما الذي دفعني ولكني تحدثت لصغيرهم بعد أن وكزته في ذراعه قائلا له

محدش قالك قبل كده عيب

رد قائلا لا

قلت له أنا بقالك دلوقت عيب

فرد وقالي أنا عمري ماحد مسكني من دراعي كده

أستفزني رده وقلت له

عمر ما حد مسكك من دراعك وعمر ما حد قالك عيب!!

قالي أه

قلتله تبقى مش غلطتك لوحدك

وبغض النظر عن صدقه أو كذبه بس أستفزني أن أحد الموجودين بعدها قالي هو ده الجيل الجديد

فأنفعلت وقلتله وهنسكت لغايه ما يضيه

قالي هو لسه هيضيع ما هو ضاع من زمان

قالتله ومين سابه يضيع وهنفضل لغايه أمتى نتفرج ونسكت مش هو ده أخويا مش هو ده أبنك مش هو ده قريب أي حد فينا

هنفضل نسكت ونسكت ونسكت وبعدين

عندها بدأت مجموعه من الاصوات الناهره وأخرى ساخطة ولم أحتمل الضجيج من حولي فلا أنا بواعظ ولا أحتاج لمن يخبرني عن تدهور التعليم وتدهور الصحة وتدهور الأخلاقيات ولا أنا أبحث عن حل للمشاكل الأقتصادية ولكن أبحث عن مثل هذا الطفل أبحث عن حقه في أن يحيا حياه طبيعيه

هل هؤالاء الأطفال من أطفال الشوارع؟

ولا أطفال الشوارع هما بس اللي عايشين في الشارع؟

هل ممكن يكون في بيتي وبيت أي حد من اللي ممكن يقرا كلامي ده طفل من أطفال الشوارع؟

هل أهل هؤلاء الأطفال ميعرفوش أيه حال أولادهم

مش عارف حقيق مش عارف

لا استطيع

لا أستطيع أن أمنع يدي من أن تبحث عنك
ولا أستطيع أن أمنع لساني من الحديث عنك
ولا أستطيع أن أمنع عيني من التطلع في وجوه الناس علني أراك
ولا أستطيع أن أمنع قدمي من الذهاب إليك
ولا أستطيع ولا أستطيع
ماذا عساني أستطيع
لا أستطيع سوى شيء واحد
أن يظل قلبي ينبض بحبك حتى الموت

هلوسه

الإنفصام يعني أيه

محتار أنا في حالي

ساعات بحس أني مش عايش حياتي أنا

ولكني عايش حياة شخص أخر

يشبهني

جايز

مختلف عني

أكيد

بس لو الإنسان ده مش أنا

ليه أسمحله انه يسرق العمر مني

تعبان أنا من حالي

مما قرأت عن الحب

مما قرأت قصه تعلقت بها بشده
كانت عباره عن قصه حب كالاسطوره بين شاب وفتاه

ولكن وكالعاده لم يكن هناك من تكافئ بينهم فقد كانت من أصل أرستقراطي
في حين أنه كان غني ولكن من أصل تاجر ابن تاجر
رفضت أم الفتاه وبشده
ورفض أهل الولد وبشده

ولكنهم أندفعوا في حبهم

وفي لحظة قال لها أنتي زوجتي أمام الله

وكان الحب كان أقوى منهم

وحملت الفتاه ثمرة هذا الحب وجبن الشاب الشجاع أن يتحمل غلطته

ورفضت هي أن تسميها غلطه

وكانت جمله من أشد الجمل تأثيرا

قلت له

لا تقل عليه أبن حرام فقد كان نتيجه لحظه حب صادقه فهو من أشرف الكائنات
القصه لها تكمله أخرى قد أكتب ملخص للقصه فيما بعد

ولكن هذه الجمله هي ما أثار أنتباهي حقا

هل فعلا تكون لحظة الحب الصادقة غلطة لازم نندم عليها؟

على الهامش

أني أمقته الان قدر ما كنت أحبه

لا أنها مجرد كلمات أستطيع بسهوله أن أخطها بيدي ولكن هيهات أن يحسها قلبي ويقتنع بها عقلي

فمازلت أهواه كما لم أهوى من قبل

مازالت أتمنى وجوده بجواري

مازالت أتمنى أن أحيا نفس المشاعر والاحاسيس مره أخرى

لا لم اعد أستطيع

ليه الملل؟

أحيانا ما يبنتابني الملل
الملل من كل ما يتعلق بمظاهر الحياه المبهج منها والكئيب
وتصيبني حاله من البلاده الفكريه ولكن كل هذا أصبح من الماضي فمنذ تلاقينا وأصبح هو كل حياتي
أصبح الهواء الذي أتنفسه أصبح غذاء قلبي وعقلي
لم يعد من داعي لأي مظهر من مظاهر الحياه في حياتي يكفيني كوني معه وكونه معي
لم أعد أشعر بأني فريسه سهله للمل
ولكن هيهات للأمور أن تسير على وتيره واحده
فبعد أن أذاقني لذه الوجود حرمني منها مره أخرى وأخبرني بدون سابق أنذار أنه لا يستطيع
لم أطالبه بأن يستطيع يكفيني وجوده ولكنه أعتبرها أنانية مني وأراد ان يكون كل ما بيننا مجرد ذكرى لا أقل من الذكرى أرادها حقبه منسيه ولم تكن كل تلك الأحداث إلا خلال ساعات قليله مرت بي وكأنها دهور طويله


