أمبارح سواق التامسي اللي ركبت معاه من قدام الشركه علشان يوديني الجامعه كان مريب
أول ما ركبت قالي عشان نهرب من الزحمه ناخد كوبري صفط
وبغض النظر عن أني فعلا كنت عارف أنه عاوز يعمل كده عشان العداد يعمل مبلغ اكتر بس أنا فعلا كنت خايف أنه يمشي من طريق معرفوش
فقلتله لأ أنا معرفش الطريق ده ولو هو مش حابب يمشي من أي طريق من الطرق اللي أعرفها ممكن ينزلني ويمشي مكان ما يحب
قالي عيب لما تقول كده أنت راجل
قلتله أفندم أيه دخل ده بالموضوع
بس عادي كمل في الطريق اللي عارفينه ومكش في أي زحمه أطلاقا وكنت عاوز أقوله أهو الطريق فاضي
بس فعلا مكنتش عاوز أتكلم
في الجامعه اليوم كان ملل
الناس اللي بتعمل بريزنتشن وشريف بيعلق
ايميل المهندس خياط عشان الابريزل يكون موجود على مكتبه النهارده قبل حداشر
ايميل مستر جبران اللي بيديني فيه درس في الريزيرفور
وأخيرا أيميل مستر بيضون اللي بيطلب فيه نتقابل النهارده
وانا مروح أضايقت أوي عشان حاتم سألني حطيت قطره
فقلتله بتسأل ليه رغم اننا كنا مع بعض أمبارح طول اليوم ومسالتنيش
قال مكناش قاعدين مع بعض طول اليوم وكأنها غلطتي أني مرمي في مكتبي محدش بيعبرني
قلتله أنت تعرف أنا حطيت القطره أزاي
وأضايقت أني أتكلمت
بس كان نفسي أقوله أن يوم العمليه بليل برضه أضايقت لما كنا في العربيه مع إيهاب وقلتله على القطره وبكل تلقائيه قال لكريم متحطهاله ياكريم
بس حصل حاجه كويسه
أتكلمت مع داليا
وقالتلي أنها خست وشجعتني
فعلا الواحد لازم يحب نفسه والواحد لو عمل كده كل المشاكل اللي عنده ممكن تتحل
لازم فعلا أحب نفسي
محدش هيخاف عليا أكتر من نفسي
امبارح التعب زاد عليا أوي
مكنتش أكلت أي حاجه طول اليوم ولما روحت أكلت وبرضه فضل جسمي يرتعش
وأحساسي بالسخونيه بيزيد أخدت قرص فولتارين
بس برضه فضلت لغايه الساعه حداشر مش عارف أنام وتعبان
وبعدها بدأ مفعول القرص ونمت
بس قمت حاسس أني مش قادر برضه
حاولت أحجز عياده النهارده بس أتأخرت ولسه تعبان مش عارف أعمل أيه بفكر أخد أذن في نص اليوم وانزل أروح الصيدله أجيب فولتارين مش حاسس أني هقدر أكمل
عملت برضه موقف مش لطيف مع كريم النهارده بس واللهي ما كنت أقصد
بس كنت متضايق
أنا مش عاوز حد يحسسني أنه بيعمل شغلانه عشاني أو مكاني
أنا مش عاوز حاجه من حد
مش حاسس أني هقدر أعمل بنصيحه داليا وأحب نفسي
No comments:
Post a Comment