أنا مين؟

ممن كم يوم حصل معايا موقف غريب كنت بتمشى مع "زميل من الشغل" وبالصدفه بحكي عن موقفين أتعرضت ليهم في المواصلات
الأول كان في ميكروباس لما دفعت تلاته جنيه للشخص اللي قدامي اللي هما أجرتي وأجره أتنين جنبي وقلتله تلاته مع ملاحظه أني لما قلت تلاته كنت بختصر جمله بتقول أجره تلاته أشخاص ومع العلم برضه ان الميكروباس في ناس بتدفع أجره أقل لو نازله بدري عن نهايه الخط ومع ملاحظه برضه أن الناس دي يااما بتدفع القيمه الأقل والسواق يفضل يهاتي مين نازل بدري ويصدعني او أن اللي هيدفع اجره أقل هيفضل من قبل ما يمد أيديه في جيبه يقول أنا هنزل بدري انا هدفع أقل أنا عايز الباقي لغايه برضه ما أصدع –بيتهيألي بيكون ده غرضهم - المهم الأستاذ اللي قدامي لما أيديته التلاته جنيه قالي تلاته أيه
فانا بكل برأه الأطفال اللي في عنيا وفي صوتي قلتله تلاته بني آدمين
أنا غلطت؟
أنا تخيلت أنه هو لما قال تلاته أيه؟
كان بيختصر جمله بتقول تلاته تصنيفهم أيه؟
هو يمكن يكون كان بيختصر سؤال بيقول تلاته أيه هو المكان اللي هينزلوا فيه؟ بس أنا معنديش سرعه البديهه الكافيه أني أعرف أن كان ده غرضه من السؤال
الغريب مش الموقف الغريب كان رد فعل زميلي لما قالي والراجل ساكتلك قلتله لأ أعتذرلي وقالي أنا مقصدش قالي ده راجل محترم حد تاني كان عمل فيك وسوا
ليـــــــــــــــــــــــــــــــــــــــــــــــــه؟
هوأنا غلطت فيه بجد


التاني كان في المترو وكنت بركب المترو وكانت الدنيا شويه زحمه وأنا كالعاده أحب أركب براحتي لاقيت واحد بيزقني جامد وبيقولي يالا بسرعه فقلت في ناس قدامي ودخلنا وبعد كده برضه لسه بيقول ولا أنت مشغول باللي في أيديك فألتفت ليه وقلتله بصلي قلتلك في ناس قدامي وقلتلها براحه أوي كأني بعلم طفل أزاي ينطق الكلام أتدايقت من نفسي بعدها لأني كنت متضايق وسمحت لنفسي أني أخرج نرفزتي على واحد غريب ملوش ذنب في أني مردتش أركب من الباب اللي مش مخصص للصعود رغم أنه ممكن يكون كان أروق وملوش ذنب أنه مش فارق معايا اني أركب المترو ده ولا اللي بعده ولا كمان ليه ذنب أني مش بحب ازق الناس اللي قدامي عشان هو بيزقني
الغريب مش الموقف ولكن رد فعل زميلي لما قالي هو انت متعرفش تدخل دخله فلان وفلان ده زميلنا اللي من أصل صعيدي واللي أحد جدوده كان خُط الصعيد الشهير واللي يقال أنه يمتد أصله لأبعد من ذلك بكتير
فقلتله أنت ليه كنت عايزنيازعق في الراجل وهو مغلطش غير في أنه تخيل أنه لما يزقني ممكن أزق اللي قدامي وانا مكنتش هعمل كده وليه عايزني اتصرف زي حد تاني حتى لو في نظرك التصرف التاني هو الأوقع

بس في الحقيقه دي مشكله عندي

انا مقتنع تماما بالتخصص والتميز
كل واحد وليه الطريقه اللي بتميزه وليه الشخصيه اللي بتخليه هو مش حد تاني

انا يمكن أكون في نظر أهلي الولد المميز لكوني واحد من أصل تلاته كنت أكثرهم اتماما بدراستي واقلهم مشاكل جوه البيت وبره البيت
يمكن أكون في نظر ناس الولد الدلع اللي تصرفاته يمكن تكون شويه مش على قد سنه

بس هو ده انا فعلا؟
أنا معرفنيش وبالتالي صع أني أدعي أني أعرف أجابه
بس قبل ما حد يلومني على تصرف يشوف الأول هو ليه الحق أنه يكون بيحاسبني

كنت لسه حالا في أجتماع من اجتماعات ادارتنا الحبيبه
نفسي اصرخ
آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه

خلاص أرتحت

نفسي أطلع رحله من زمان بفتقد أحساس الرحله
نفسي اقعد قدام البحر من الصبح لبليل

فقدت الرغبه في الكتابه بعد الأجتماع