تفاهات الشغل

كنت بفكر اكتب عن تفاهات الشغل من فتره طويله ومش عارف ليه دلوقت بفكر اكتب عن الموضوع ده
الأول أحب أوضح الجو العام في الشغل
أحنا اتناشر مهندس كل سته ليهم مدير عام مساعد والأتنين المدرين ليهم مدير عام
الأتنين المدير عام المساعد واحد منهم وهو المهندس خ كان مديري لفتره تفترب من السنه وبعدين بقى مدير للجزء الاخر
والمدير العام المساعد الأخر وهو المهندس ك هو مديري الحالي
وطبيعه شغلنا أحنا السته بتخلي كل اتنين يشتغلوا مع بعض وبيكونوا في مكتب واحد
وطبعا كنت انا الجينيور واللي معايه كان هو السينيور
بس هو قدم على اجازه من فتره ومن اسبوع بس جابولي مهندس جديد بس لحسن حظي مش بيشتغل معايه انا ولكن نقلولي مهندس قديم -متخرج قبلي بدفعه ولكنه في الشركة قبلي بسنتين-والمهندس الجديد بقى هو اللي شغال معايه بس مش ينفع يكون السينيور بتاعي عشان هو اللي منقول وانا كنت موجود وفي نفس الوقت مش ينفع يكون هو الجينيور عشان انا اصغر منه في الخبره
وعلى العموم مش هو اللي قاعد معايه ولكن المهندس الجديد هو اللي معايه
ده عن الوضع العام
أما عن الخصوص في الموضوع
هما المديرين العاميين المساعديين
مديري القديم المهندس خ
كان بيقول عليا فاكهه الأداره وكان بيحددها بالأناناس مش عارف ليه الأناناس رغم اني مش بحبه كتير وكنت اقعد افكر هو لما بيقول عليا اناناسية الأداره بيكون يقصد الاناناس ولا زي معظم المصريين بيكون يقصد الكانتلوب
أي كان غرضه
فكتر خيره
وانا مش عارف ليه تحديدا شكله وهو بيقولي اني فاكهة الأداره هو العالق في ذهني
المهم
مديري الجديد ليه برضه موقف عالق في ذهني
وهو انه كان في سهره مع زمايل الشغل وانا يومها كنت مع بابا في المستشفى اعتقد ده كان في اليوم اللي بابا اتحجز فيه في المستشفى أو اليوم اللي بعده
المهم وهما سهرانيين
قال زميل منهم ان الأداره كلها موجوده معدا محمد
فقالهم تلاقيه في عرض ازياء
وعلى الرغم من انه كان يقصد السخريه وعلى الرغم من اني قبلها بيوم واحد كنت بجوب على شويه اسئله وكان من ضمنها اني كان ممكن اشتغل حاجه زي كده وعلى الرغم من اني كان مفروض ازعل منه جامد ساعتها
بس انا اللي ضايقني انه قال كده بغرض السخريه
المهم بقى ان من تفاهات الشغل ان المدير ك والمدير خ يبدأ يغيظوا في بعض
لأنهم شويه ليهم تصرفات كالأطفال
ومن كام يوم كان نصيبي اني اقع بين المطرقه والسندان
في قعده من القعدات الصباحيه واثناء شكوة المدير خ من أحد المهندسين السته العاملين معه
فؤجيء بالمهندس ك بيقولوا انا بقى عندي واحد انما ايه-وللاسف كان يقصدني-يعمل اي حاجه اقوله عليها ومن سكات
فضحك المهندس خ مليء شدقيه-واللهي ما اعرفها انا بقراها كده في القصص اللي ادمنتها-وقاله ده حبيب المهندس موسى-أنا ياما كتبت عن المهندس موسى قبل سابق واني بعتبره البابا الروحي بتاعي رغم انه مش اكبر مني بكتير-وطبعا ونظرا للكراهية المتبادلة بين المهندس ك والمهندس موسى
فقد اعلن مديري الموقر المهندس ك لاجتماع عاجل واثناء الأجتماع لم يتوانى عن تذكيري بأني ينبغي ان اصحح كده للشغل شويه-سبحان مغير الاحوال كنت منذ دقائق من انشط الناس والان اصبحت اكسلهم-وطبعا سمعته الجمله اللي يعشق سمعها مني وهي
سوري يا بشمهندس هاخد بالي المره الجايه
بيقولوا عليا في الشغل طفل
اه نسيت اتكلم عن الدكتور
بس هو بره الحسبه عشان في الشركة مهملينوا شويه
الدكتور بقى مصمم أني أشكينازي
ودي على ما فهمت منه المجموعه الأرقى من اليهود
