مواقف من غير طرائف

أنا برتاح أوي لما بكتب بس مش عارف ليه دايما مش بعمل اللي بحبه
كان في أكتر من حاجه عايز أكتب عنها
أبدأ من أين؟
أه
ممكن أبدا بالكتب اللي قريتها في الكم يوم اللي فاتوا عشان انا بعد شويه بنسى الكتاب وبنسى كمان أنطباعي عنه

أول كتاب كان

حواديت المشاوير لخالد الخميسي
والكتاب تحفه
أتبسطت جدا وأنا بقراه
أنا مكنتش متصور ان سواقين التاكسي كده
أي نعم أنا مش بتكلم مع حد منهم كتير بس في الكام مره اللي حصل بيني وبينهم حوار كنت بشفهم غير كده
أنا عارف اني مش مقياس لأني دايما حظي بيوقعني في ناس غريبه
بس الكتاب ممتع

وبعدها قريت شويه قصص مترجمه لدستوفيسكي بس واحقاقا للحق لم أستمتع بالمره
بس بيتهيألي كان عيب ترجمه أكبر منه عيب قصة
أنا مش فاكر إذا كنت أصلا قريت حاجه لدستوفيسكي ولا لأ بس أنا أصلا بنسى الكتب اللي بقراها او بقول كده عشان أريح دماغي من الأسئله وأجابتها

قريت شويه في كتاب أسمه السيدة الأولى لانيس منصور
أنيس ده حد غريب
كل مره أقول توبة بعد الكتاب ده مستحيل أقرأ تاني ليه وأرجع تاني وأقرا تاني
المهندس الجديد اللي معايه في الأوضه بيحب القرايه بس هو أهتماماته شويه سياسيه
كان ليه هو رأي مخالف لرائي عن أنيس
انا كنت بقوله اني بحس أني غبي لما أقراله بحس أني مش فاهم أو بالأصح كل مره ممكن أفهم الموضوع بشكل مختلف وده بينرفزني
بس هو كان شايف أن ده حاجه كويسه وان ده من أكتر ما يميز أنيس أن مش شرط أتنين يفهموا الجمله بنفس الشكل ومش شرط أنك أنت نفسك تفهمها كل مره بنفس الشكل
خلاصة القول أني كالعادة ما خلصشتش كتاب أنيس وركنته على الرف

بعدها قريت في شفرة دافنشي
للان لم أنتهي منه
مش عارف ليه تقيل على قلبي
يمكن برضه الترجمة بتاعته مش من النوع اللي بحبه وكمان شكل الصفحة اللي يحسسك ان الصفحه مبتخلصش
بس الى الان شايف انها كروايه مش بطاله ساعات ببقى عايز اعرف ايه اللي هيحصل بعد كده
مش عارف ليه كتير وانا بقرا فيها بفتكر قصه من قصص فانتازيا كانت عبير فيها متجوزه هوديني
وكانت على السحر والارواح وكلام من ده

في أول الأسبوع الماضي نفس الزميل العزيز المرافق لي في المكتب أحضرلي من مكتبته الخاصه كتاب ليوسف معاطي
مش عارف ليه حسيت اني قريته قبل كده يمكن لأني قريت كل كتب يوسف معاطي اللي في المكتبه-أي نعم المكتبه مش مقياس لأني بقالي سنه نفسي أروح والاقي قصة نيران صديقه بتاعت الأسواني ومش عارف كل ما أروح الأقيها مُعارة- الكتاب أسمه آه يا دماغي
كتاب دمه خفيف
هي كتابات معاطي كويسه تصلح للقراءه في لحظات الملل والأكتئاب

