من أمبارح وأنا عايز أكتب عن الأضراب
بس مش عارف هقول ايه
أنا مع الأضراب بس أنا متأكد أني مش هأُضرب
مش عشان شيء محدد
يمكن أنا سلبي بطبعي
يمكن لأني مش بحيب أكون بره الشركة
أنا حتى أيام الجمعه والسبت بكون في الشركة حتى لو مش عندي شغل
مش عارف كنت أمبارح بفكر أني ممكن أعمل أضعف الإيمان وأصومعلى الهامش
قلب بنبض شفت عندها من يومين بوست أول أحساسي بيه انه وجعني أوي
كان بيعبر وبأختصار شديد عن أكبر مشاكلي وكان نفسي أكتب عنه بوست كامل بس وكعادتي دائما بحب أقرا نفس البوست أكتر من مره النهارده مش لأقيته
13 comments:
بالنسبة للبوست بتاع قلب ينبض الله أنا كمان كان رد فعلي نفس اللي بتقوله، و شفته أكتر من مرة بس مش عرفت أقول حاجة غير إني بوافقها أوي
بس مش عرفت إنها شالته غير منك دلوقتي
:(
يارب تكون كويسة ويكون الموضوع ومافيه إن البوست مش عجبها أوي
أما عن الإضراب..فأنا متأكدة إني حتى لو كنت اتفقت أقابل أصحابي يومها فأنا هلغي اتفاقي..أيوة مش هعتصم، بس على الأقل الأقل منزلش من بيتي و أشارك "بأضعف الإيمان" كدة
تحياتي.. ومش تبقى تتأخر كدة في بوستاتك
اول حاجه السلام عليكم
بالنسبه لموضوع الاضراب انا شايفه انه غير مجدي ومش هايحقق الهدف المنشود منه وهو الحد من زيادة الاسعار ووقف استهتار الحكومه فينا
وعلشان دا يحصل الموضوع لازم يستمر لفترة اكبر واطول
بس دا مستحيل لازم نراعي ان في مستشفيات ومرضي ومصالح ناس هاتتعطل في اليوم دا
انا واحده من الناس ها اكون بمتحن ميد تيرم طيب ما انزلش ازاي من بيتنا
بالنسبه لموضوع البوست
انا كتبته لحظة انفعال ولحظة صدق ولحظة حسيت فيها بكل كلمه كتبتها في البوست
وحذفته علشان ماحبيتش اقلب علي الناس مواجع ولا اقلب علي نفسي
بس انا عاوزة اقولكوا علي شعور واصلني دلوئتي ان انا بحبكوا اوي
عزيزتي الفراشه
أزيك أيوه كده ده اليوم المثالي للشغل
الواحد يوصل الشغل الصبح يلاقي تعليقات
لأ لأ لأ أنا مقدرش على كده
:)
بالنسبه لبوست القلب النابض أنا حتى كنت بكلم حاتم أمبارح وهو كمان كان مستغرب من الحذف
بس هي موجوده معانا هنا في التعليقات وهنستجوبها
أما عن الأضراب فأنا بصراحه مش عارف
أنا حاولت أمبارح ألف على مكاتب زمايلي واللي مش كان عارف عرفته واللي كان عارف حاولت أحفزه بس هما مش سألين فيا خالص
أصل كمان هما شايفين أني غريب
وشايفني غريب لسبب تافهه والله
أصل أحنا عندنا واحد أسمه الجزار-ده أسم الدلع- شفت معاه كتب منها كليله ودمنه والجريمة والعقاب لدوستويفسكي
فأنبهرت وقولتله دوستويفسكي؟
أنا مكنتش متخيل
وكام بديهي عمرك شفتي جزار بيقرا لدوستويفسكي
حتى لو كان جزار ومهندس
فمن يومها أنكشف ستري وعارفوا ان ليا اهتمام اخر بخلاف الشغل والنوم
أصل هما كانوا متخيليين أن أهتماماتي كلها شغل ونوم
ياه أنا برغي من الصبح هرجع تاني بس بعد ما أحكي شويه مع ذات القلب النابض
تحياتي
اه كنت هنسى ميرسي على الهتمام ده انا قلت الناس لما تصدق مقيد يبطل كتابه
على العموم أنا مستنيكي ترجعي للخدمة أنتي كمان وليكي عليا أكتبلك كل يوم كومنت
عزيزتي ذات القلب النابض
عليكم السلام ورحمة الله وبركاته
ينفع كده؟
:)
طيب نتكلم على الأضراب الأول
أنا مش بطلت لف في المدونات بقالي يومين بدور عن كل ما يتعلق بالموضوع
تصدقي أني أمبارح لاقيت مدونه بيطالب فيها مجموعه من الناس بأن المطالب يكون من ضمنها مطلب ينفذ على المدى القصير
لأن كل المطالب الأخرى محتاجه وقت
وتخيلي أن مطلبهم القصير الأمد ده هو
إقالة حكومة نظيف!!!!
