كآبه

أمبارح كان عيد ميلادي
فعلا هي دي الحقيقه
هو عيد ميلادي الفعلي اللي محدش تقريبا بيفتكره
وامبارح تحديدا محدش افتكره
النهارده اول يوم بعد ما قفلت السبعه وعشرين امبارح

يمكن يكون ده سبب الكآبه
يمكن
مش عارف
أمبارح
صحيت من النوم مقريف ونكدت على حاتم واحنا رايحيين الشركه لما زعقت فيه وصوتي لفت نظر حضره الظبوط اللي كان واقف مستني زينا الميكروباص
في الشركة كان اليوم مقرف بكل معنى الكلمه
افتكرت انه زي ما هو يوم ميلادي هو كمان يوم ميلاد وليد
رغم اننا مبنتكلمش بس بعتله مسدج فهو اتصل كذا مره ومردتش
وروحت البيت كلي كآبه مش عارف ليه حتى الاذن اللي عملته في الشركه عشان استأذن بدري واروح البنك ويمكن اتغدى بره
اتلخمت في الشغل وكان لازم افضل في الشركه
الشيء الوحيد المميز في اليوم هو اني أتأكدت اني مكتئب لأني أول ما روحت فضلت أكل في محشي لغايه ما حسيت اني مش قادر اتنفس ونمت من الساعه خمسه

الساعه خمسه
فعلا
انا مكتئب
لدرجه ان مقطعي المفضل من اغنيه الدوامه منفعش معايه

بس خلاص يوم ميلادي عدى خلاص
ويوم ميلادي الرسمي ان شاء الله هيكون مختلف
كفايه انه مش يوم شغل رسمي

خلاص مفيش كآبه

إنتحار

من وانا صغير وانا مسيطره عليا فكره الإنتحار بس ايامها كنت بفكر فيها بشكل مختلف عن طريقه تفكيري فيها الايام دي
وانا صغير كانت دايما وسيله انتحاري بسيطه وسلسه وهي اني استخدم السكين وارشقها في بطني حاجه كده زي اللقطه الشهيره في فيلم أحنا اتقابلنا قبل كده بين اروى وآسر ياسين لما كانت عايزه تنتحر وهو منعها واخد منها السكين فارتمت في حضنه عشان ترشق السكينه في بطنها لأن الغبي كان واقف وبيكلمها وبيلومها على محاوله الانتحار وهو موجهة السكين ناحيتها فحدث المشهد الرائع وشهقت هي الشهقة الأخيره

مش عارف ليه أيامها كانت هي دي وسيله الآنتحار الوحيده في نظري واختلفت السكينه المستخدمه يعني افتكرت السكينه اللي كانت ايديها لونها ابيض بتاعت الفاكهة اللي فضلت افكر في استخدمها طوال فتره الحضانه والابتدائي وبعدها السكينه الاكبر منها اللي ايديها لونها اسود اللي كنا بنستخدمها في الساندوتشات طوال فترة الاعدادي والثانوي واخيرا اكبر سكينه ذات الايد الخشبيه طوال فتره الجامعه وما بعدها
رغم اني مفتكرش الفيلم اللي رسخ جوايا فكره استخدام السكينه بس فضلت هي دي وسيلتي المفضله للإنتحار رغم بعض الطفرات احيانا زي اني افكر انتحر برمي نفسي من البلكونه او في النيل بس دي كانت افكار فرديه متكررتش لكن فكره السكين هي الي كانت مسيطره

الشيء الغريب واللي دفعني للكتابه دلوقت عن فكره الانتحار وتاريخها معايه هو اني بقالي حوالي تلات شهور الفكره بتلح عليا بصوره يوميه مستفزه ولكن بشكل مختلف

