الخوف

الخوف هو داء أصابني منذ الصغر
مش عارف امتى تحديدا اتعلمت أخاف
يمكن من يوم ما أتولدت
يمكن من يوم ما تعلمت أحلم
يمكن من يوم ما أتعلمت أتكلم
يمكن من يوم ما أتعلمت أحس
يمكن من يوم ما أتعلمت أشوف
يمكن من يوم ما أتعلمت أقارن
يمكن من يوم ما أتعلمت أفكر
المشكله ان الخوف عندي مش طبيعي ومش لسبب معين
يعني أنا ممكن أخاف جدا وأنا بتفرج على مشهد عنف
هنقول عشان الدقه في التمثيل والبراعه في الأخرج وحسن التصوير
طيب ليه أمبارح لما موبيلي رن وظهر على الشاشه اسم زميل قديم من ايام الجامعه
حسيت بالخوف
رغم اني شبه متأكد من أنه كان متصل عشان يسلم ومع ذلم مردتش وخفت وفضلت خايف لغاية ما لأقيت حاجه تانيه تخوفني أكتر
كنت وأنا صغير كل ما الدنيا تضلم كنت أخاف وكنت أحس بألم في بعض الأجزاء من جسمي ومكنتش ألعب وكنت الزم مكاني ولا أبرحه
بقالي فتره بقول أخليني أنا
يعني مثلا نازل من الشغل من كم يوم والدنيا ليل وشارع جامعه الدول أشهر من النار على علم ومستني الأقي حاجه أركبها وتعرضت لموقف سخيف من سائق
في العادي الموقف مش بيضايقني
خلاص شبه أتعودت على كده
وانا مروح من الشغل من يومين كان معايه اتنين زمايلي فقلتلهم وانا بضحك على اللي حصل ومشي زميل منهم وتبقي الأخر
احمد الزميل الأقرب في الشغل واللي كتبت عنه كتير
بس سمعني اللي دايما سمعته من غيره كتير
أنا مش عايز اتغير عشان خاطر حد ومش مقتنع اصلا بضروره التغير لو في ناس مش بتشوفني صح فده مش معناه اني غلط
بس مع ذلك خفت
لأني مش مفروض أكون مع الناس في الشغل براحتي
النهارده كنت بحكي فكره التوست بالفول لأتنين زمايلنا وكل واحد طلع بمجموعه ما من التعليقات
فخفت
رغم ان مش في اي كلام يخوف
ممكن أسمع اتنين بيتكلموا بصوت عالي فاخاف
ممكن حد يبصلي في عيني
فأخاف
ممكن أكون لوحدي فأخاف
ممكن أكون وسط الناس فأخاف
حتى وأنا مع حد بحبه
بخاف
كنت ساعات كتير بحس أن الخوف عنده مفهيوش درجات
بس أكتشفت أني عندي درجات بس الدرجه الدنيا من الخوف عندي عالية شويتين تلاته أربعه

مره زمان وانا في اعداديه
كان عندي مدرس رياضه كنت بحبه
وهو كمان
كنا في رحله سوا
والرحله دي كنت بعد فتره زعل وكان الصلح في الرحله دي
يومها واحنا مروحين كان السواقمشغل أغنيه وحشتني بس بصوت خالد عجاج مش سعاد ممد
وكنت بدندن مع الأغنيه
وفي الجزء اللي بيقول
من خوفي لبكرة يفراقنا وأحنا يروح قلبي ما صدقنا
كان فعلا الخوف ببيبان عليا
فقالي خايف
قلت اه
قلي انت مخير مش مصير فمتخفش
بكره ده انت اللي بتختاره

انا مش حاسس اني مفروض أتعامل مع الناس
بحس ان كل ما أبعد عنهم جرعات الخوف اللي بتعرض لها بتكون أقل
أي نعم وانا بعيد منهم بخاف بس بخاف من حاجات أنا اللي شاركت فيها
يعني لما أقراى كتاب واخاف من حروف الكلمات اللي فيه أو أخاف من الأفكار اللي بيشبعني بيها
فأنا اللي أخترت طريق الخوف
ولما أتفرج على التليفويون وأخاف
أنا اللي بختار اللي أتفرج عليه
أنا أمبارح كنت بتفرج على فيلم سمج لبرلينتي عبد الحميد كانت فيه بتخون جوزها وكنت طول الفيلم خايف
وبعدها لمحت مسابقه على ميلودي تريكس في قمة الغباء
وبرضه خفت
خفت على الناس اللي بتتصل وخفت منهم
خفت على نفسي
ساعات أكون ماشي من تحت كوبري وأتخيل أنه هيقع عليا فأفضل خايف لغايه ما أمشي من تحته
ساعات ألمح حد وأحس أنه ممكن يأذي بسهوله فاتخيل أنه ممكن يأذيني بدون سبب فاخاف منه

ليه بخاف؟
عشان أيه أخاف؟
نفسي ماأخفش

لو أتكلمت مع حد كلمة بحس أنه كرهني بعدها وزعل فأخاف
كنت كتير ممكن أعمل حاجات ضد رغبتي عشان بس ما أحسش أن اللي قدمي زعل مني
بيكون نفسي أحس ان اللي بتعامل معاه مبسوط مش متضايق وده بيخليني أخاف
وانا بكتب الكلام ده حاتم كلمني وحسيت اني ممكن أكون زعلته فخفت

دايما بخاف من اللي بكتبه واللي ممكن يقرا الكلام ده
واللي ممكن يتأثر بالكلام ده

نفسي أوصل لأتفاق مع الخوف

هل الخوف دليل على الضعف.؟
يمكن أكون ضعيف وده سبب أحساسي بالخوف

يمكن أكون ضعيف وده سبب الخوف
هو الخوف دليل على الجبن؟
هو أنا جبان
أنا خواف بس مش بحس أني جبان
وبالذات أني ممكن أعمل حاجه من الحاجات اللي بتخوفني بس بعملها وأنا كلي خوف
حتى لو الحاجه دي هي بس اني أرد على مكالمة تليفون او اوافق أني أقابل حد يكون علاقتي بيه زماله مش صداقه