في احدى حواراتي – اللي ما بتخلصش – مع أحد الأشخاص كنت بعبر عن افكاري الخاصه بالعلاقات البشريه وتحديدا في موضوع الخيط الرابط بينهم ده فكنت بقول اني شايف ان اي علاقه مبتنتهيش لما يقرر واحد منهم بس انه ينهي العلاقه ولكن لما الاتنين يأخدوا القرار ده وكان عندي اسبابابي وكمان براهيني
يعني لو اتنين يعرفوا بعض وقرر طرف انه ينهي الموضوع ويلا سلام وباي وكل الكلام الحلو ده فاللي بينهم منتهاش بس اتغير اسمه من علاقه بين طرفين لعلاقه من طرف واحد لأن ببساطه لما واحد من الاتنين بياخد القرار انه خلاص انا خلصت كل اللي ممكن اقدمه في العلاقه دي او زي ما بيشوفها اشخاص تانيه انا خلصت كل اللي ممكن اخده من العلاقه دي أو زي ما بيبصلها ناس اكتر انا خلصت اللي ممكن اديه او اخده في العلاقه دي بيكون الشخص ده فعلا خلاص خلص كل اللي عنده وحط النقطة في نهايه جملته اللي بتلخص العلاقه اللي كان فيها وبيقرر ساعتها يسيب الخيط بس مبيقدرش يقطعه لوحده لأن لازم الطرف التاني يساعده
هنا الأختلاف يا ترى الطرف التاني هيتمسك بطرف خيطه مع الاحتياط انه ميشدوش جامد احسن يبعد الطرف الاخر من الخيط وبالتالي لو قرر الشريك يرجعله ميلاقيش الخيط ولا هيقرر انه يسيب هو كمان لأنه احتمال يكون حاله من حال نانسي عجرم
قول هنساك نفسى بس اسمعها ونت بتقولهالى
قول هنساك مش انت حاسس الكلمة سهله طب قولهالى
هى كلمه لو قدرت تقولها قولها هى كلمة لو مكانك مش حقولها
وحيات كل الى بينا وحيات قلبى الى شيفك
هنساك قبل الكلمة ما تفارق شفيفك
قول قول قول هنساكى
فكر كتير على شان لو انت قولتها مش رجعه ليك
احسبها صح على شان اكيد هيكون ثمنها كتير عليك
دنا لو حستها فى عينك هتفرق بينى وبينك
قول قول قول هنساكى
اوقات كتير كان ليه حق اقولك انسى ماقلتهاش
وانت مسبتش غلطه وحده فى الهوى مغلطهاش
خبتها وقلبى شيلها مع انك تستاهلها
واضح جدا اد ايه كانت الاخت نانسي مفقوع مرارتها – مع الأعتذار لسحر غريب طبعا- فكانت مستنيه بس يقول عشان مش بس تسيب الخيط لأ دي ممكن تولع فيه خالص عشان ميكونش فيه خيط بعد كده
ساعتها اكدت بالدليل أني سبق وكنت في مواقف الماسك للخيط من طرف واحد وطالت الفتره دي ساعات وقصرت ساعات بس مرت في حياتي مواقف مردتش اتنازل عن حقي في العلاقه لمجرد ان الطرف الآخر رافض وجودي أو بمعنى أصح رافض ان يربط بينا خيط
بس هل يا ترى أنا لسه انا ولا قيودي غيرتني؟
هل هكون زي جنات واقول
فية خيط ضعيف رابط ما بينا ودا النصيب
هتخاف علية هخاف علية هتسيب هسيب
لحد امتى هخاف لوحدى ياحبيبى
الخيط خلاص مبقاش متحمل ... رعشة ايدى
لو انت مش عايزنى للنهاية
ولسة هماك الحكاية
صبر قلبى بلمسة احس ان انت قريب
انت الشمس بس خلاص قربت تغيب
حاجات كتير سيبناها ضاعوا خلاص بقوا ذكريات
وسنينا اللى تعبناها مفضلش منهم غير لحظات
لحظات بتهدد حكايتنا لحين لنعلن نهايتنا
بايديك الخيط اقف لحظة والجرح يطيب
لو تضعف واضعف وتسلم و تسيب وانا اسيب
6 comments:
البوست وفكرته حلوين اوى :)
انا رأيى فى الحكايه دى ان البقاء على الخيط او قطعه من طرف واحد بيبقى حسب احتياجنا او حبنا على اللى بينا وبين الطرف التانى اللى قرر يقطع الخيط من ناحيته بس فى النهايه سوا بقينا على الخيط او سبناه هو خلاص اتقطع واللى كان كان
بمعنى انك ممكن تمثلها بصورة حقيقيه
اعتبر انى انا وانت-مع الاعتذار لو كان ده يدايقك يعنى:) -
واقفين قصاد بعض وماسكين خيط ايا كان لونه انت من ناحيه وانا من التانيه وكل واحد فينا بيشده لو انا فى وقت قطعت الخيط ده او سبته اذن مفيش حاجه خلاص تربطنى بيك حتى لو انت فضلت طول عمرك ماسكه فى ايدك لان طرفه اللى بيوصلى احساسك بيا او ربطتك بيا خلاص مابقاش فى ايدى
يعنى مسيرك هيجى الوقت وهتيأس منى وترميه
فاهمنى؟
كان فى احد الائمه الغزالى تقريبا على مااذكر كان بيقول فيما معناه ان مابينه وبين الناس شعره
لو هما شدوها برخيها ولو هما رخوها بشدها تقوم تفضل علاقته بيهم دائما متزنه وواخده شكل واحد