أما عن المصالح فأنا كنت قريت اني ذوي المناصب الحساسه ممكن يمارسوا عملهم ويعملوا إضراب لجزء من اليوم
والطلبه اللي عندهم أمتحانات يمتحنوا وبعدين يعملوا إضراب
أنا مش عارف بصراحه بس أنا برضه كنت شايف أنها لو اتنفذت هيكون أكيد ليها تأثير حتى لو تأثير بسيط
وأنا بصراحه مش كنت بحب المدونات اللي بتعارض وتقول الشعب عمره ما هيتفق
لأن ببساطة اللي كتب الكلام ده مقعدش مع الشعب كله
وحتى اللي شايفين ان الحركة ممكن تفشل عشان الشعب مش كله هيعمل إضراب
فدول الأول يكونوا متأكدين من نفسهم وبعد كده يدوروا على الباقيين
وزي ما قلتلك انا بجد مش عارف
اما بقى عن موضوع البوست
كان واضح جدا أنك كنتي صادقه عشان كده كلنا أتأثرنا-حاتم وفراشه وانا أقصد-
أنا اتفق معاك انك ممكن تمسحيه شعان متقلبيش على نفسك المواجع بس عشان متقلبيش على الناس مظنش
وربنا يارب يوفقك في الأمتحان وعقبال
final
ان شاء الله
ومش هنسأل على أخبار نتيجة التيرم الأول هنستنى أنتي تقولي
تحياتي
على الهامش هو أيه أخبار نتيجة التيرم الاول؟
سلام عليكم
معلش ياريت تسمحلي أقول "للقلب النابض" حاجة عن طريق البلوج بتاعك، و هي إن الجمعية العمومية للأطباء طول دراستهم للإضراب اللي كانوا ناويين يعملوه كانوا بيستثنوا أقسام الطوارئ في المستشفيات، ونفس الكلام في إضراب دكاترة الجامعة اللي فات، الأطباء اللي في الخدمة ساعتها كانوا مش مشاركين في الإضراب..فعادي يعني
بالنسبة للمصالح اللي هتتعطل... :) أعتقد إن هو دة معنى الإضراب وهي إنك تحسي إن فيه فرق في اليوم دة وإن مفيش حركة كتير في البلد وبالتالي الموضوع يكون مؤثر، أيوة معاكي إنه المفروض يكون مدة طويلة بس إنت بتتكلمي عن ناس عمرها مااجتمعت على حاجة زي كدة قبل كدة، فحتى لو كانوا ناويين يكرروها ويكون لها تأثير أكبر..فدة مينفعش يكون من أول مرة
كمان متأكدة إن يوم 6دة مش هيكون واو والشوارع فاضية، بس هو مجرد "محاولة حقيقية" وجس نبض للشارع المصري دلوقتي
أكيد طبعا روحي الجامعة وربنا يعينك ياتوتة ونفرح بيكي :)). بس عايزة أقوللك حاجة غريبة أوي!!أو على الأقل أنا اعتبرتها غريبة، وهي إن د.كريمة الحفناوي اللي هي برده دكتورة جامعة دعت كل الناس لأنهم مش يروحوا الجامعة يومها
:)
بس طبعا روحي وابقي طمنينا
مش متأكدة إن قلب ينبض الله هتقرأ الكلام دة بس أتمنى... وكدة أظهرت الوجه الآخر من الفراشة
:p
شكرا لأنك سبتني أكتب دة كله، بس لو تحب تمسح التعليق أنا معنديش أي مشاكل وبجد مش هتضايق خالص خالص
تحياتي
ازيكوا يا أحلي ناس في الدنيا
بالنسبه لموضوع الأضراب لو هو محاولة أولي ومبدئيه وليست محاوله أخيرة فأنا معاكوا جدا
