بقالي فتره بتفرج على المسلسل يمكن من اسبوع وقدرت اخلص تقريبا نص الموسوم الاول وبعدين امبارح لاقتني بفكر في كل الابطال اللي عندهم ظواهر خارقه دي وياترى لو هختارلي ظاهره منهم هتكون ايه
يعني مثلا ممكن اكون زي كلير البنت اللي عندها القدره على اعادة بناء جسمها ذاتيا يعني ترمي نفسها من فوق كوبري وتنزل مفيش ولا جرح واحد ولا كسر واحد ايديها تتقطع وفي لحظه يطلعلها واحده غيرها مش بس كده انت ممكن تطعنها بسكين وبرضه ميحصلهاش حاجه يعني تفوق المرأه الحديديه يعني في الحاله دي ماخفش اطلاقا لما يكون وقت المرواح في الشغل وكل الاسنسيرات مشغوله وانط انا من السبعتاشر وانا واثق اني هنزل سليم
او ممكن اكون زي هيرو الموظف الياباني اللي اصلا شكله طفولي بس عنده ميزه فظيعه بيقدر يتحكم في الزمن وبالتالي ممكن يسافر عبر الزمن والاهم لما بيوقف الزمن ويقدر يتحرك هو يعني في الحاله دي ممكن وانا في الشغل وطلعان عيني وحاسس اني عايز وقت اخلص فيه المهمه تبعي اوقف الزمن واخلص شغلي وارجعه تاني وبكده محدش يلومني على التأخير
أو ممكن أكون زي ناثان واقدر اطير وان كان الطريقه اللي نفسي اطير بيها مش تشبه اطلاقا الطريقه اللي هو بيطير بيها لنه بيطير بطريقه اشبه بانطلاق الصاروخ بس حتى لو مش هقدر اطير زي العصافير زهي دي الطريقه اللي بحبها في الطيران فممكن استخدم طريقه ناثان في الهروب من اي مشكله وخصوصا المواصلات الزحمة
أو ممكن اكون زي زاك اللي بيقدر يرسم المستقبل وفي الحاله دي يمكن استريح وان كنت اشك برضه
أو ممكن اكون زي مات باركمان واقدر اقرا الافكار يعني حاجه كده زي فيلم ميل جيبسون بس على اكبر لأنه مش بس هيقرا افكار النساء لا ده هيقرأ كل الافكار وامشي اسمع اصلي بحب اعرف اوي
أو ممكن اكون زي هايدن واقدر املي اوامري على الناس وهما ينفذوا اي حاجه اطلبها منهم يعني اقول لواحد يمين يروح يمين اقوله شمال يروح شمال ودي طبعا اكبر استخدام ليها هيكون في الشغل عشان اخلي مديري ميهزئنيش
أو ممكن اكون زي دي ال الاخر اللي عنده قدره على اختراق الاجسام يعني ساعتها مفيش باب مقفول هيقف قدامي وان كنت مش عارف هستخدمها ازاي بس اكيد هلاقلها استخدام
أو اكون زي تشارلي اللي بتتعلم اي حاجه بمنتهى السهوله بيتهيألي كان في فيلم لجون ترافولتا مش فاكر اسمه كان كده بس ياحرام كان عنده ورم في المخ بس الخاصيه نفسها تحفه يعني الواحد ممكن يتعلم حاجات كتير جدا في وقت صغير جدا
او ممكن اكون زي بيتر اخو ناثان اللي بيقدر يكون عنده اي اصيه من دي بس في حاله تواجده مع الشخص اللي عنده الخاصيه وان كنت مش عارف لو انا زي بيتر هجيب منين الناس الخارقه دي؟؟؟؟؟
2 comments:
بصراحة مش بحب النوع دة من المسلسلات. بس أكيـد مش هنكر إن موضوع الصفات الخارقة دة بيخطر على بالي كتيــــر جدا. بس معظم الوقت بتكون رغبتي في التحلي بالصفات دي رغبة مؤقتة للموقف مش أكتر
أكتر حاجةكنت بتمناها كتير بتكون فعلا القدرة على قراءة أفكار الناس.. بس بعد التفكير في الموضوع بقيت أحس إني مش عايزة فعلا أعرف لأني هكتشف خداع أوي حواليا ودة مش هيكون في صالحي بأي حال من الأحوال
محدش عايز يكره حياته يعني :). هي مش ناقصة أساسا
وقف الزمن من الحاجات اللي بتعجبني في التمثيلية بتاعة الساحرات:). بس وانت بتوصف ضغط الشغل توقعت إنك هتقول إنك هتوقف الزمن عشان تصرخ بأعلـــــى صوتك..بعدين ترجع الزمن والدنيا تاني عادي حواليك بس تكون خرجت الشحنة
تشارلي..أو ترافولتا في
phenomenon
جميلة الخاصية بتاعته.. بجد مميزة جداااا وممكن تشدني أكتر من كل اللي فاتوا. بس ساعتها هتفوتك متعة التعلم. بالنسبة لي يعني هي ساعات فعلا فيها متعة
وحضرتك..أنهي خاصية تتمناها أكتر؟
عزيزتي الفراشه
ليه دي مسلسلات كويسه ده انا حتى المسلسات دي بهتت عليا
انا برضه كنت هختار قراءة الافكار بحبها اوي وكانت اول صفه اختارتها بس من يومين كنت بسحب فلوس وبعد ما حطيت الايه تي ام في الماكينه احلفها تخرج الفلوس لا يمكن طيب الكارت يابنت الحلال ابدا فساعتها عملت زي ابن الراجل اللي بيخترق الاجسام الواد برضه خارق بس مش اتكلمت عليه الواد ده بقى يحط ايده على اي ماكينه فلوس ويغمض عنيه وبعدين يكتب رقم الفلوس اللي عايزه الماكينه تخرج فلوس من غير لا كارت ولا بتاع والواد سحب فلوس في العبيط فعملت زيه وغمضت عيني وحطيت ايدي على الماكينه بس لما فتحت عيني لاقيت بتاع الامن متربصلي
تفتكري من اللي بيقروا الافكار واكتشف نواياي
Post a Comment