أمبارح كان يوم لا ممكن أنساهلأ
أكيد هنساه
أصل أنا ذاكرتي ضعيفه
أنا مش عارف ليه بحب أقاطعني
أمبارح لما وصلت الشغل كنت متخيل أن اليوم مش هيكون لطيف
ومكنش السبب طبعا أني وأنا في الميكروباص كنت قاعد على الكنبه اللي ورا
اه اللي بيقعد عليها أربعه مع بعض دي
وكان في واحد كعادة الشعب المصري اللي أنا أغخر أني منه –بس واللهي مش بعمل زيهم- قاعد على الطرف فأنا دخلت جوه خالص وقلت أهو هكون جنب الشباك أي نعم كده هكون أخر واحد ينزل من العربيه بس ما هو برضه لو كنت قاعد فين الناس بتتخطاني وبنزل برضه أخر واحد
المهم طلع راجل أنا أعرفه بيركب معايه نفس الميكروباص أيام كتير وبشوفه في المترو الراجل ده غريب أوي
هو وزنه كبير شويه
لأ شويتين
لأ أكتر شويه كمان
بس مش ده سبب أستغرابي يمكن في العادي بيكون سبب أعجابي
بس كان سبب أستغرابي أنه طول السنه حتى في عز البرد
بيلبس قميص بنص كم
اه والله قميص بنص كم
في الأول قلت بالنسبه له الجو مش ساقعه بس مع موجات البرد الشديده قلت يمكن النهارده نسي الجاكيت
يمكن النهارده اتخانق مع المدام فحالف أنه مش هيلبس الجاكيت
يمكن النهارده الجاكيت كان فيه مشكله
وبعدين في الاخر أستسلمت أنه مش بيفرق معاه هو لابس جاكيت ولا لأ
وأتبسطت أوي عشانه
أصل أنا عندي لبس الجاكيت أو الهدوم الكتير بيضايقني
بس ده مش كان هو السبب في أني تخيلت اليوم مش هيكون لطيف
ومأعتقدش أن السبب أني كان بقالي يومين ما قبلتش حاتم ولا شفته
بس يمكن يكون السبب هو أني صاحي مش رايق المزاج وخلاص
وبعد كتابه البوست لاقتني أحسن
وشويتين وكلمني حاتم وقالي انه هيحن عليا أخيرا ويخرجني
يا حلاوه ياولاد كل ده مره واحده
وعشان انا من يومي منحوس كان صعب كل الامور تمشي تمام
مديري-المهندس ك- كان أجازه وده طبعا سبب بيستدعي الأحتفال في الأداره كلها
بس فؤجنا بالمهندس خ بيدعونا لإجتماع عاجل الساعه أتنين الضهر
أه والله
طلب شويه كلام كده يتعامل في أكتر حاجه بتخنقني وأنا بشتغل فيها-بصراحه مش بتخنقني أوي أنا بمثل أني مخنوق لأني لو قلت أني بكون مبسوط وأنا بشتغل في أي حاجه هشتغل شغل من النوعيه دي كتير- الا وهي المدعوه الميزانيه والخطة السنويه الخ الخ الخ
وكل ده ليه؟
علشان رئيس مجلس ادارتي الموقر عنده أجتماع النهارده فعايز
Presentation
فيها ايه الخطة بتاعت السنه دي وايه اللي حصل منها وايه المتوقع للشهور الثلاثه المتبقيه
شفتم أنا بشتغل أيه؟
:((
المهم واان طلعان عيني في الشغل حصلت المشكله
هو أنا طولت؟
مش مشكله دي مدونتي وفيها ايه لما أرغي براحتي
المهم الزميل الاخ المهندس أحمد
أنا أتكلمت عليه كتير أنه الأقرب
وأنا عندي مشكله؟
أه ده اسم البوست يعني لو حد لسه عند طولة بال وبيقرى هيقول هانت قرب يخلص لانه على غرار ثقافة التليفزيون طالما الابطال قالوا اسم العمل يبقى العمل شارف على الأنتهاء
بس أحب أبشركم وأقولكم لأ لسه فاضل جزء تاني من العمل
محدش يزعل انا مش هعاقب حد زي التلفزيون أنا هنشر الجزئين مع بعض
No comments:
Post a Comment