يعني نعمل أضراب يو 6 أبريل وبعدين نرجع نعمل أضراب يوم تاني ويوم تالت وهكذا علي فترات متباعدة لحد ما الحكومة تنفذ طلباتنا
وبالنسبه للمصالح اللي هاتتعطل لو حلها زي مابتقولوا كدا يبئي مفيش مشاكل
انا دايما لما سعر أي حاجه يعلي ويزيد أقول احنا ممكن نضرب عن الحاجه دي لحد ماسعرها يرجع طبيعي تاني
أتمني ان وجهت نظري ماتفهموهاش انها ضد وجهة نظركم بالعكس انا معاكوا بس الطريقه تتغير ويدخل عليها بعض التعديلات زي مازكرت قبل كدا
بالنسبه بئي لموضوع البوست
هو للدرجادي أثر فيكو رغم اني ماقولتش في حاجه يعني
بس بجد انا نفسي ارجعه تاني مش علشان حد غير علشانكوا
كنت لسه ها ااسألك هو حاتم مابيدخلش البلوج بتاعي ليه
انا قولت أكيد عمل مقاطعه او بوستاتي مابئيتش بتعجبه زي زمان
اه علي فكرة أنا نجحت الترم الاول والحمد لله تقديراتي حلوة المشكله كلها في الترم التاني أدعولي ربنا يكرمني ويعدي السنادي علي خير
عزيزتي الفراشه
عليكم السلام ورحمة الله وبركاته
أنا بجد في قمة أنبساطي
أنا طبعا الأول أحب أذكر أني كالعادة لسه في الشغل
وشفت الكومنت من بعد ما كتبتيه بشويه بس كان النهارده من أيام أزدحام وقت الشغل بالعمل فقلت هرد كمان شويه
أنا فرحت بكلامك جدااااااا
لعدة اسباب بس في سبب معين عايز أقوله
انا لما عملت البلوج عملته لأن كان بيكون في كلام جوايا عايز أقوله ولما بيكون في حاجه متأثر بيها-زي موضوع الأضراب-بيكون نفسي أعبر عن اللي جوايا وكمان أتناقش مع الناس فيه لاني في حياتي بعيد عن البلوج مبقدرش أتناقش مع الناس وخصوصا في هذه المواضيع
لأن كلهم واخدين أني مش ههتم غير بالسطحي من الامور
واللي ممكن يكون منهم من المهتمين بهذه الأمور مش هقدر أقول معاه كلمتين
ولكن مع الكتابة الامر مختلف
طبعا مفيش داعي أني أقولك اني كنت لسه أمبارح بقول نفس كلامك من أن دي مجرد محاوله للأتفاق
وأنا بجد فخور جدا بيكي وفخور أكتر أن عندي تعليق من حد زيك
عزيزتي ذات القلب النابض
أزيك أنتي يا أطيب قلب
أنتي عارفه أنا كنت لسه من شويه بلف في المدونات وشفت بوست فيه نفس فكرتك ومش عارف صح ولا غلط اني انشر اللينك بتاعه لني مش بحب أنشر لينك مدونه غير لما أكون متاكد من محتوى المدونه ككل وده بعد ما أقرى كل البوستات بس أنا هديك المقال الوحيد اللي قريته لأن هو ده اللي أضمنه
http://nonoymm.blogspot.com/2008/04/blog-post.html
ورغم ان اللي هقوله بعيد عن الأضراب بس اثر فيا كلمة مقاطعه في تعليقك
