الضبابخير الله ما أجعله خير النهارده وانا في طريقي للشغل لاقيت الجو ضباب في ضباب
أفتكرت أيام ما كنت بسافر الزقازيق للجامعه كل يوم تقريبا والدنيا ضباب لدرجة أني مش شايف بدايه العربيه
حاجه كده كأنك بتخترق أبواب عشان تقدر تشوف اللي وراه
كمان أفتكرت أيام ما كنت بسافر للشغل والطياره تمر من بين السحاب وأحس أني بلمسه كأني مش على كرسي جوه مكان مقفول لأ كأني بمشي برجلي على السحاب
أنا بعشق الضباب
بس يارب مكنش زي بطله عاشقه الضباب لنبيل راغب لأني مكنتش في صفها خالص
بس بحب أحساس المجهول واللي لازم تقرب منه عشان تستكشفه يمكن بحبه عشان أنا بطبعي مش بحب المغامره بس يمكن يكون عندي شويه فضول
مش عارف بس بحب أحساس أني ماشي وسط الضباب يمكن لأنه هيديني عذر على تخبطي
حصل حاجه غريبه أمبارح
بقالي أسبوع بيدور في بالي أغنيه فكروني لأم كلثوم لدرجه اني لما كنت مع حاتم يوم الجمعه وقالي قالي على أغنيه دلوقت في بالك سمعتهاله وتحديدا
بعد ما صدقت أني قدرت أنسى
بعد ما قدرت قلبي يسلاك ويقسى
جم بهمسه وغيروني
كانوا ليه ليه ليه بيفكروني
والشيء الغريب اللي حصل أمبارح أني وأنا في السرير قبل النوم وماسك الروايه أيها اللي خلاص بجد نفسي أخلصها وارتاح منها لاقيت واحده من الأبطال -وهي ساره ورغم عدم أعجابي بيها بس منكرش أنها أكتر واحده شبهي في الروايه وفيها مني كتير- بتمر بحاله أسى وبتشغل الأغنيه وتحديدا الجزء ده من الأغنيه
طيب هو ده طبيعي؟
الغريبه أكتر
أن حالتها أتغيرت بعد الأغنيه
وأنا كمان كنت بسمع الأغنيه من اسبوع بحاله شجن
ودلوقت بسمعها بحاله فرح
واللى فات ننساه ننسى كل أساه يللا نلحق من الزمن أيام صفاه
دى الحياه من غير لقانا مش حياه واحنا مش حنعيش يا روحى مرتين
فكرونى إزاى هو أنا نسيتك ؟
ده انت اقرب منى ليه يا هنايا حتى وانت بعيد علىّ أو معايا
5 comments:
وماكملتش ليه؟
اكمل انا...
"تنتهى الايام
وتطوى العمر منا وانت حبك
انت انت
للابد
للأبد مالوش نهايه
حبك انت
مالوش نهايه"
:)
وعارف اكتر بحب انهى جزء فى الاغنيه دى؟
" وابتدى قلبى يدوبنى بآهاته
وابتدى الليل يبقى اطول من ساعاته
واسهر اسمع نبض قلبى بيناديك
روحى فيك مهما جرى انا روحى فيك
تسوى ايه الدنيا وانت مش معايا
هى تبقى الدنيا دنيا الا بيك "
عارفها؟ :)
ازيك يامقيد
انا مبسوطه اوى انك مبسوط ومرتاح ربنا يسعدك دايما يارب
بالمناسبه انا بحب الضباب بس علشان لونه لانى بحب احس باللون الابيض حواليا
وعارف بحب ايه أكتر؟
ان الجو يكون برد وانا دفيانه واقعد اعمل البخار بالنفس بتاعى كده بيبقى شكله حلو وانا بلخبط حركته بايدى
:)
تعرف نفسى احس باحساس انى بين السحاب ده
بيتهيألى هكون اسعد حد فى الدنيا واهو من غير عصايه سحريه :)
على الهامش
اللى معلقه معايا دلوقت ليها وبسمعها مرتين تلاته كل يوم هى اغنيه بتفكر فى مين. سمعتها؟
على الهامش تانى
ربنا يشفى بابا ازاى اذا كان توفاه الله من 8 سنين وقت الحكايه اللى قلتهالك :((
نسيت اقولك
قول انا جبت ايه من النت من كام يوم؟
انا هقولك
حب ليس الا :)
وماصبرتش اقراهاكلها خصوصا ان وقتى مشحون رحت قريت اخر فصل
جامد يامحمد جامد جامد
بس انت ليه نسيت تقول فى الجزئيات اللى عجبتك الجزء ده
"وكأنه يقول لي: اهدئي! فكري! اتركي نفسك لي! غوصي في عيني! أجيبي بثقة وتأن! لأني احتاجكِ! اشتاقكِ! احبكِ فرح وسأظل!..."