الطريقه المستخدمه دلوقت هي اني اقطع شرايين ايدي الاتنين بالمشرط واحيانا تزداد اني اقطع في جسمي كله
الغريب في الموضوع حاجتين
اول حاجه هي ان مش عارف ازاي الفكره دي مكنتش هي الملحه عليا من زمان نظرا لإنتشار المشارط في بيتنا وبكثرة وبنستخدمها في كل حاجه واحيانا بدل السكين نفسه فأزاي من صغري مافكرتش في استخدمهم وحاجه تانيه كمان كوني كائن تلفيزيوني فالفكره نفسها كانت مفروض تكون مسيطره عليا نظرا للقطة الشهيره في فيلم المراهقات واللي ياما عيطت لما اتقطع قلبي فيها وانا شايف ماجده بتقطع شراينها بمشرط حتى لو كان بمشرط حقن اللي اصلا مبيعورش فازاي اشوف ده وانا شايف البت مليان مشارط بمختلف احجامها وكمان كان ممكن استخدم المبضع بيتهيألي اسمه كده زي ما كنت زمان بستخدمه واثبت فيه المشرط عشان ابري القلم الخسب لأن البرايه كانت دايما تقصفه
وتاني حاجه هي اني بحلم بالموضوع كل يوم بعد ما حط دماغيعلى المخده حاجه كده اقرب لأحلام اليقظه بس احلام اليقظه بتاعتي حلم واحد بحلمه من سنين ومتغيرش ومش هتغير ومكنش الانتحار فالغريبه ان الموضوع يخطر على بالي طول الكم شهر الاخرنين دول كل يوم بنفس الصوره

بجد الموضوع كده مش طبيعي

العيد بطه

ياه وحشني الرغي والنهارده يوم الرغي

اولا انا مش عارف ليه الناس بيقولي العيد فرخه رغم ان العيد عندنا في البيت دايما بطه

اه والله

حاتم دايما يتريق علينا وكمان زوجه احمد اخويا بعد الجواز استغربتنا جدا

بس احنا متعودين على كده منذ قديم الازل

لازم كل عيد صغير بعد الصلاه وطبعا السلام على بابا واخد العديه المحترمه نجلس بكل وقار وادب ونحتسي مرق البط مع الجلاش باللحمه المفرومه وطبعا عزيزتي البطه

اه واللهي على الصبح

بس طبعا ماما بتغلب فينا قبلها اننا قبل الصلاه نفطر على بلح عشان السنه بس احنا مش بنقدر وبنكتفي بالمياه عشان نتفرغ بعد كده لعزيزتنا البطه نظرا لمكانتها الغاليه عندنا

*********************************

أمبارح وانا ماشي في الشارع كان ورايا واحد بيسأل صاحبه ان من زمان وهو بيسمع اغنيه صفاء السعود ويسمعها بتقول سعد نبيها كان بيستغرب اوي

وساعتها صديقي الصدوق قالي انه هو كمان كان بيستغرب لأن الطفل مفروض يتسمى على اسم بابا هو مش ماما هو

وانا قلتلله لأ يا غبي هي مش بتقول سعد ابن الحاجه نبيها هي بتتكلم عن نبي انا معرفوش بس اسمه سعد

******************************

امبارح اكتشفت اني بقول كلمات كتير وبكررها

يعني مثلا لما اتضايق من حاجه اقوله ربنا يحرقها دنيا واخره

يعني مثلا متضايق من الشغل

يبقى ربنا يحرقه دنيا واخره

متضايق من شخص فقول ربنا يحرقه دنيا واخره ورغم ان ماما غلبه فيا مدعيش الدعوه دي لكنها اكتر حاجه لازقه في لساني ولو حد بيقرا الكلام ده وميعرفنيش وسمع واحد بيقول ربنا يحرقهم دنيا واخره يعرف اني هو مقيد وانه بيتكلم عن شركته والعاملين بها

سامحني يارب

بس هما يستاهلوا

كمان من الكلام اللي لازق في دماغي جمله بكررها كتير الا وهي

اوفر اوي بصراحه

بس اوفر بتكون ممطوطه حبتين وفي الغالب الجمله بيسبقها اتنين لأ

يعني تلاقيني بقول لأ لأ أووووفر أوي بصراحه

وده طبعا واضح اني بقولها طول اليوم لأن بشوف حاجات كتير أوفر أوي بصراحه

والغريبه اني لازم اضيف كلمه الصراحه في الاخر

وطبعا كلتي المفضله اللي بيتهيألي الناس بتسمعها مني كتير هي ميرسي

ومش عارف ليه بقولها في مواقف بعدها شفت برنامج للفنانه المحترمه جدا اليسا

:)

كان بيتهيالي لطوني خليفه وكان بيحرجها بالاسئله وكانت هي بترد بسخافه فالجمهور يسقف فتلتفت ببرود وتقول بقرف ميرسي

اللي هي تحس انها بتشتمك بيها وللاسف اكتشفت ان هو اللي بعمله انا بميرسي بتاعتي

وطبعا كلمتي الشهيره بالتوفيق

اي حد بيقولي انا هعمل كذا ارد بسخافه واقوله بالتوفيق

كنت زمان بقولها بذوق وكنت بذود وراها يا توفيق لزوم القافيه بس دلوقت بكتفي بلفظ بالتوفيق

