النهارده مش يوم عادي
محصلش حاجه مميزه
بس قررت أنه ميكونش يوم عادي
قريت من شويه جمله حاتم كاتبها على الفيس بوك
حياتي لقيتها زي الفيلم الهندي...دراما...تراجيدي....أكشن....كوميدي....رعب....رومانس.... أستعراضات....ملحمية....كله في نفس الفيلم
علشان كده قررت ان عمري ماأكون دوبلير
انضرب واتبهدل علشان حد تاني
أو أكون كومبارس
الناس تتريأ عليا أو ان يكون كل دوري اني أعدي من قدام الشاشة
قررت أكون بطل
لو فيلمي مش عجب حد على الأقل هابقى عشت حياتي زي ما أنا عايزها
ولما اموت هايفضل اسمي مكتوب على التترات :-)
حلوه جدا بس برضه مش هي السبب
قريت بوست فراشه الجديده وقريت فيه
فـــوق الجبل دة..... اتمنيت إن بداية السنة الجديدة دي تبقى جميلة في كل حاجة زي المنظــر الخيالي اللي أدامي دة
يمكن هي دي الجمله اللي شجعتني بس برضه بعدها مبدأتش كتابه
كان عندي عصام في المكتب وقالي كلام فيما معناه
انه مقصدش انه يزعلني وانه هيستنى لغايه ما نفسيتي ترتاح من ناحيته وارجع اتعامل معاه تاني
وكلام من نفس النوعيه
أثر فيا حسيته
وجعني عشان مش قادر أكون حد متسامح
بس برضه مش هو السبب
قريت اتني أول بوست في مدونه فراشه الجديده
نتعــرف على أشخــاص و نظل معهــم لسنين، لكنـــهم عنــــد رحيـــلهم.. لا يبـــــــقون لنـا ســوى أنصــاف ذكـريــــــات، و لا نتذكــر لهم إلا الأسماء
وتاني أفتكرت ناس كتير مروا في حياتي يمكن ليوم او لشويه ساعات
وسابوا أثر لغايه دلوقت موجود
بيوجع أوقات
بيفرح ساعات
يمكن ميفتكرونيش
بس دايما بفتكرهم
بس برضه مش هم السبب
أختي عيد ميلادها بعد يومين
أمبارح أشتريت الهديه
أمبارح كان أول مره أشوفها من فتره طويله رغم أننا كنا دايما سوا
أمبارح متكلمنش
بس كنت متأكد انها حاسه أن في حاجه فيا متغيره
بس برضه مش ده اللي خلاني أفكر النهارده اني نفسي أفتح نوتي الصغيره تاني وأكتب تاني كل اللي في بالي من غير تفكير
من غير ما دوس باك اسبيس في الكيبورد من غير ما أفكر كلامي هيجرح حد أو هيألم حد أو حتى هيخلي حد يشفق عليا وأنا بكره الشفقه
أحيانا بفكر أكتب
عن الحب
عن الخوف
عن الحزن
أو حتى عن الكره
ومكتبش
ليه النهارده تحديداً
أمبارح واحد زميلي في الشغل كان قاعد جنبي وأنا بشتغل وفجأه قالي أنا بحبك أوي يا محمد ضحكت وسكت
بس جويه فضلت ترن كلمه ليه
كل ما حد يقولي أي حاجه دلوقت أفكر ليه
ليه الناس بتقول مجاملات؟
ليه الناس بتقول كلام وحش
ليه الناس ممكن تجرح
ليه الناس ممكن تكدب
ليه الناس ممكن تخدع
ليه ساعات الناس بينسوا أنهم ناس
ويشوفوا نفسهم فوق الناس
ليه الناس بتتكلم
دلوقت أكتر وقت كويس ممكن أعيشه لما أكون لوحدي
مش دايما
أوقات وأنا لوحدي بتضايق
بس الاكيد أني في وسط الناس بتضايق أكتر
مش كل الناس
ساعات لما بخرج مع الناس اللي فعلا برتاح معاهم بكون في قمه السعاده
فعلا في قمه السعاده
اللي بتفكر فيها ساعتها وتقول لنفسك أنا مش ممكن أكون أكتر سعاده
أو أنا مش عاوز أكون أكتر سعاده
بس برضه مش دايما
الاسبوع اللي فات راكب في العربيه مع أتنين بعزهم جدا ومع ذلك طول الطريق وانا بفكر لو مسكت الدريكسيون من اللي سايق وميلت العربيه ووقعتها من فوق الكوبري دلوقت أيه اللي ممكن يحصل
بس صعبوا عليا
لأني فعلا بعزهم
بس فعلا ساعتها مش مبسوط
من نفسي قبل ما يكون من ناس
بكره الشخصيه اللي أنا عليها
مش بطبق مبادىء مقتنع بيها حتى النخاع
بزعل ناس كتير
أنا فاكر دلوقت اليوم اللي فكرت أني أعمل المدونه دي وكانت تالت مدونه ليا وفكرت في السام ومترددتش لحظه وكتبت إنسان مقيد
ولسه مقتنع بكل اللي كتبته عن نفسي وانا بقول أني نفسي أتخلص من كل قيودي وأكبرهم دلوقت
أني أعرف تاني أصدق من غير ما أشكك
أني أبطل أقول تعبت
أبطل أقول زهقت
بس كمان
أبطل أفكر إن الجزء الأسود اللي جوه قلوب الناس دايما صغير
أبطل أفكر إن الناس مش ممكن تكدب من غير سبب
مش ممكن تأذي من غير سبب
طيب أزاي
أزاي أفرق
بين اللي بيكدب وبين اللي بيقول الحقيقه وبين اللي بيجامل
بين النوايا الطيبه واللي مش
يارب ساعدني
نفسي أكبر
نفسي أكون أكثر نضجاً
نفسي أكون إنسان غير مقيد
