كتبت مره زمان أوي عن اول مره وان ازاي الواحد مش بيكون فاكر أول مره بس النهارده حاجه تانيه
لسه فاكر لما أشتغل حاتم اول مره كنا في شهر أبريل وكان تاريخ أستلامه للشغل يوم سته أبريل سنه ألفين وسته وأحتفالا بالمناسبه دي كنا في دريم بارك واختارنا اليوم من غير تفكير وبعد ماروحنا اكتشفنا أنها كانت الجمعه الأولى في شهر أبريل
ولسه فاكر أول مره أشتغلت فيها وكان اول يوم في شغلي يوم سته أغسطس ألفين وسته وكان هو في الشغل ولسه فاكر لما سبت الشركه وكان آخر يوم في شغلي فيها يوم تلاتشر نوفمبر في نفس السنه واول يوم ليا في الشغل الجديد كان يوم خمستاشر نوفمبر ولسه فاكر لما وصلني قرار نقلي من الشغل في الموقع للشغل في القاهره وكان استلامي في القاهره يوم الأحد واحد أتنين سنه الفين وسبعه
ولسه فاكر لما حاتم قرر يسيب شركته بشكل نهائي وكان قرار استقالته يوم عشره يونيو سنه الفين وسبعه وبعدها امتحاناته عندنا بسلسلتها الطويله وكمان بعدها شغله في شركه تانيه في ديسمبر الفين وسبعه
وقرار تعيني واستلامي اول يوم شغل وتحديدا يوم عشره تلاته الفين وتمانيه
وبعدين استلام حاتم عندنا في تمانيه الفين وتمانيه
واخيرا النهارده اول يوم في استلامه العمل كموظف حكومه بشركتنا
ياه تاريخ طويل
4 comments:
:))
غريبة أوي حقيقي
كنت لسة بفكر أكتب في مدونتي المغلقة أكتر شهر بحبه و أكتر شهر مش بحبه
و الأحداث اللي فيهم طبعا
حلو إنك تكون فاكر الأحداث بالأرقام :). أ،ا معظم الأحداث المؤثرة عندي برده فاكرة تواريخها... بما فيهم كل شغل اشتغلته و يوم ماسبته :). مع تمنياتي إن تكون كل التواريخ اللي هتفتكرها في المستقبل هب تواريخ سعيدة وبتفكرك بذكريات جميلة وأيام نجاح
عزيزتي الفراشه
طيب وليه في المقفوله عايزه تحرمي الناس من انهم يشوفوا حاجات بتأثر فيك سواء كويس او وحش
:)
شرير انا معلش
تعرفي انهم دلوقت في الشغل بقى ممكن حد فيهم يقول للتاني انت شرير على فكره زي ما انا بقول على نفسي
أنا ساعات بحس اني عندي هوس الأرقام
بفضل أفتكر في ارقام غريبه رغم اني ممكن انسى حاجات مهمه
يعني مثلا شهر ابريل في يوم اتنين كتب كتاب زميل في اشلغل وفي يوم واحد وعشرين عيد ميلاد واحد كنا في ثانوي اصحاب وفي يوم اتنين وعشرين عيد ميلاد ابن اختي ودي التواريخ اللي فاكرها دلوقت
على الهامش
مش اقدر اوعد بموضوع التواريخ السعيده لأني بطبعي شخص كئــــــــــــــــــــــــيب
ازيك
وحشتنى مدونتك
اسفه انى غبت كتير بس ياترى كنت بتقول كانت غمه واتزاحت ولا كنت بتفتكرنى وتقول فينك يابنتى؟ اممممممم
انا يمكن مستغربه انك فاكر التواريخ دى كلها ده انا مش فاكره فى حياتى كلها غير كام تاريخ والحمد لله كلهم وحشين واهمهم عيد ميلادى اللى بعد اسبوعين ولا حاجه :)
تعرف وانا بكتب حصاد 2008 عندى كنت فاكره تواريخ كتير بس مارضيتش اكتبها؟ :)
بالمناسبه هو حاتم ماله يامحمد وياترى هو عامل كده ليه؟
ممكن لو سمحت تطمنى عليه لانى بحاول اوصله وفشلت بكل الطرق ودلوقت بعدت نفسى علشان مااكونش تقيله
هحاول اقرا اللى فاتنى لو مش عندك مانع؟
عزيزتي حبيبه
ياااااااه فينك من زمان؟
:)
أنا عرفت انها كانت مشكله نت مش اكتر اي نعم عرفت متأخر بس عرفت ثم كنت بقول تلاقيها الأمتحانات هي اللي شغلاكي شويه
أنتي من مواليد شهر أبريل؟
كم أبريل؟
هو بخير الحمد لله
تشرفي البوستات طبعا
Post a Comment