أنا عندي مشكله
طول عمري اسمع اغنيه شاديه وهي تهاتي وتنادي وتقول
أنا عندى مشكلة أنا ليا مشكلة
الحب جديد عليا وحكايته مطولة
والدنيا قصاد عينيا بالحب مقفلة
يا اللى حبيبتوا قبلى
وصادفتكم مشاكلى
اروح لمنين قولوا لى يحل المشكلة
وكنت بشوف ان مشكلتها قد تبان صعبه ولكنها في الحقيقه سهله جدا وده لأن مشكلتها بدأت كالتالي
حبيبى قبل منى كان حب وانظلم
وقضى سنين طويلة فى الهجر والندم
وانا فى طريق حياتى لاقيته فى سكتى
وجيت حبيته اكتر من روحى ودنيتى
وقلت اليوم ده عمرى ونصيبى وقسمتى
بس طبعا مفيش قصه حب تعادي بالساهل وعلى طول كده كان لازم يكون في مشكله يا عندها يا عند الحبيب وبالفعل المشكله كانت عنده
يبص فى نور عينيا ويفتكرنى هى
ويقول لى واحدة زيك زمان ضحكت عليا
يا حرام المشكين لسه منسيش حبه القديم ولسه مجروح منه بس الاخت شاديه مسكتتش وفضلت تسأل
يا اللى حبيبتوا قبلى
وصادفتكم مشاكلى
اروح لمنين قولوا لى يحل المشكلة
ومش بس أكتفت بالسؤال دي مدخرتش اي جهد
كتير كتير حاولت اهون عذابه وارحمه
مش قادرة اوصل لقلبه ولا قادرة افهمه
بس البعيد كان معندوش احساس وكان بيقابل الخير بالشر
لو اغلط مرة واضحك يخاف من ضحكنى
وان قلت كلمة يفضل يلوع كلمتى
حتى ان بكيت يقرب ويحلل دمعتى
وبدال ما يلين شويه يقول فيه واحدة تانية
زمان كانت بتبكى بعدين ضحكت عليا
طب الواحد يقول ايه في راجل زي ده بدل ما يشكرها بيعذبها بس برضه الاخت شاديه طول عمرها نفسها طويل ويشهد عليها فيلم الزوجه تلاتشر واللي عملته في رشدي اباظه فعشان كده قالت تدخل الناس بينهم
يا ناس قولوا لحبيبى يا ناس حكايته يفضها
قولوا له الناس قلوبهم مش زى بعضها
فيه واحدة غيرى قدرت تغير قلبها
أنا ذنبى ايه أقاسى واتحمل ذنبها
خلوه يدينى فرصة وأنا أموت حبها
قولوا له يحس بيا ويبطل ظلم فيا
وعمره مش هيندم لو سلم قلبه ليا
وبكلامها قدرت تحل المشكله اللي خلتنا نفتكر من البدايه انها مشكله عويصه وملهاش حل ولكن الحقيقه ان حلها سهل وان المشكله مش مشكلتها لكن مشكله المقروص في قلبه اللي حبته
طيب انا اعمل ايه في مشكلتي؟
اه افتكرت انا لسه مقولتش على مشكلتي
مشكلتي تبان سهله بس الحقيقه انها حلها صعب
من صغري اللي هو مش من زمان اوي يعني وانا دايما كل حياتي بتتوقف على الآخرين
من وانا صغير وانا دايما بتخيل ان حل مشاكلي هيجي على ايد حد تاني وافضل احلم واحلم واحلم
وابرر احلامي اني مش لازم اتمسك بالواقع وبس ولازم اسيب شويه من نفسي يعيشوا في الاحلام لغايه ما فقت يوم على الحقيقه الصعبه
اني فعلا بوقف كل حاجه في حياتي على الآخرين حتى لو كانت حاجه صغيره ويمكن تكون متستهلش
بس مش لازم اظلم نفسي كتير لازم كمان افتكر ان
اول مره تيجلي ورده هديه كانت مني
اول مره اتمشى على الكورنيش كنت لوحدي
اول مره اتعزم على الغدا بره كنت انا اللي عزمتني
اول مره في حاجات كتير كنت لوحدي
وكانت حياتي مبتقفش على الآخرين
