الصيف

الصيف بدأ
أيوه الصيف بدأ ودي مش أشاعه ولا أوهام في خيالي ده واقع اتأكدت النهارده اني بعيشه وهعيشه لو ربنا اداني العمر لشهور طويله قدام
الصيف بدأ فجأه وانا مكنتش مستعدله واتاري العم هاري كان أنصح مني لما أخد أجازته السنويه وقرر انه يقضي الاسبوع ده في الغردقه والاسبوعين الجايين في المانيا ونسي انه سايب وراه ناس مش بتستحمل

أتأكدت أن الصيف بدأ لما لاقتني بفكر وانا في المترو في نفس الفكره اللي بتزورني في بدايه كل صيف وانا بركب المترو وبتخيله مكيف ومش أي تكييف لأ ده تكييف بيخرج هواء معطر ومع كل تذكره واحد بيقطعه يسلموه معاه البادي سبراي ولايحه التعليمات اللي مكتوب فيها بالخط العريض أحذر من تعليق ايديك وشعلقتها لفوق عشان بيكون في ناس بتعاني تحت والسنه دي حلمت انهم زودوا جزء مخصوص عشاني عشان انا زبون دائم للمترو ولازم أحظى بعنايه خاصه وهي تنبيه على كل الركاب عدم الاقتراب او محاوله فتح باب للحوار او اللمس وخاصه اللمس عشان الجو حر والواحد مش ناقص
هو بصراحه مش كل الناس بتكون حالتها دايما صعبه معايه لأني والحق يقال كنت في الميكروباس واذ بي افاجىء بواحد هيقعد جنبي ولا ممكن ابدا اغلط في الرائحه اللي انا شممها وكان نفسي اسلم عليه واحضنه واقوله هو انت بتستخدم شاور جل لوكس مش كده وقبل ما حد يقول حاجه انا بقول من البدايه اهو وبعلو صوتي
ايوه انا بستخدم شاور جل لوكس مش بس كده أنا كمان بفضله بالفراوله والكريمه اللذيذه وان كنت لغايه دلوقت مش عارف هما كاتبين كده على العلبه عشان يغيروا الناس انهم يتذوقوا ولا أيه؟؟
بس انا عندي سؤال هو ليه الذل لينا كده من زمان يعني صانسيلك لغايه دلوقت مش معترفين ان في راجل ممكن يستخدمه ولسه فاكر اعلانات بيرت بلاس زمان وهي بتتصور انها بتعمل اعجاز لما صرحوا في اعلان وقالوا لكي وله وكأنه ده فضل منهم انهم يسمحوا للراجل انه يستخدمه وحتى لما هيد اند شولدرز بعدها زاد الطين بله وقال ان الراجل مش ممكن يستعمل الشامبو الا لو كانت فروه رأسه ملجأ للقشره وان الحل عندهم وان كنت اعتقد ان ده أكيد كان اعلان اللي اقترح فكرته واحده ست عشان توحش صورتنا اكتر
بس انا ولا بيهمني بشطب من على كل العلب حرف الياء في نهايه كل جمله واخليها استخدم اللوفه الاسفنجيه او ضع ما مقداره ملعقه صغيره وان كانت الجمله دي بتنرفزني لأن ملعقه صغيره لا تكفي وبعدين افتكرت انهم عشان كانوا كاتبين ضعي ملعقه صغيره وان مفروض بعد ما حذفت الياء ازود كمان ملعقه عشان الولد نصيبه الضعف طبعا
وبالعند في كل شركات الشامبو اصبحت باستعمل الشامبو الوحيد المخصص للرجل وان كان نفسي اقولهم حرام عليكم هو عشان الشامبو مخصص للراجل لازم تبقى ريحته لا تطاق كده ده انا حتى فكرت استخدم شامبو كلير للمرأه عشان أتأكد هو في تفرقه ولا هي سياسه الشركه ان الشامبو لازم يكون ريحته وحشه
بصراحه هو مش الصيف مشكله كبيره كده ده بيكون فيه ميزه لأن الواحد بيشوف في المترو عينه جديده من البشريه غير الطلاب اللي بيكونوا مليين المترو طول الشتا ومش وراهم غير سيره الدكاتره وكلام من عينه الدكتوره دي لسنها طويل أه صدقيني انا بنت عمتي كان ليها موقف معاها او الدكتور الفلاني ده عثل والله عثل بس لو يدرسلنا من غير امتحانات ودي طبعا عينه من كلام البنات لكن الولاد في المترو مش بيتكلموا عن الدكاتره لأنهم يبيكونوا بيتكلموا مع البنات يا عن البنات
ومن امثله العينه الجديده الزوج والزوجه اللي شفتهم وانا في المترو
اصل اان كنت لا بيا ولا عليه ببص لاقيت اتنين داخلين ومعام ولد رضيع بس زي القمر وأول ما شفتهم قلت دول عرسان جداد وده اول مولود هتسألوني أزاي عرفت؟
هقولك مش محتاجه فكاكه مني أصل المدام كانت واكله صباع روج كامل ومخلصه على الاقل علبتين فونداشن اما العريس فكان طول الوقت بيبص في عنيها وهي بتتكلم وكأنها هتخلص او هو اللي هيودع بعد شويه فعايز يشبع منها وطبعا عرفت ان الولد كان المولد الأول مش عشان هما عرسان جداد وبس ولكن عشان كان الراجل هو اللي شيله وكل شويه يلعبه رغم ان الواد كان نايم ولسه اصلا في سن ميفهمش اللعب

مش الصيف احلى من الشتا بالذمه؟