اسفه لو طولت بس عايزة اقولك ان العلاقه لو انتهت برضا الطرفين يبقى ماتستاهلش نفتكرها او نبكى عليها
ولو واحد قطعها لازم وبكل رضا نقبلها ونقطع احنا كمان عشان الخساره القريبه افضل
اسفه للتطويل
:)
بوست مهم أوى ومـُحير جدا بس أنا ممكن أختلف معاك فى نقطه إن العلاقه مش بتنتهى إلا لما الطرفين يقرروا فى مواقف لازم يكون بين الطرفين حوار ويقرروا فعلا بس مواقف تانيه لازم طرف واحد يأخد القرار من نفسه لما بيكون زى ما قولت قدم كل حاجه او خلص كل حاجه سواء ان كان بياخد او بيدى لان الانسان مهما يكن علاقته بالى حواليه نوعها ايه هو بشر وليه طاقه وكمان فى حدود مش معقول مثلا مش هينفع ادى لطرف كل حاجه وخلاص قدمت كل حاجه واتكلمت كتير بس الطرف مش فاهم او حتى مش مقدر ومفيش موقف واضح او باين فى الحاله دى يبقى لازم بينى وبين نفسى هاخد القرار انى هقطع الخيط هقطعه نهائيا بمعنى ان العلاقه اكيد لازم تكون بالمثل واعامل الى ادامى زى ما العلاقه المفروض تكون يعنى الخيط المفروض يكون بالنص ما بينا نص الخيط ليه ونصه ليا لان الوسطيه احسن حاجه بس طبعا مش دايما الواحد بيعمل الى المفروض يعمله او بيقول حاجه وبيكون وقت المواقف حاجه تانيه كتير الكلام بيكون عكس الموقف وكمان فى نقطه مهمه يمكن بالنسبه ليا من وجهه نظرى المتواضعه انا ليه استنى ان الى ادمى ياخد القرار ويقولى عليه ليه لو فى قطع خيط او وصله ميكونش من نفسى اولا وحسب ما انا شايفه الموقف وهزود عليه احساسى اكيد انى المفروض اعمل ايه اما بالنسبه صحيح للبوست الى فات انا حاليا بدون اى مدونه يعنى مئجله قرار المدونه بقالى سنه او اكتر انا طولت كتير فى كلامى بعتذر وبعتذر مره كمان عن بحثك لمدونه لم تنشىء بعد امضاء المجهوله
عجبني اوي وجهة نظرك في ان اي علاقة مابتنتهيش غير لما الطرفين يقرروا دا سوا
بس ساعات لما طرف ياخد قرار بأنه ينهي العلاقة الطرف التاني بيكون رد فعله هو كمان بأنه ينهي العلاقة دي
ان شايفة ان الصدق والأخلاص هو اللي بيخلي اي علاقة تستمر اطول فترة ممكنة
دمت بجوار احبائك واصدقائك :)
عزيزتي نور
هو انا بصراحه مختلف معاكي المره دي لأن لو الخط انقطع فبكده احنا الاتنين خلاص كل اللي بينا بيكون خلص
لأن اللي بيقطع الطرفين هو ان كل طرف بيشد في عكس اتجاه الطرف التاني
يعني بيبعد عنه
لكن لو كننتي سبتي الخيط من غير ما تقطيعه فبكده انتي بس الي سبتي الخيط ومهما سبتيه فانتي مش بتبعدي عنه فانا ممكن اهتدي بيه واواصلك لأنك لو بعدتي عن الخيط بكده بتبعدي عن الحد الي اعرفه انا يعني ساعتها انتي بتكوني اتغيرتي
فاهماني؟
يعني انتي لما بتنهي علاقه من جهتك بتنهيها عن نفسك ومن نفسك ولكن الطرف الاخر طال الوقت او قصر بيكون لسه شايف انه فيه صله بينك وبيته وهي الخيط اللي لسه في ايده
سلامي لأم سيد
:)
عزيزتي المجهولة
انا معاكي ان من حق طرف لوحده انه ينهي علاقه بس هو مش بينهي العلاقه نفسها هو بينهي صلته بالعلاقه
يعني مبيكونش عايز لا يقدم ولا ياخد بس بيفضل الطرف التاني مستني يقدم او ياخد بس من غير اي حق بيديهاله الطرف التاني
يعني انا لما يتقالي كل اللي بينا خلاص ملوش وجود مش بشوفها كده بشوفها اني بالنسبه للآخر مليش وجود بس هو لسه كل دنيتي زي اللحظه اللي قبل ما يبلغني قراره
لأن اللي بينا مش كان بس موجود عشان هو عايزني اكون موجود
انتي عارفه كان فيه حوار بين خالد ابو النجا وبسمه في فيلم لعبة الحب بتقوله انهم مش بيتكلموا ففتح في اي كلام فقالتله اسكت فقالها مش انتي اللي كنتي عايزه يكون في كلام
فقلتله يعني بس بتتكلم عشان انا عايزه؟
هي دي القضيه
هل احنا في علاقه عشان بس طرف واحد عايز؟
لأ
لأنها مش هتكون علاقه
زيها زي الانفصال مش بيكون الا لما بيكون الاتنين عايزين يبعدوا
مفيش تطويل ومستنين المدونه لأنها اكيد هتكون جديره بالاهتمام
عزيزتي ذات القلب النابض
اعجابك في حد ذاته شرف كبير جدا ليا
عندك حق جدا بس ساعتها مش من حق الطرف ده انه يتهم الطرف الاول انه هو اللي انهى كل حاجه لأنه هو كمان اخد قراره حتى ولو كان ناتج عن كبرياء مجروحه
Post a Comment