وأفتكرت اني كنت من أشد المناديين بالمقاطعه أيام الأنتفاضه وانا في ثانوي وكنت فعلا مقاطع لكل المنتجات الأمريكية والأنجليزيه وبعد فتره ومش عارف أمتى تحديدا نسيت وأنغمست في هذه المنتجات وتهت في وسط هذه المطاعم والكافيهات وأدمنت كل ما كنت من سنين قليله أعتبره عمل اجرامي أن أقتنيه
وكنت ممكن ادور على بديل لمنتج ما فتره طويله جداااااااا ولا يصيبني كلل أو ملل
وسواء الان أنا مع أو ضدد المقاطعه لكل ما هو أجنبي
بس بجد لازم تاني أرجع أقيم الامور
فبجد متشكر على التذكرة
أما عن البوست
فاسمحيلي هو خرج من القلب فدخل على القلوب
وعن نفسي
فأنا ساعتها شفتك لخصتي خمسه وعشرين سنه وهو عمري كله في جملة واحده
اما عن حاتم فانا لسه منستش الجمله اللي قالهالي أول ما قرتله البوست في التليفون
قالي الحب ليه أشكل كتير مش شكل واحد
بس أه صح الكلام
وهو مازال زائر دائم بس طبعا هو دلوقت في الشغل هيرجع بعد اسبوعين بالضبط من دلوق أن شاء الله
في أجازته الاخيره أنا كنت السبب في أنك مش حسيتي بيه في مدونتك وده لأسباب هوضحها
اولا أستلمته من يوم وصوله بموجة أكتئاب أستمرت شويه أيام وكان كمان النت عنده فيه مشكله
تلى ذلك رغبه مني أنه يعوضني عن فتره أكتئابي وبنصيحه من شخص ما قرر أنه يمضي معايه وقت أطول فكنت زيارته أقل وكمان من الأسباب أنه كل مره ينزل أجازه لازم يقرا كل البوستات اللي فاتته عند اصحابه بالتعليقات وكل ما يسألني أنت ليه مش بتعلق عند ذات القلب النابض
أقوله شعان أنا بدخل مدونتها كأني داخل صومعتي وحيث توجد الصومعه يُمنع الكلام فالظاهر أتعدى مني
أما السبب الاخير فكان التاج الاخير
أه واللهي
انا لما قريته مقدرتش أمسك نفسي وكلمته وأتناقشنا كتير وكنت متخيل اني وصلت لقمة الأنبهار والتأثر بس لأقيته أكثر تأثرا مني وانا عارف حاتم كويس لما بيتأثر أوي بيسكت أوي
ومع ذلك أنا حاولت أكلمه قبل ما أكتب الرد عشان لو عايز يبلغ رد معين أقوله بس كان موبيله خارج نطاق الخدمه اصل الظاهر عنده
Job
حاجه أخيره كنت بكلم أختي من يومين على النت
شفتها صدفه
:)
وأديته لينك مدونتك وعجبتها
أي نعم انا عارف أنها مش هتفرق معاها كتير لأن الكمبيوتر عندها يتلخص في
Powerpoint & word
والنت يتلخص في المواقع اللي بتتكلم عن الرياضيات
بس يمكن الموضوع يشدها وتعجبها دنيا المدونات
تحياتي
انا كنت هنسى الف مبروك على التيرم الأول وعقبال التاني أن شاء الله
وهندعيلك كتير ان شاء الله وركزي في أمتحان يوم الأحد
وبالتوفيق
أنا سعيده أوي بيك وبهبه وبحاتم
ومبسوطة جدا علشان البلوج بتاعي بيعجبكوا رغم أن شايفه ان بلوجاتكوا أحلي بكتيييييييير من بلوجي كفايه ان أنا بحس انكوا ماشاء الله حاجه كبيرة وعاقلين
وبالنسبه للبوست أنا رجعته بس علشان خاطركوا
