الملامة

النهاردة وأنا في طريقي للشغل

أنا أكتشفت أن كتير من كلامي بيبدأ بالجمله دي يمكن عشان الصبح بكون في قمة نشاطي وقرون الأستشعار مركزه ولا عشان يدوب بوصل الشغل وأبدأ أكتب أنفعلاتي

ولا يمكن عشان بليل الأحداث اللي بتحصلي بروح بعدها البيت وأنام وبالتالي مخي بيفضي اللي جواه

أنا كده مخي بيفضي اللي جواه وهو نايم

النهارده وأنا في طريقي للشغل كنت بدندن

أه صحيح أكون بس كنت بدندن عشان أنا النهارده ولأول مرة منذ شهور ألبس لبس صيفي تاني أي نعم فوق اللبس الصيفي كان لازم حاجه بكم لأني مش بستحمل البرد وأي نزله برد الله ما احفظنا بتقعدني في السرير أسبوع على الأقل لدرجة أن الدكتور كان بيشك أن عندي حاجه خطيره هي السبب في كده

النهارده وأنا في طريقي للشغل كنت بدندن بأغنية

أه الجمله دي فكرتني بأيام شغلي الأولاني كان أول شغل بعد التخرج أي نعم مكنش بعد التخرج على طول كان بعدها بسنه بس أهو كنت بطلت أكون عاطل وبقيت فرد مسئول متحمل مسئولية نفسه وكان الشغل في مدينة نصر وكنت بنزل قبل الساعه بشويه -منهم لله سواقين الميكروباس- وكنت بتمشى لغايه الشركة وكان مشوار محترم بس كنت بحبه مووت ومفتكرش مره مشيته وأنا متضايق منه يمكن عشان كنا في الصيف والجو كان بيكون حلو وكنت بحط سماعات الام بي ثري -اللي كان جايلي هدية منه- وأفضل أسمع بدري على الفودافون من سبعه لثمانيه وبعدها عيش صباحك والأدعية بصوت أحمد يونس وبعد الأدعيه بكون طبعا وصلت الشغل من نص ساعه بس مبيكونش مديري وصل ولكن مع أنتهاء الأدعية كنت بلاقية قدامي فطبعا عشان أسمعه لو نادى عليا فكنت بشيل السماعات وأنا متضرر

النهارده وأنا في طريقي للشغل كنت بدندن بأغنية قديمه

أنا مش عارف ليه مرتبط بالأغاني القديمة أكتر من الأغاني الجديده يمكن عشان بتعيشني حاله

أنا شكلي مش هكتب الموضوع اللي عايز أكتبه طالما عمال اقاطعني بالشكل ده

النهارده وأنا في طريقي للشغل كنت بدندن بأغنية قديمة وكنت بقول

لولا الملامة يا هوا لولا الملامة

لأفرد جناحي على الهوا زي اليمامة

وأطير وأرفرف في الفضا

وأهرب من الدنيا الفضا

وكفاية عمري اللي أنقضى

وأنا بخاف من الملامة

واه من الملامة

ياه هل فعلا الواحد ممكن يخاف من الملامة للدرجة دي

للدرجة اللي تأثر عن أنه يعيش بحرية

هو أنا بخاف من الملامة؟

ممكن

شوية

ساعات

مش دايماً

أكيد بخاف من الملامة

ياريت مخفش من الملامة

على الهامش

أمبارح عرفت أن عائشه مش هيبقى أسمها عائشه -رغم أني بحب أسم عائشه- ولكن هيكون أسمها رهف وفي أقتراح لتغييره إلى راما

أنا والحق يقال معرفش معنى الأتنين