هو أنا عندي مشكله بجد ولا أيه؟

هو أنا بجد عندي مشكلة؟
أه أنا مش قلتلكم أيه هي المشكله اللي عندي
بس اللي لسه بيعدي من هنا ويقرى أقوله في بوست تحت في البداية
المهم أنا مشكلتي هي أني بصدق
أه والله مش بحرم وبصدق برضه
أي حد بيقولي أي كلامي-عني طبعا – بصدقه
لو حد قال عليا كويس ولطيف أحبه موت
ولو حد قال عليا غبي ومش بفهم ومليان عقد أقول عليه واحد بيفهم وأجري وراه بالمشوار عشان يرضى يكلمني
الخلاصه أني بصدق
وده كان بدايه مشاكل من فتره بيني وبين أحمد
مش كل شويه هقول أنه زميلي الأقرب في الشغل أنا عايز تركيز شوية
المهم أنا أقوله لأ أنا مش حد مميز وهو مصمم
لغاية ما صدقت
مش صدقت أني حد مميز بالنسبه لكل الناس
ولكن بالنسبه له
هو كان يقصد أننا اصحاب يعني مش مجرد زمايل شغل
المهم أن اللي حصل
هو أني كنت شغل في الشغل الحلو الجميل اللي قلتلكم عليه وبتريق وبضحك وبقول ان ده مش ميراثي من العيله الكريمة وان لازم ناس تانيه تخش في الشغل ده
واللهي كلام عام مرسل
المهم بعد شويه كنت محتاج شويه معلومات –في العادي بدور على الملفات والدوسيهات وأطلع اللي عايزه- بس على سبيل الهزار والدلع مني طلبتها من أحمد بما أنها تخص الجزء اللي بيشتغل فيه
والولد والحق يقال كان بيدور على المعلومات دي
لاقيت المهندس خ داخل عليا وبيقولي خلصت؟
قلتله لــــــــــــــــــــــــــــــــــــــسه
على اساس اننا بنلعب استغمايه
قلتله انا طلبت شويه حاجات من بتوع الحقل الفلاني –اللي بيمثله أحمد- ولسه مش أخدتها فهو نادى على أحمد والمهندس المسئول معاه وقاله يالا يفن الشغل
وهنا كانت الطامة
أحمد خشن الحنجرة-أكتر من ما هي خشنه أصلا- وبأعمق طبقات صوته وبالشكل اللي بيحب يرعب بيه الناس وقاله هو طلب الشغل من أقل من دقيقه وأنا لسه بجهز الشغل
أنا طبعا لاحظت أن الجو الى حد ما أتكهرب
وده ضايقني شويه بس ضايقني اكتر اللي حصل بعد كده
محدش يقلق مش هقول في جزء تالت أنا هخلص دلوقت
المهم أحمد كان رايح ياخد جزء من المعلومات اللي أنا طلبتها من المهندس موسى وأنا كمان رحت للمهندس موسى عشان أخد حاجات تانيه
وواقف بهزر
وتعمدت أني كمان أهزر مع أحمد وأقوله أنت بتكلمني كده ليه متاخدلك قلمين أحسن؟
فواللهي مش فاكر رد وقال أيه بس قال حاجه سخيفه من عينه مش وقته دلوقت أو قلمين مش كفايه
وأنا عشان الموضوع ما يكبرش كملت كلامي مع المهندس موسى
المهم رحت أخلص الشغل والساعه بقت قربت تدخل على أربعه وحاتم ملطوع في الشارع بس انا على اساس اني قربت أخلص وهنزل فكنت مش قلقان اوي أوي يعني
لأ بصراحه كنت قلقان أصلي مش بحب أتأخر على مواعيدي البته
المهم المهندس خ أخد الشغل وطلع بيه عند رئيس مجلس الأداره وطبعا طول ما أنا شغال معاه وتليفوني بيرن وهو سامع الاخت الفاضله هيفاء بتشدو مش قادرة أستنى وهو عمال يقولي رد رد
أصله زي معظم مهندسي البترول بيتخيلوا ان صوت نغمة الموبيل يدل على شخصيه المتصل فتقريبا كان فاكر انها الاخت هيفاء هي اللي بتتصل بيا وشكله كان نفسه يسمع صوتها في التليفون وأنا أقوله لأ هخلص اللي في أيدي وبعدين أرد
ولا داعي لتكرار جمله ليا عشان هتندرج تحت بند جنون العظمة وحب الذات اصله لسانه حلو وعلى طول بصراحه يدلع فيا بيحسسني أني أبن أخته الصغير وجايبه الشغل معاه
المهم قالي لو هتمشي سلم الشغل لحد
ودي كانت المشكله
رحت لحماده عزو
لأ مش يحي الفخراني
ده مهندس زميل
ودفعتي كمان من الكليه وقلتله تعالى اسلمك الشغل عشان لازم أنزل
قالي وانا كمان نازل
رغم ان عزو اكتر حد بيطلب مني اني اشتغل معاه في شغل مش بتاعي وعمري واللهي ما قلتله لأ
وكان أخرها أمبارح نفسه
بس يالا انا كده كده مكنتش هسلم الشغل لعزو عشان مكنتش احبه يلعب على المبيوتر بتاعي
اه على فكره شم عارف ليه في الشغل بيقولوا على اكمبيوتر مكنه
مش حتى ماكينه
المهم رحت لأحمد وفضلت أرخم عليه وهو بيتكلم في التليفون شعان يفك شويه وميبقاش متضايق
بس هو برضه متنحلي
فقلتله أحمد تعالى استلم مني الشغل شعان لازم أنزل
وهو مرضيش
وبدون الدوخول في كل التفاصيل
أنا فهمته صراحة أن في ناس من بدري مستنيني في الشارع وأني يأما هو يستلم مني الشغل يأما أسيب الناس واقفه في الشارع أكتر من كده
وكانت المفاجاءة
مرضيش يستلم مني الشغل
يعين فين بقى كل الكلام عن أصحاب وفين كل الكلام عن أنك فاهمني وغير الناس التانيه اللي بتاخد بالمظاهر
هو والحق يقال أكيد فاهمني عن بقيه الناس شويه زياده
أصله أمبارح جابلي بلانشيت هديه وكمان لونه برتقالي وشكله شم تقليدي أصل أنا احب الحاجات الغير تقليديه جدا
بس الموقف ده ضايقني أوي
مش أنه مش رضي يستلم مني الشغل
بس الموقف كله من بدايته
أنا فكرت كتير لاقيت ان السبب اللي نرفزه لما أنا قلت للمهندس خ اني مستني الشغل منهم ويمكن يكون شاف كده اني زي ما بيتقال عليها في قطاعنا بعته للمدير أو شربته كراويه وده اللي ضايقني
فين بقى كلامك على أنك فاهمني وعارفني
كونك تفتكر أني أقصد حاجه زي دي دي حاجه اصلا تجرحني
انا واللهي ما قصدتش حاجه زي كده
ده غير المهندس خ ده طيوب مووت
يعني ده طول ما أنا بشتغل معاه امبارح واللهي عمال يقولي كلام جميل
لما بيقول كل الكلام الحلو ده لحد زي
فما بالنا بحد زي أحمد ما شاء الله عليه ملتزم دينيا وطيوب وواخد باله من شغله
بس انا عارف المشكله فين
المشكله فيا شعان بصدق
أنا مكنش مفروض أصدق من البدايه كل كلامه ليا
مش عشان هو بيكذب ولكن عشان أنا مش معقوله أكون بالأهميه عند حد بالهمية انه يفكر شويه في تصرف من تصرفاتي
أنا طبعا مش بنفي أني غلطت بس معرفش شايف اني غلطي الأكبر اني سمحت لنفسي أني أخلط بحد من الشغل لدرجة أتصور فيها أننا ممكن نكون أصحاب واني ممكن أتشاف بصوره مش سطحيه شويتين
المهم
هو مستلمش الشغل وانا أخدت بعضي ومشيت قبل ما المهندس خ ينزل من عند رئيس مجلس الأداره
أي نعم نزلت لحاتم وانا بوزي شبرين
عشان حسيت ان احمد شم فارق كتير عن الباقين واني كنت غلطان لما كنت بفتح قلبي واتكلم معاه براحتي
لأن أيه فايده كل الكلام اللي اتكلمنا طالما في الأخر مش فارقه هتشاف بنفس الصوره بل أكتر أنا بيتهيالي لو مكنتش بتكلم معاه كتير كنت أصلا هفكر مليون مره قبل ما أقول له أي كلمه
المهم يدوب نزلت من شالركو وسلمت على حاتم لاقيت المهندس خ بيكلمني ويقولي ينفع كده
قلتله أنا تحت الشركة وطالع قاله خلاص أنا مستنيك
وطلعت وأنا هنفجر
لاقيت أدارتنا كلها موجوده بكامل العدد وقعدين يهزروا ويضحكوا
وفضلت أنا في مكتبي طلعان عيني في الشغل المهم خلصت على الساعه خمسه وكانوا كلهم ما عدى واحد نازلين ساعتها
واستنيت المره دي لغايه ما نزل المهندس خ وقالي تمام ممكن تمشي

