في البيت

أخيرا في البيت في يوم شغل وفي وقت شغل ومن غير سبب

مش عارف ليه عملت كده بس يمكن لأني وعلى عكس ما بحب أعمل أخدت قراري امبارح وانا في لحظه ضعف

فجأه أمبارح حسيت بالضعف الشديد

مش عارف الم عيني كان هو السبب الأول

ولا اعراض البرد اللي ممكن تكون سبب هي كمان

ولا الخوف من مواجهة احمد بعد اللي حصل امبارح

ولا نوبه العياط اللي فتحت فيها امبارح ولا استغربت بعد ما خلصتها هي الدموع دي كلها بتيجي منين وممكن يحصل جفاف بعد نوبه عياط استمرت ساعات وبسببها نمت وعيوني ورمه شويتين

ولا يمكن يكون رغبه في الراحه وعدم التفكير

صحيت قبل ميعادي الطبيعي بس كنت خلاص أخدت قراري من بليل ان مفيش شغل النهارده

اتصلت بمديري الساعه سبعه ونصف رغم اني كنت ساعتها عايز اتراجع وانزل اخد تاكسي واوصل الشغل قبل ما حد يحس بغيابي

بس كلمته وقلتله اني تعبان وحتاج اليوم اجازه

قالي ومن غير اجازه كمان ده انت تأمر

كان نفسي اقوله لأ من فضلك اعمله اجازه انا مش عايز دلوقت بالذات اي خدمة من اي حد انا كل اللي عايزه حاجه من حقي انا رصيد اجازاتي ضاع السنه اللي فاتت من غير ما اخد منه ولا يوم والسنه دي عندي اكتر من شهرين اجازه وبيتهيألي برضه هيضيعه لأني مأعتقدش أني ممكن أكررها تاني

بس رديت وقلتله شكرا سلام

بعدها بساعه لاقيت شريف بيرن عليا

هو الوحيد من زمايلي اللي اتصل لغايه دلوقت

مردتش بس بعتله رساله اني مش هقدر ارد وانه ميقلقش انا بخير بس مش عايز اتكلم

بعدها بشويه صغيره لاقيت بابتي بيتصل

مش عارف ليه بقول عليه انه بابا رغم انه اكبر مني بسنتين بس

يمكن لأنه فعلا يدي احساس بالأبوه

كنت طول الوقت اقول هو بيتصرف وانا بتصرف كأننا قريبين جدا من بعض بس كنت بشوف اننا برضه مش قريبين للدرجه فضل يتصل اكتر من عشر مرات ورا بعض بدون انقطاع لدرجه استغربتلها اوي

وبعدين بعتلي مسدج بيساحلفني اني اطمنه عليا لانه قلقان عليا موت-على حد تعبيره- وعايزني ارد او اتصل عشان يطمن

مش عارف ليه مبعتش رساله يمكن قلقت اني ابعت رساله فيتصل تاني يمكن محبتش اتكلم لأني لسه مش عايز اتكلم مش عارف

حتى ما اتصلتش بحاتم قلت اسيبه لما يصحى لوحده لأن مش أكيد اننا ممكن نخرج في اي وقت النهارده وانا اصلا مش عارف اذا كنت هقدر ولا لأ بس بيتهيألي مفروض اشوف حاجه لعيني الأول لأني حاسس انها مش طبيعيه

مش عارف

كل اللي اعرفه اني من الصبح قدام بندق بتفرج على مسلسل جرايز انتومي بدون انقطاع

ودلوقت كان في مشهد غريب عن ان الاشخاص المتوترين لو حد حضنهم ه بيهدي الجهاز العصبي

وومعرفش اذا كان ده طبيا صح ولا لأ بس أهو أتقال في مسلسل أنه شيء مهدىء ان الواحد يتحضن ومش غلط ان الواحد يحس انه فعلا محتاج حضن

محتاج حضن كبير أوي