ولي=سه امبارح كان بيعلق اني بحسسه اني في الحضانه عشان بمشي في الكوريدوار على رجل ونص او امشي اتنطط زي فيروز واغني
معايه ريال معايه ريال
وبيقول اني مش بعيده ادخل على المدير العام وانا بنزل من زحليقه كبيره واقوله الشغل اهو
فرافيرو
وفي كمان اتنين اجانب الأج العزيز هاري وهو نائب المهندس ك والأخ العزيز بيرن وهو نائب المدير العام
أمبارح حصل حاجه غريبه وقلت للعزيزه الفراشه اني هحكيها في بوست منفصل وعمال انا ارغي من الصبح ومش حكيتها
زمايل الشغل الا حد ما شايفيني الحد اللي مش يقدر يستحمل أي مجهود
وموضوع المجهود ده نسبي
بس المهم في حركة شهيره كان باب متعود يعملها مع كل اناس عند السلام
الا وهي الضغط الشديد على الاصابع
الحركة دي بتخلي عظام الاصابع تتخبط ببعضيها وتعمل صوت زي صوت طرقعه الصوابع
بيقولوا انها مؤلمه
وزميلي العزيز هواري
اتكلمت انا عنه قبل كده
اه هو ده
الزميل الأقرب
المهم هو هرقل الأداره
حد كده نقدر نقول مضلع
طبعا ربنا يديله الصحه احنا مش بنحسد
:)
المهم هو من فتره جرب الموضوع معايه وانا قلتله انا مش حاسس بأي ألم نهائي
لأ والله مش عديم الأحساس أنا
بس كل ما في الموضوع ان فعلا الموضوع مش بيألمني
انا شويه مفاصلي مهويه يعني انا عندي قدره اني اقف على اطراف صوابعيني زي لاعبي الباليه او أتني رجلي واوصل مشط رجلي الى قفصي لبصدري
عادي
المهم أمبارح فضل يعتصر في صوابعه بأيديه
ونسيت اقول ان ايديه غير الايدي البشريه العاديه
ولكنها ضعف الحجم
وهو يضغط وانا ايدي تصدر هذه القرقعه المخيفه
بس والله بدون احساس بالم وان وجد فهو مش بالالم الذي لا يحتمل يعني
المهم سبني بعد الموضوع طول شويتين ووقف احد الاشخاص يتفرج وكمان هو بيقول ان عنيا بقى فيها بعض الدموع
وده مش حقيقي لسبب
انا لما بكون ساكت شويه عنيا لوحدها بتفرز دموع والاقي دموعي انهارت على وجهي بس مش بتكون دموع بالمعنى المعروف
ولا بلاش حكايه الدموع دي شعان طويله هتكلم فيها مره تانيه
المهم سابني
أه يا ايدي دلوقت ايدي بتوجعني
:)
بس بعدها كنت بفكر
لأن اللي عمله الهواري ده هو نفسه اللي كان بيعمله صديقي القديم اللي برضه اتكلمت عليه قبل كده
وده الفرق بين اي حد تاني عرفته قبل حاتم وحاتم
كل اللي عرفتهم بلا أستثناء حتى اللي منهم لسه اصحابي
بيخافوا عليا من وجهة نظري انا
لكن حاتم بيخاف عليا من وجهة نظره هو
كانت زمان ممكن اعملها قضيه
يعني مثلا يكون راجع من السفر وشنطته هو بيقول انها تقيله وهو بيعاني وهو شايلها
انا لا شايف اني ممكن اشيلها من غير ما أتألم
فيرفض برضه يخليني اشيلها لأنه شايف انها تقيله
فكنت أزعل
تلاقيني بعمل اي حاجه واقوله بس انا مش تعبان يقولي انا تعبان فكنت ازعل
بس بعد موقف الهواري امبارح اكتشفت اني في نعمه
اه واللهي نعمه
بس يارب حاتم ما ياخد باله من الجزء ده احسن بعد كده يشد نفسه عليا شويتين
بس الهواري لما عمل اللي عمله امبارح كان من وجهه نظره -رغم اني مش اتناقشت معاه فيها بس ده اعتقادي- شايف اني مش بتألم فعادي انه يزود في الضغط
وكمان حفظا لسمعته في انه الاقوى
وقد يكون كمان شويه لترسيخ المبدأ في أني الأضعف
أو أني بدعي أني مش بتألم بس هو اللي هيقدر يكشفني على حقيقتي
فالموضوع يبان غريب من اين تقول انك بتعزني وفي نفس الوقت بتمارس عليا ضغط بدني انت عارف انه مؤلم واني ممكن اكون بتألم منه
عذرك الوحيد أني أنا بقول أني مش بتألم منه
منطق غريب
وكنت فعلا اول مره افكر في تصرفات حاتم على انها مش تعنت منه ولكن خوف عليا من وجهه نظره هو
كفايه كده على تفاهات شغلي
وقت تاني أكتب عن تفاهات أخرى في حياتي