أنا عارف أنه عادي أن زمايل اشلغل محدش منهم يحاول يساعدني
وصلا أنا مش بطلب مساعده زياده
أحنا بعد مواعيد الشغل وأنا لازم أمشي وهما كده كده قاعدين
ايه المشكله أنهم يكملوا اشلغل المطلوب
بس أزاي ما هو المدعو أنا متعود على كده وايه يعني لما يكون في ناس مستياني في الشارع
ما أنا
يالا ولا بلاش
أنا كده كده مش بيفرق معايه مين في الشغل بيبصلي ازاي او حتى بيعاملني ازاي
انا كل اللي يهمني
أني محسش أني غلط في حق حد
واي نعم بيني وبين نفسي شايف اني تخطيت الحدود شويه مع احمد بس واللهي المشكله اني صدقت
مش قلتلكم عندي مشكله

على الهامش كان نفسي اكتب عن الجزء الاكتر من رائع واللي أبتدى من بعد نزولي من الشركة في حدود الخامسه والنصف بتوقيت القاهره وعلى المقيمين خارجها مراعة فروق التوقيت واللي أبتدى بنوبه شديده الهيستريه من الــــــ مني وأنتهى بنوبه أشد من الضحك مني برضه بس هبقى أكتب عنهم بعدين شعان الموظفين بدأو يوصلوا اشلغل وعليه مفروض أرجع لقواعدي سالما وأربط حزام الأمان في مقعدي وأبدأ في تعاطي مج النسكافيه قبل ما يبرد