واخر حاجه فاكرها دلوقت هي لما حد يسألني ويقولي عامل ايه ارد واقوله انا حلو

كل يوم الصبح يتكرر نفس السناريو

حد يدخل يقولي صباح الخير سمسمه اقوله صباح النور يقولي انت عامل ايه اقوله انا حلو

يقولي حلو بس اقوله لأ حلو كتيرررررررر

لدرجه ان بيجيلي ناس تصبح من الادور الاخره ومنهم اللي بيغير السناريو ويبدأ معايه بجمله أنت حلو

اقوله وي حلو كتير

:)

**************************

النهارده الراجل في خطبه العيد اللي هي مفروض بيتهيالي تحس الناس على التفاؤل لاقينه اشتغل وانتوا بعد رمضان حالكوا هيبقى زفت

انتوا اصلا في رمضان كان حالكوا زفت

ودخل في الشيعه واشتغل

وقعد يقول الكلب حسن نصر نصرالله

القبيح

وانا عمال ادعي في سري ياعم الحج بلاش الكلام ده البوكس واقف على ناصيه الشارع وانا نازل من غير بطاقه مش كفايه لسه من اسبوع نازل من اتوبيس الشركه وانا محترم وبعدي اركب ميكروباص محترم الاقي واحد محترم بيقولي تعالى لحضره الظابط والاقي ظابط غــــــــــــــــــــــــير محترم قاعد في الظل وماسك كراسه والعسكري ولا المخبر اللي جراني ده ماشي يلم اي حد في اشلارع دقنه بتفكر تطلع والغريبه انه كان بيقولي يا شيخ

كنت عايز اقوله عيب عليك

والظابط اياه يالا بلاش نغلط واحنا بعد ايام مفترجه يسجل بياناتي في كراسه

واخيرا الحمد لله وبعد طول انتظار بقالي ملف في امن الدوله

لولللللللللللللللللللللللللللللللي

نرجع لخطبه العيد العصماء والشيخ مجلجل في الميكروفون والظباط من عينه الظباط اياه على اول الشارع وانا بقول يارتني كنت جبت بطاقتي معايه اعمل ايه دلوقت لو خدوني مع الموجودين وانا عندي شغل بعد شويه

لغايه ما الشيخ خلاص كل الدعاوي على الحكومه والشعب بالمره والحمد لله نجح في انه يصيب كل الموجودين بكل انواع الكآبه

بارك الله فيك يا شيخ

**************************

ماشي في الشارع عشان اروح اركب مواصلات في يوم العيد عشان الحق اجي المحروقه الشركه والبمب عمال يتساقط عليا وانا امشي افط وانط زي الفرقع لوز

وهموت في جلدي وبدعي على العيال في سري يتهدوا هما واهليهم اللي مسيبنهم علينا هو انا جسمي ناقص

وساعتها افتكرت انا كنت انا والبت زوزو بنعمل زيهم تمام وبعد نوبه حماس في فرقعه البمب وطرقعه المسدس الطلق قبل تصنيع المسدس الخرز اللي ملحقنهوش للاسف نفضل انا وهي نتناقش في جدوى اللي عملناه

وانه ازي تضييع للوقت والجهد والاهم الفلوس والافيد كان لينا اننا نجيبيلنا اتنين ايس كريم وكيس بوزو ومصاصه وناكلهم ونقضيها لعب اوله او سيجا او حتى استغمايه

فبلاش الوم العيال يمكن هما كمان بيعملوا زي انا وزوز وبعد ما يفرقعوا البمب بيفضلوا يحاسبوا نفسهم ويقولوا ان العيد الجاي مفيش مفرقعات

****************************

وانا جاي الشركه الصبح فضلت ادعي ان تحصل اي كارثه في المعدات اللي كانت نازله تقيس ضغط البئر عشان مقعدش اشتغل عليها لأني كنت حاسس بالقهر انهم جايبني في العيد واول ما وصلت اشلغل لاقيت ان المعدات اتقطعت وسقطت في البير