لماذا يكون الهجر دائما من نصيبي
لماذا أتذكر عدد المرات التي هٌجرت فيها ولا أتذكر عدد المرات التي هجرت أنا فيها
لماذا نتذكر من خاننا ولا نتذكر من خونهم
لماذا نبكي عن من لن يكونوا معنا بعد الان ولا نشعر بمن لن نكون جزء منهم بعد الان
من الان وصاعد لن أتخلى عن حقي في الوجود إلى جوارك

ليه بنجرح أوي؟

أوقات كتير بجرح كل اللي حواليا من غير ما أقصد

ساعات أكون عايز أقول بحبك أقول بكرهك

ساعات أكون عايز أقول أه وأقول مكانها لأ

ليه الإنسان بيسيب نفسه على سيجيتها مع الناس

من هنا ورايح مش هكون مع الناس غير زي ما الناس عايزني أكون

مش هكون أنا هكون أي حد غيري أنا

بالهنا حبيبي

تركته يأكلني
وبعدما فرغ مني

قام يتخلص من بقاياي على يديه وشفتيه
أيهم كان أحق بالأغتسال أولا

يديه

أم شفتيه
أم لعله قلبي الذي منحه ما يريد بدون أنتظار

لماذا لا نتحمل الأخر بعد ما ننتهي منه

هل هو ذنبه انه لم يحبني؟

لا أنه ذنبي فقد منحته ما يبغي ولم أنتظر أن أتأكد أنه يستحق

لا أنه يستحق ولكني أنا الذي لا أستحق

ياليت لي من القوى السحرية ما يمكني من تخطيه والإستمرار في حياتي

ياليت لي من القوه ما يمكني من نسيانه

ولكن هل أريد حقاً نسيانه ؟

من المفكرة

هل من الممكن ان ينخدع الشخص بمثل هذه السهوله
ولكن أحقاقا للحق لم يخدعني هو

ولكني أنا من خدعت نفسي
لم يصف هو نفسه بالملاك ولكني أنا من فعل
لم يحدثني عن الشرف والكرامه
ولكني توهمت أنا ذلك
لم يحدثني عن الاخلاص
ولكني أفترضت أنها يملك منه ينبوع لا ينبض
ولكنه حدثني عن الحنان
وأفاض في الحديث عن الأمان
فلم اكد أرتشف من هذا الأمان
الا وتحول الا وحش كاسر
وأخبرني فقط انه لا يستطيع
وأنصرف
هل هو الذي خدعني أم أنا خدعت نفسي
أم أنخدعنا سويا
فهو أيضا لم يرى مني غير جزئي شديد القبح
وأن كنت أشك في وجود قبح أقل مما رأى ولكني عذري الوحيد أن لقائنا لم يدم الا سويعات قليله

أول مرة

أيه هي أول مرة

ساعات كتير مش بكون قادر أحدد أيه هي أول مره

أول مره نطق لساني أول مرة أدوس على الأرض

أول مره أفرح

أول مرة أحزن

أول مرة أحب

أول مرة أكره

أول مره أشوف النور

أول مره أخاف من الضلمة

أول مره أقرأ كتاب

أول مره أتعرف بصديق

أول مره أخسر صديق

أول مره أكون في حضن حد بيحبني

أول مره أكون في حضن حد بحبه

أول مرة قُبلة

أول مره صلاه

أول مرة خطيئة

أول مرة توبة

أول مرة جنس
أول مرة أتعب

أول مرة أرتاح

أول مره أبعد عن حبيبي

أول مره حبيبي يبعد عني

أول مره سفر

أول مره غربة

أول مرة عودة

أول مرة أبكي

أول مره أخدع

أول مره أتخدع

أول مره رمضان

أول مره صيام

أول مره دراسه

أول مره كليه

أول مره نجاح

أول مره فشل

أول مره أسب

أول مره أتسب

أول مره أجرح

أول مره أتجرح

في في حياتي كم أول مره وهيكون في بعدها أكيد كم أخر مره مش عارف ليه كنت بفكر في بدايات الأشياء يمكن عشان كده هبدأ تدوين عشان بعد كده اكون قادر أحدد أمتى هي المره الأولى للأشياء في حياتي

مأعتقدتش أنها كمدونه هيكون ليها الأهميه لأني مأعتقدتش أني هناقش فيها أي من المواضيع العامه ولكن يمكن اعتبرها نوع من محادثه الذات زي النوته الصغيره اللي دايما مبتفرقنيش ، ولكن بما أن صديقي المدون الكبير ولــو هو صاحب الأقتراح بإنشائها فأعتقد أنه هيكون ضيف عزيز متواجد بأستمرار و إن كنت أشفق عليه من زيارته لمدونتي المتواضعه أو كما سأطلق عليها من الأن وصاعد مفكرة المقيد.

البداية

بسم الله الرحمن الرحيم

هل ممكن تكون دي البداية ولا هي دي النهاية

طلب مني صديقي الجديد من عالم المدونات وصديقي القديم جدا من عالم المشاعر والأحاسيس أن أبدأ خطوة للتعبير عن ذاتي وها أنا أحقق طلبه ولكن هل سيكتب للخطوة الإستمار لست أدري

أشكرك صديقي



وأهديك هذا المقطع
http://egyptian2.salmiya.net/songs/angham/ram/angam63.ram