فرح وعزومه

فرح وعزومه

رحت الفرح

المره دي كان الموضوع مختلف يوم الخميس كان يوم في الشغل غريب وكنت حاسس ان حواليا ضغوط كتير ونزلت وقابلت شخصيه مش لطيفة ولاقيت الحلاق قافل وبالتالي أضطريت أروح الفرح وذقني طويله

وأستعجلت عشان ألحق أنزل وأنا رايح أركب واحد ماشي جنبي عطس والهوا كتر خيره طير رذاذ مياه وكنت في قمة الزهق لدرجه أني فكرت أني أرجع على البيت ولما وصلت لاقيت أن نصيبي زي المره اللي فاتت مش بيجو ولكن ميكروباص- عجبني في تعليق للفراشه أنها بتقول ميكروباس- بس كنت ناصح المره دي وأخترت أخر كرسي ورا عشان ولا واحد يحط رجلي في ضهري ولا حد يسند أيديه على كتفي المهم وصلت القاعه بدري قبل العريس والعروسه بس كان في شويه ناس وقفت شويه وبعدين أصحاب محمد وصولوا وقفت معاهم لغايه ما وصل ما شاء الله كان فرح حلو وأستممتعت وأن كنت ساعات بأفور في أنفعلاتي بس أتبسطت كمان كنت مبسوط وأنا رايح وأنا بتفرج على الشجر والطريق

يوم الجمعه كانت العزومه

كنت متردد أروح لأني مش بحب التجمعات أو يمكن مبحبش السفر أو يمكن محبش أكون مع زمايل الشغل بره الشغل أو يمكن أو يمكن أو يمكن

رحنا في عربيه واحد زميلنا وأحنا في الطريق كان الجو حر بس أنا مش بكره الحر وبالذات لما يكون فيه نسمه هوا حتى ولو صغيره

وأنا بتفرج على الريف في الطريق وبعد ما وصلنا كنت حاسس أني بستنشق نفس الرائحه وبعيش في نفس الجو اللي كنت بقضيه فيه ثلاث شهور كاملين من أكتر من 15 سنه كنا متعودين نسافر على البلد كل صيف ونقضي أجازه الصيف كامله هناك بخلاف لكنه الكلام المميزه ليهم كمان بيكون ليهم رائحه مميزه أفتكر لما كنت أرجع من هناك وزوزو تشفني وتقولي أنت بقيت زيهم بتتكلم زيهم على الرغم من أننا كنا لسه أطفال

كنت بحب في بيتنا اللي هناك حاجات كتير رغم أني كنت بتخنق من مرور ثلاث شهور خاليه من الكاراتيه-اللي بيتاكل طبعا لاني كان عشقي الدائم ومازال- وكانت تسليتنا الوحيده بخلاف النوم لفترات طويله هي التفنن في كيفيه شرب البيبسي بمكعبات التلج أو عمل البيض بأشكال مختلفه أو حتى أن أي حد منا يصحى بدري عشان يلحق يأخد أي ثمار جادت بها حديقتنا قبل الأخرين على الرغم أنها في الوقت ده مكنتش مزروعه فاكهه زي دلوقت وكانت مزروعه خضروات بس حتى ولو كانت باذنجانه هي الحصيله فكنا نتناحر صباحاً على من منا سيلتقطها أولاً

ياه أيام

أول ما وصلنا البلد اللي كنا معزومين فيها شفت كتير من الأحداث بيمر أمامي

يوم وصلنا زمان للبلد

يوم سفرنا وعمايل الفطير اللي كان أساسي يتعمل يوم السفر الصبح عشان لما نرجع القاهره يكون سخن وطازه وعلى الرغم أني في بلد تانيه تختلف تماما عن بلدنا بس حسيت أني شايف نفس الأولاد اللي بيلعبوا في الشارع واللي كنت بشوفهم في بلدنا من سنين بعد ما أتغدينا تنحت أنا لدرجه أن طول الوقت لغايه المرواح وهما بيسألوني سكت فجأه من ساعه الأكل ليه-وكأني في العادي يعني بتكلم-

ش عارف كان يوم كويس ولا لأ بس منكرش أني ساعات كنت بضحك من قلبي وساعات بمثل بس كان في فذهني شويه مواضيع
على الهامش
كنا بنتكلم في التليفون وبعدين بيقولي النهارده أيه قلت النهارده السبت
أفتكرت أنغام-في الركن البعيد-