هاهاهاهاهاهاهاهاهاهاهاها

انا شرير

اليوم الخامس والعشرون

النهارده في المترو شفت حاجه غريبه
نظرا لدور البرد الرهيب اللي اصابني على حين غره واللي اشك انه يمكن يكون وراه الفيروس المرعب وحديث الساعه كنت في المترو واقف مش شايف قدامي وضارب وشي في الارض عشان مش قادر اقرا في المصحف في حالتي الشنيعه الفظيعه دي
فاذ بي اجد جزمه رجالي بني غامق في بني افتح استغربت شكلها ورغم انها كلاسيك بس عجبتني فكملت صعودا بعني الاتنين لاقيت بنطلون كلاسيكي بدرجه من درجات الرمادي الغامق وكملت فلاقيت الحزام احدى درجات اللون البني ومن غير ما أكمل فأكيد لازم يكون لابس على ده كله قميص فيه خطوط من الابيض محدده باللون البني

كان لابس اللبس ده جدو
مش جدي انا طبعا
بس هو اي حد كبير في السن عندي يبقى جدو
على اساس اني انا لسه صغنون مش خلاص كلها ايام وهكون سبعه وعشرين سنه ولا حاجه

المهم كانت واقفه قدامه الليدي تبعه
تيته
وكانت لابسه جزمه من جزم الباليه البني وجيب بني محروق وبلوزه بني فاتح وحجاب بدرجه من درجات اللون البني
بس مش هو ده اللي خلاني اركز طبعا في وسط مااانا مريض ومش قادر اقف لكن الوضع اللي جدو وتيته كانوا واقفين عليه هو اللي عجبني وشدني وخلاني انسى المرض
كانت تيته بتسند بضهرها على باب المترو اللي مش بيفتح وجدو بيسند بايديه الاتنين حواليها عشان محدش يخبط فيها بس بيتهيألي أنه كان بيتلكك عشان يكون قريب منها
وتيته كمان كان بتلف ايديها حوالين وسط جدو وكانهم هيندمجوا أو أندمجو في رقصه فالس مش ممكن تنتهي وبيحطموا فيها كل القيود من سن ومرض وترهل في الجسم
والاجمل الابتسامه اللي كانت على وشها
حاجه كده زي ابتسامه طفله جالها حالا هديه اتمنتها شهور وحضنت هديتها وعلى وشها كل الرضا والسعاده
او ابتسامه طفل شقي قرر ابوه البخيل اخيرا انه يوديه الملاهي ينطلق فيها ويخرج طاقته

وسرحت وفضلت افكر
ياه هو في كده
طيب ياترى قصه حبهم بدأت قبل الجواز ولا بعده
طيب ياترى هو مقدر النعمه اللي هو فيها والابتسامه المرسومه على وشها منوره
وياترى هي مقدره حبه ده ورغبته في انه يفضل قريب منها ويحميها وهو بالكاد بيستطيع يقف على رجلاه

ياترى ممكن اعيش واشوف اللحظه دي وانا بطلها وبالذات لأن اللون البني بيليق عليا حبتين

اليوم الثاني عشر

أمبارح اتأكدت أني مش كائن ليلي
لما كنت في الشركه امبارح بليل وفجأه لاقتني فصلت تماما
رغم ان بالنهار والواحد صايم مش بيبطل حركه ومش بيفصل بس بليل والواحد شبعان ويفصل خالص ده تفسيره الوحيد اني كائن نهاري


كنت بفتكر شهر تسعه من الشهور المحببه ليا
وبالذات ان امبارح كان عيد ميلاد واحد صاحبي اي نعم هو مش بيحب عيد ميلاده بتاع شهر تسعه ده وبيحب اكتر بتاع شهر سته بس مش مشكله
والنهارده عيد ميلاد أخويا الصغير وبعده بخمية أيام عيد ميلاد أخويا الكبير
ومش عارف لو فكرت تاني هلاقي اعياد ميلاد مين تاني الشهر ده
بس امبارح افتكرت ان في الشهر ده من سنتين وتحديدا يوم واحد وعشرين حصلتلي ازمه كبيره عانى معايه فيها اشخاص كتير
وكانت لسه مدونتي في بدايتها ايامها وكنت لسه تحت تأثير الصدمه
او هكذا يخيلي

اليوم الحادي عشر

خطبة جلسة الأستراحه في صلاة التراويح أمبارح كانت عن الغيبه والنميمه

واد ايه ذنبهم كبير

وساعتها فضلت افكر

هو شكوتي من زمايلي تعتبر ايه

اه انا برتاح منها وبخرج اللي جوايا

بس برضه

الواحد يبطل يتكلم عن حد احسن

فيها ايه لما الواحد يفضل طول الوقت ساكت