كان نفسي أقوله أني بحبه أوي

كان نفسي أقوله أني لوحدي تمام هو ماشاء اله في حياته ناس كتير انا لأ

كان نفسي أقوله أني معرفش حد تاني وأني من بعده مش هلاقي حد أتكلم معاه مش هلاقي حد أشاركه

كان نفسي أقوله ميمشيش وأني حتى وأنا بتطفل على حياته  أرحم من أنه ميمشيش

كان نفسي أقوله أني مش هقدر أكمل وهو مش هنا مش هستحمل الدنيا أكتر 

كان نفسي أقول حجات كتير أوي وجعاني وتعباني ومش هينفع ومش عندي حد غيره

بس مقولتش

بس كل اللي قدرت أقوله أني مش هقدر أكمل

أني مش عاوز نكون مع بعض

مقولتش أني  بطلب ده عشان بس مديش لنفسي حقوق

عشان بس مستناش

عشان لو اتصرف يبقى عشان هو عاوز يتصرف

لو اتكلم عشان هو عاوز يتكلم

لو زارني عشان هو عاوز يزورني

لو اطمن عليا عشان بس هو قلقان وعاوز يطمن

عشان مفضلش بالساعات ببص للشاشه واشوف امتى كان اونلاين اخر مره

وياترى وهو بيكلم اللي كان بيكلمه مكنش عنده دقيقه يبعت يقولي بس هاي

ازيك دلوقت

علشان مفضلش استنى في المكتب بالساعات مش بعمل حاجه غير اني بس استنى انه يعدي يسأل

كان نفسي أقوله  بحبك

كان نفسي أقوله أحضني عشان تعبت من الأحساس بالوحده

كان نفسي أقوله يفضل ما يمشيش

يخليه جنبي

عشان هو عاوز يكون جنبي

مش عشان انا عاوزه يكون جنبي

مخنوق اوي