نظرات

كان في قصة أسمها نظرات قريتها من فتره طويله في مدونة نضارة شمس ومش عارف ليه أتأثرت بيها
نظرات الناس في الغالب بتكون سهام مسمومه
طول الوقت اللي بكون مش بشتغل فيه ومش نايم بكون بكلم نفسي حتى وانا مع الناس سواء أصحاب أو زمايل شغل بوصل لنقطه وبعدها أبدأ في حواري مع ذاتي
مش كتير كنت بفكر في تأثير نظراتي
لأ ساعات كنت بفكر بس هو اللي كان دايماً يحسسني أني مش بفكر في ده
وأنا بتمشى مره مع زميل شغل قالي فجأه الراجل اللي عدينا عليه ده بصلك بصه مش كويسه
أنا كنت هتجنن لأني بطبعي حاسس أني طول ما أنا ماشي الناس بتنتقضني
فيا أبن الحلال حاجه من أتنين يأما ما خدتش أنا بالي أنه بصلي-وده اللي كان حصل لأني كنت مشغول قي حديثي مع نفسي- والحمد لله يأما شفته وطنشت
فيعني أنا مش مستنيك تيجي تقولي كده
ثم متوقع مني أيه أرجع وأقول للراجل أنت كنت بتبص ليه وتقصد أيه وعشان أيه الخ الخ الخ
بالصدفه دلوقت بريح ايدي من الكتابه وكنت فاتح مدونه تانيه أكتشفتها من تعليق النهارده ويهول ما لاقيت
لاقيت بوست في وشي مكتوب عنوانه
نظرة عينك
هو أنا ليه كتير بيحصلي كده أنا تعبت مش حمل كده تاني

في المواصلات بشوف حاجات غريبه
ممكن تلاقي حد جاي مفروض أنه هيقعد جنبي وبعدين يختلط عليه الأمر ويتصور أن رجلي وكتفي تبع الكرسي أو الأجره اللي هيدفعها تشتمل ان حد يشيله على رجله ده غير اللي بيتخيل أن كتفي مسند أو الأكبر بقى لما حد عايز يدفع أجره ميعرفش يدفع من سكوت لازم الاول يعمل صوابعينوه في حركة الشينيور اللطيفه ويبدأ في نخر عظم الكتف ويسلام لو أنا مش مركز شويتين والجلاله واخداني وسرحان شويه فالسيد الفاضل بكل ما أوتى من قوه يخبط على كتفي وكأنه بيخبط على باب ناس نايميين وعايز يصحيهم
ومع ذلك مفتكرش أني كتير ببص بأستغراب أوي أو بعلق على الموضوع بأكتر من لمسه لكتفي اللي في الغالب بحس أنه أنخلع من مكانه
وفي نفس الوقت لو بس كان في أيدي قصه من قصص فانتازيا أو حتى بقول للسواق أنا نازل في المكان الفلاني أو يا سلام لو كنت مع نفسي كده وضحكت مش ضحكت أوي أبتسمت يعني ألاقي على الاقل عيون الشخص المجاور ويمكن اللي قدامي يكون فضولي شويه وميستناش يبص وأنا نازل لأ ده هيلتفت بمنتهى البساطه ويبص

على الهامش

البوست ده كان في الدرفت من فتره طويله وقلت بمناسبه الحديث عن المواصلات اطلعه