اليوم الخامس والعشرون

النهارده في المترو شفت حاجه غريبه
نظرا لدور البرد الرهيب اللي اصابني على حين غره واللي اشك انه يمكن يكون وراه الفيروس المرعب وحديث الساعه كنت في المترو واقف مش شايف قدامي وضارب وشي في الارض عشان مش قادر اقرا في المصحف في حالتي الشنيعه الفظيعه دي
فاذ بي اجد جزمه رجالي بني غامق في بني افتح استغربت شكلها ورغم انها كلاسيك بس عجبتني فكملت صعودا بعني الاتنين لاقيت بنطلون كلاسيكي بدرجه من درجات الرمادي الغامق وكملت فلاقيت الحزام احدى درجات اللون البني ومن غير ما أكمل فأكيد لازم يكون لابس على ده كله قميص فيه خطوط من الابيض محدده باللون البني

كان لابس اللبس ده جدو
مش جدي انا طبعا
بس هو اي حد كبير في السن عندي يبقى جدو
على اساس اني انا لسه صغنون مش خلاص كلها ايام وهكون سبعه وعشرين سنه ولا حاجه

المهم كانت واقفه قدامه الليدي تبعه
تيته
وكانت لابسه جزمه من جزم الباليه البني وجيب بني محروق وبلوزه بني فاتح وحجاب بدرجه من درجات اللون البني
بس مش هو ده اللي خلاني اركز طبعا في وسط مااانا مريض ومش قادر اقف لكن الوضع اللي جدو وتيته كانوا واقفين عليه هو اللي عجبني وشدني وخلاني انسى المرض
كانت تيته بتسند بضهرها على باب المترو اللي مش بيفتح وجدو بيسند بايديه الاتنين حواليها عشان محدش يخبط فيها بس بيتهيألي أنه كان بيتلكك عشان يكون قريب منها
وتيته كمان كان بتلف ايديها حوالين وسط جدو وكانهم هيندمجوا أو أندمجو في رقصه فالس مش ممكن تنتهي وبيحطموا فيها كل القيود من سن ومرض وترهل في الجسم
والاجمل الابتسامه اللي كانت على وشها
حاجه كده زي ابتسامه طفله جالها حالا هديه اتمنتها شهور وحضنت هديتها وعلى وشها كل الرضا والسعاده
او ابتسامه طفل شقي قرر ابوه البخيل اخيرا انه يوديه الملاهي ينطلق فيها ويخرج طاقته

وسرحت وفضلت افكر
ياه هو في كده
طيب ياترى قصه حبهم بدأت قبل الجواز ولا بعده
طيب ياترى هو مقدر النعمه اللي هو فيها والابتسامه المرسومه على وشها منوره
وياترى هي مقدره حبه ده ورغبته في انه يفضل قريب منها ويحميها وهو بالكاد بيستطيع يقف على رجلاه

ياترى ممكن اعيش واشوف اللحظه دي وانا بطلها وبالذات لأن اللون البني بيليق عليا حبتين