وبالنسبه لحاتم خلاص هو كدا براءه بدال كان مشغول بيك ومشغول بالشغل
وألف سلامه عليك من الاكتئاب
بالنسبه للنتيجه الله يبارك فيك
عئبال يارب ما كلنا نبئي ناجحين دايما وكويسين
وبالنسبه لأختك لو حصل ودخلت البلوج بتاعي صدئني ومن غير مجامله ها ابئي في منتهي السعاده
الفخر و الشرف لي أنا
:)
بحمد ربنا إني عرفت ناس زيكم
و إذا كنت حاسس إنك فخور فدة لأنك متعرفنيش في الحقيقة
و على فكرة أنا كمان دايما كنت بحلم إني أكتب حاجة و ألاقي ناس تتناقش معايا فيها في البلوج... بس غالبا أنا مش بكتب قضايا حقيقية عشان يكون فيه مناقشة غير قليييل جدا
:$
بس أنا راضية و مبسوطة الحمدلله
أتمنى إنك تتشجع و تتكلم مع الناس لأكتر..أيوة هيتفاجئوا في الأول و هيضحكوا أوي إنك غير الشخصية اللي يعرفوها.. بس مرة بمرة يمكن يفهموا اللي جواك صح
بجد أنا اللي اتشرفت بمعرفتك :)
سلام عليكم
عزيزتي ذات القلب النابض
أنا عن نفسي مش حاجه كبيره ومش عاقل
أنا حتى مدونتي القديمة كان أسمها يوميات طفل كبير
وبجد كونك رجعتي البوست عشان خاطرنا دي بجد بجد حاجه كبيره بالنسبه لي
ويارب أمين -على الدعاء-ويرضه شكرا جدا بالنيابه عن أختي
تحياتي
على الهامش الأمتحان النهارده بالتوفيق وطمنينا
العزيزه الفراشه
بجد شكرا على كل الكلام وان كنت مش متفق معاكي أني فخور عشان معرفتيكيش في الحقيقه
لأن أنا عن نفسي عرفتك بالشكل اللي بتمنى أعرف بيه الناس كلها
عرفتك من جوه وده أهم بكتير من أي حاجه تانيه
أنا كنت ممكن معلقش على كلامك بأنك مش بتكتبي في قضايا حقيقيه بس أنا أول ما قريت الجمله دي عارفه أول حاجه فكرت فيها أيه
مش عارف أذا كنتي فاكره البوست ده ولا لأ بس كنتي بتتكلمي على يوم سفر بابا بتاعك انا يومها أتأثرت جدا بالبوست ده -على الرغم من أني أيامها كنت محافظ على العهد ومكنتش بكتب كومنت- ومش ده البوست الوحيد بس أنا مش هنا عشان أعددلك
بس أي بوست هو ممكن يكون بوست قضيه مش عشان حاجه أد معشان بيكون كلام أحنا بنعبر بيه عن حاجه بتشغلنا
وكمان مش هتكلم عن بوست النهارده-تجربة شخصية- لأني بجد لسه تحت تأثير الصدمة وعلى فكره وأنا تحت تاثير الصدمة كتبت شويه كلام يمكن أنشره عن الموضوع
أنا بصراحه مش معاكي في موضوع أني أتكلم مع الناس
أنا يمكن أبان أن تجاربي شويه صغيره بس في اشلوية الصغيره دول أكتشفت أن البعد عن كتير من الناس فيه راحه كبيره
أنا للأسف مش هقدر أتكلم في النقطة دي دلوقت بس يمكن في يوم من الأيام أقدر احطم قيد من القيود وأتكلم عن تجاربي في التعامل مع الناس
بجد أنا مش قادر أعبر عن شكري ليكي
أرجوكي تقبلي تحياتي
Post a Comment