محكمه

أزاي بتحكم على حد

أزاي الواحد يكون وجه نظر عن حد معين
مقصدش وجهة النظر السريعه اللي الواحد بيكونها لأسباب وقتيه ولكن أقصد وجهة النظر الدائمه اللي على أساسها هتضطر تتعامل مع الانسان ده لفتره طويله بعدها على أساسها

من وجهة نظري الضعيف أنها بتكون مبنيه على التصرفات اللي بنشوف الآخر بيتصرفها سواء معانا أو مع المحيطين بينا وعشان كده بيكون كويس أن الواحد يخرج شويه من الموقف ويبص عليه وهو بيحصل قدامه من غير ما يشترك فيه عشان يقدر يحكم على الأفراد اللي جوه الموقف بس ده بالتاكيد مش رأي الناس كلها

لما بتوتر بلعب في الجزء الأخير في أذني
لما بتضايق بلعب في شعري بحرجه عصبيه
بنفض هدومي من تراب وهمي لما أحب أهرب من الكلام
بقول أني عايز أسافر لما بكتئب

كلام كتير عني بيتهيألي عدد اللي يعرفوا اكتر من عدد الجاهلين بيه وبغض لانظر أني دلوقت مش بقيت عارف فين الخط الفاصل اللي مفروض كلامي يقف عنده إلا أني عارف حقيقه اني قلته كتير ولناس كتير وده كنت بشوفه شيء لطيف اني أكون كتاب مفتوح عشان ميتهمنيش حد في يوم بأني غشاش أو كنت بكدب لأني رغم كل الشر اللي جوايا بحب أن الشر ده الناس يركزوا وهما بيشوفوا بس الوحش هو لما تلاقي حد يلاقيني بلعب في شعري فيقولي أنت عصبي ليه وبرضه مش ده تحديدا اللي يضايق ولكن اللي يضايق لما بعدها يزود ويقول انت قلتلي كده

هو مفروض يبني رأيه فيا ويقرا تصرفاتي من كلامي طيب طالما ده انا مبطلش كلام عمري عن اد أيه أنا لطيف وظريف رغم ان ده عكس الحقيقه

السؤال هو ازاي الواحد يبني رأي عن الآخر وهبدأ بنفسي

بيتهيألي زي ما قلت كل الأراء الدائمه بنتها من مواقف وعشان كده في مواقف مهما طال الزمن مش بتتمحي بسهوله من الذاكره لكن ونخلي بالنا من لكن دي لما بيكون الرأي عن حد مش جمعني بيه موقف بيكون طبعا كل رأي من كلامه بالأضافه للأحساس الداخلي يعني مثلا لما قابلت حسين أول مره كنت أعرفه قبلها بكم ساعه وكل اللي عرفته عنه قبل ما أقابله كان من الكم ساعه اللي دردشنا مع بعض فيها ولما قابلته من شكله اولا ومن طريقه كلامه ثانيا ومن كلامه نفسه ثالثا ورابعا حكمت عليه أنه ممكن يكون كويس واني أحب أعرفه اكتر وعشان كده لما قرر هو أن ميكنش في معرفه مكنش اللي تعبني انه هو اللي أخد قرار أتعودت على طول أني أخده لأني بكون في العادي الأسرع في الزهق ولكن لأني كنت لسه محتاج أعرفه لسه محتاج أديله فرصه انه يشوفني يمكن يشوف خير مع الشر وكنت محتاج كمان أني أعرفه أكتر يمكن يكون مش أمين عليا

ولما عرفت أحمد عبدالله كنا زملا لفتره طويله ولما بقينا في يوم وليله اصحاب ابتديت اتاكد من بعض أرائي عنه وأبتديت أغير بعضها بناءا على المواقف الحياتيه ولما كنا في أول مشكله جمعتنا فضلت علعى أيماني بأني نظرتي ليه كانت صح من البدايه لكن لما أخدت وقت وبعدت وهو اخد وقته وبعد وحاولنا تاني نشوف لأقينا كل واحد شايف التاني من نظره مش اللي هي عليها الأمور في الواقع

يعني النظره المبدائيه مش شرط تكون هي النهائيه بعد المعرفه من قريب بس كمان مينفعش ان يكون كل اللي بنشوفه في الآخر هو من كلامه عن نفسه لأني من أكتر الأشخاص فشلا في التعبير عن نفسي

يمكن يكون هنا في العالم الأفتراضي الناس بتكون مطالبه أنها تبني رأيها عن الآخر من بس كلامه عن نفسه أو مواقف بيحكيها من وجهة نظره برضه وبكده يكون كلامي بيقول أن في العالم الافتراضي بيكون كل الأراء هي أراء مبدائيه بس برضه في كتير ممكن تكون صح لأن مهما كان الأنسان حريص وهو بيحاول انه يرسم خط لشخصيته قدام الناس على النت هيغلط في كلمه أو في كومنت أو في طريقه حكايته لموقف وهيبان جزء من اللي بيحاول يخبيه
وكمان حاجه أهم اننا هنا مش في موقع اننا نحكم على بعض أحنا كل واحد هنا عشان عايز يكون هنا مش عشان عايز يكون ليه تأثير على حد معين او طريقه معينه حد يبصله بيها

أفتكر كنت ماشي في الشارع من كم يوم وكالعاده راجل كبير إلى حد مركز معايه أوي وانا جاي من بعيد والشارع مكنش زحمه ده مكنشي فيه غير انا واللي ماشي معايه وفي الظروف العاديه لما أقرب منه وهو لسه متنح كده كأنه شايف العجب العجاب لمجرد أن ممكن تكون مشيتي في نظره مش "حلوه" أو لأن لون شعري هو شايفه مش طبيعي او نتيجه تدخل خارجي كنت بس هكتفي باني أعلق وأقول للاسف مفيش معايه صوره لأن زي ما هو من حق أنه يبص أوي كده لدرجه ممكن تجرح بيتهيألي أنا كمان ليا الحق أني أكلم "نفسي" وأنا ماشي في الشراع وأقول اللي يعجبني

مكنش الموقف ده هو اللي غريب كان موقف اللي معايه هو الغريب لما قال فجأه وبتون صوت "مميز" السلام عليكم وكان تعليقه بعدها أنه قال كده عشان شاف الراجل بيبص بصه مش كويسه فقال "يخوفه"

ونفس الشخص كان بيعلق على تصرف تاني مني في يوم تاني لما كنت ماشي وانا لابس السويت سيرت في دراع وقالع التاني وسالني هو أنت نص حران نص سقعان عشان تلبسه بالشكل ده قلتله لو مش عاجبك قولي انه مش عاجبك على طول ولو عايز تسمع تفسير أسألني وأنا أجاوبك أو ما اجاوبكش ولو جاوبتك كنت هأقولك لأني معايه شنطه بندق في أيد وملف في الأيد التانيه وكتف عليه الشنطه اللي على ضهري وماشيين بقالنا نص ساعه فبالتالي حسيت بالحر ومش هقدر أقلع التي شيرت لأني مفضلش فيا أصبع وحيد ممكن أمسك فيه بالسويت شيرت وبالتالي لبسته بالشكل ده

الغريب برضه مكنش الطريقه اللي عبر بيها عن "أستيائه" من طريقه لبسي ولكن انه بعدها بيقولي وترجع تقول الناس متنحه ليا كده ليه وكان ببساطه ردي ان من حق كل واحد انه يتنح ويمكن من حقه أنه يعلق طالما تعليقه موجهوش ليا مباشره لكن مش من حق حد أنه يعمل أكتر من كده

ها أنت بتحكم على الناس أزاي