أما أخيرا فكان كتاب عمر طاهر كابتن مصر
والكتاب ليه معايه قصص ونوادر ويمكن هو السبب الرئيسي في بوست اليوم
كنت في الشغل كالعادة يوم الجمعه
بعاني من الملل والزهق ومش باين معالم أوي لليوم
حاتم شكله مشغول وأنا مش عارف أذا كنت هخرج لوحدي ولا هروح احبس نفسي في البيت لغايه ما أنام
في الأخر قررت أني أنزل من الشركة وأنزل على وسط البلد وأدخل سينما
زي ما كنت متعود زمان مع نفسي
بس قبل ما أنزل أخدت معايه في الشنطة جزء من كتاب عمر طاهر
وأمام بوابه الشركة وعشان اعبر طريق المرور العظيم بعمل ده على تلات مراحل
الاول اعبر من أمام العربه الاولى وبعدين أتأكد أن مفيش عربيه جايه وأعبر التلت التاني ثم أخيرا التلت الأخير وده كله عشان أوصل للطريق اللي في نص الشارع وبعدين اكرره مره تانيه وفي كل مره لازم ابتسم للسائق لسببين
أما عشان يسمحلي أعدي أو عشان أشكره أنه مسمحليش
المهم في الجزء الثالث واما مي عربه واحده واصل للجزيره اللي في نص الشارع
الاقي عربيه مين معديه من قدامي؟
اه واللهي
هو عمر طاهر بنفسه
فقلت مش غريبه شويتين
الكتاب متلقح عندي بقاله تلات اسابيع ويوم ما أفكر أقراه ألاقي الراجل معدي بعربيته
ودي مكنتش الحاجه الغريبه الوحيده
أنا في العادي بقف قدام باب الشركة عشان أخد الميكروباس-كنت الاول بكتبها ميكروباص-لغايه الاسعاف
بس ونظرا لأن الشركة في مكان مش اللي هو وسائقي العربات مبقوش اللي هما
وكمان في اليوم ده لبست التي شيرت اللي حاتم جابهولي معاه من مطروح
التي شيرت ده الناس كلها علقت عليه مش عارف ليه؟
المهم كان في حد لطيف لفت نظره التي شيرت تقريبا فقرر يستخف شويه فالمهم اضطريت امشي شويتين تلاته اربعه وبعدين ركبت
وبالتالي مقدرتش اقرا في الميكروباس اي حاجه
ونزلت وسط البلد الف على السينمات كلها مفيش ولا واحده فيها فيلم هند صبري الجديد-جنينة الأسماك- وحتى الفيلم التاني اللي كان ممكن ادخله -أحنا أتقابلنا قبل كده- كان بدأ وأان مش بحب أدخل فيلم من نصه
المهم فضلت الف في وسط البلد شويتني تلاته اربعه لغايه ما أتخانقت وقولت لنفسي طيب ما الكتاب في الشنطه ما تروح تقعد على الكورنيش يا واد انت وتقرى في الكتاب زي أيام زمان
وبالمرة أشتري لنفسي ورد عشان بقالي كتير مشترتش لنفسي ورد ولا حد اشترالي
الورد ده ليه مواقف برضه كنت من زمان أوي وانا لسه ساذج صغير كنت اقعد على الكورنيش لوحدي واشتري لنفسي ورد وكانوا الناس يبصولي بأستغراب
عادي أنا متعود على الاستغراب في عيون الناس
المهم قبل ما أوصل عند الكورنيش وتحديدا عند المجمع حسيت اني رجلي وجعتني وقلت كمان زمان دلوقت الدنيا كلها هموش عند النيل عشان كان فاضل شويه على المغرب فقلت أقعد على الكراسي الكتير اللي عند مجمع التحرير
حتى ساعتها أفتكرت مره حد قابلته زمان في المكان ده كان بيشتغل بيكتب مقالات على الكمبيوتر بتعات جرنال اعتقد اسمه الفرسان ورحت معاه المكتب اللي بيشتغلوا فيه وحبيت الجو العام
المهم أخدتلي كرسي محترم كده وأقعدت وبدات أتسلى في الكتاب
شويه ومقدرتش أمسك نفسي وهاتك يا ضحك
وطبعا مش بمسك نفسي ولا أبتسم لأ ده أنا بضحك
بضحك وبصوت عالي وكأني عمار أبن أخويا
كان في كرسي قريب مني قاعد عيه بنتين واحده منهم كانت جايبه هديه للتانيه وفي وسط ضحكي فؤجئت بيهم فبصولي اوي وبصوا لبعض وخدوا بعض ومشيوا
انا حسيت اني شكلي بقى مش اللي هو بس واللهي الكتاب السبب انا مليش دعوه
شويه ولاقيت واحد أجنبي جاي يسالني عن المكان اللي بيقف فيه أتوبيس مش فاكر رقمه كان كم بس هو حب يوضحلي انه مكيف وبيروح هليوبليس
قلتله اقف الناحية التانيه فكان في شاب قاعد على كرسي قدامي كان عايز تقريبا يشترك في الحوار فشرحتله الراجل بيسأل عن ايه فقالي قوله على موقف عبد المنعم قلتله لأ ده بعيد عليه
بعدها بشويه انتهى الجزء اللي كان معايه من الكتاب وزعلت أوي أني مش جبت الكتاب كله وكان عندي حل من اتنين يأما أمشي يأما أكمل قرايه في دافنشي بما أنها هي اللي معايه
وبعد مكالمه قصيره مع حاتم اتأكدت فيها أن لاقنا مستحيل قلت يالا ياواد يامحمد خد بعضك وأمشي وبالذات لأن كان فيه ناس على كرسي قريب مني ولد واعتقد خطيبته واخت خطيبته
أنا وزعت عليهم الادوار دي بناء على أشكالهم
بس الولد كان في سمعات في ودانه وبالتالي بيتكلم وكأنه بيتكلم في مايك شم عارف ليه محدش من اللي معاه لفتوا نظره أن صوته وصل لحد الصراخ
أمبارح كملت قرايه في كتاب عمر طاهر وقريت منه جزء على أختي وهي تستمتع بلعبة زوما
دي تقريبا الكتب اللي قريتها لغايه دلوقت