بس مش عارف امتى كان الخط الفاصل اللي بدأت عنده حياتي تقف على الآخر
4 comments:
جميله اوى اغنيه شاديه واول مره اعرفها وكلماتها محسوسه وفيها حيره بس يمكن هو معذور انه خايف يحب تانى وينصدم بس طبعا ملوش حق انه يشبه كل الناس ببعضها وانها ممكن تكون زى حبيبته القديمه والموقف ده بيتكرر كتير اوى فى حياتنا بس معتقدش ان عقليه الحبيب دى لسه موجوده الحياه تجارب وصوابعك مش زى بعضها اما بالنسبه لحكايه الاخرين فى حياتنا واعتمادنا عليهم اى انسان فى الدنيا يتمنى يكون ليه شريك صديق او حبيب او اخ او اى كان يشاركه الحياه فى الفرح والحزن ونحس ان فى حد نعتمد عليه ويعتمد علينا بس ياترى هو ينفع نعتمد على الشخص ده فى كل حاجه بس ليس كل ما يتمنام المرء يدركه واكيد بكره يا انسان هتلاقى الى يشاركك والى يستحق انك تشاركه ويشاركك كل حاجه وتعتمد عليه وتلاقى حد غير نفسك يديلك ورده بس مش مهم عزومه الغدا دى امضاء المجهوله
أول مرة أسمع أغنية شادية دي مع إنها حلوة أوي. :)دايما تجيب أغاني أكون مش سمعتها قبل كدة
مش حاسة إن ارتباطك دايما بالناس دة حاجة وحشة أوي، وحاسة إنها مش هتتحل غير بالمواقف اللي حواليك اللي هتلاقيها بتظهر فجأة في حياتك مرة بمرة لحد ما تلاقيك مش مستني حد يقف جنبك في مشاكلك زيادة زي قبل كدة.. بس برده خليهم حواليك يشاركوك فرحتك وحزنك يعني :). بس الاعتماد المطلق اللي ساعات بتحسه دة حاسة إنه مع الوقت هيتغير لوحده
تحياتي
عزيزتي المجهولة
لأ هي بصراحه لسه موجوده العقليه دي
انتي عارفه
ساعات الواحد يقول انا مش كده ومش بفكر كده بس لما يتحط في الموقف يلاقي ان كل اللي بيتريق عليه في الافلام العربي القديمه والهندي القديمة والجديده بيعمله في حياته
صدقيني
:)
كلامك صح اوي في اننا محتاجين الشريك يشاركنا بس ميتحكمنش فينا ولا نتحكم فيه
ميبقاش حتى الافعال البسيطة جدا في حياتنا مرتبطه بيه وبوجوده حتى لو كان ده هو اللي احنا بنحتاجه وبنتمناه
لأن زي ما قولتي ليس كل ما يتمناه المرء يدركه
بشكر مرورك
عزيزتي الفراشه
بجد اول مره تسميعها دي مشهوره اوي
كانت في فيلم اسمه القاهره في الليل كان لثلاثي اضواء المسرح وبيتهيألي كانوا بهربوا من البوليس طول الفيلم اللي كان بيجري وراهم بيتهيألي بسبب جثه وفاكرهم هما القتله ودخلوا الاستوديوهات وكان الفيلم عباره عن مجموعه من الاستعراضات
يعني نفس الفيلم ده اللي فيه اغنيه صباح بتاعت الراجل ده هيجنني
وكما الاغنيه دي لشاديه كانت قاعده مع صحباتها وبتشتكيلهم وباباها واقف على الباب بيحاول يطمن على بنته ومشكلتها بيتهيألي انه حسن فايق
المشكله لما فجأه بنحس اننا مش عايزين اشخاص معينين هما اللي جنبنا في مشاكلنا بس بندور او بنلاقي اشخاص تانيه موجوده وبالتالي المشكله مش بتتحل بس الاشخاص هما اللي بيتغيروا وبنفضل احنا احنا زي ما احنا
بلاش الغيبه الطويله ومستنين بوست جديد فيه اكتر من صوره وان كانت معبره جدااااا
Post a Comment