انا حسيت انى دخت لما قريته وقلبى وجعنى بجد
استنى بقى تعقيبى انا كمان على الروايه لما اقراها كلها بعد الامتحانات ان شاء الله وان كنت بحب اقرا من الكتاب نفسه وبكره قرايه الكمبيوتر دى بس يلا اهو نسلك لحد ماادور عليها :)
ملحوظه
اوعى تطلصق فى الرد عايزى الرد على الكومنت حته حته
مليش دعوه
بس
:)
حبيبه
ايه ده انتي حافظه بقى
انا بقى بحب الجزء ده
بعد ما اتعودت بعدك غصب عني
بعد ما نسيت الماني والتمني
كلمتين اتقالوا اتقالوا شالو الصبر مني
انا كويس الحمد لله ويارب الماده الرابعه تبقى احسن كمان من الثالثه
على فاكره بيتهيالي كل بتوع هندسه مش بيحبوا المواد النظري ومع ذلك القسم بتاعنا كان فيه نظري كتير عشان كده كانوا بيسمونا آداب هندسه
مش عارف ساعات بحس اني سبب تاني لحبي للضباب هو حبي للغموض رغم اني واللهي مش غامض ولا حاجه بس منساش ان حد من الزملا مره بيقولي انت ليه بتصمم انك تحيط كل علاقاتك بالغموض
وكل ده عشان ليه اني ممكن لما يجيلي تليفون اخد جنب واتكلم بصوت واطي رغم ان اللي بيكلمني زميل تاني أو صديق عزيز
أنا مش ذنبي ان التفكير السيء عند البعض ممكن يطغي ومكنتش بحب انهم يبرروا ده بان فيه شواهد وبأني مفروض اتجنب الشبهات
للأسف احساس اني بين السحاب مكنتش بحسه كتير لأني كنت مش الأصغر سنا بس الاصغر حجما وملامحا وكانت مواعيد سفري كتير بتكون متلغبطه فكنت ساعات انزل بري ولما اكون مظبط ميعاد سفري كنت طبعا اقف محترم لغايه ما حد يوسعلي عشان اطلع فالاقي كل الاماكن اللي جنب الشباك مشغوله رغم انهم بيكونوا هيناموا وهيقفلوا الشباك بس مش عارف هو كده هيقعدوا جنب الشباك برضه ولما كان يكون حظي كويس الاقي ان الشباك اللي انا جنبه بيبص على الجناح بس
:)
بس هو فعلا احساس رائع رغم اني زي ما قلتلك مش دايما بيكون متاح :)
أه طبعا اعرفها وبحب الجزء اللي بتقول فيه
كل نار تصبح رماد مهما تقيد إلا نار الشوق يوم عن يوم تزيد
ابعت لي قل لي انت فين لو تقدر
بستني منك كلمتين مش أكتر
يطمنوني حبهْ عليك وع المحبه
تعرفي ان حبي لأم كلثوم ابتدا بدري أوي وابتدى مع الأطلال وكنت تقريبا في رابعه ابتدائي
وبعشق ودارت الايام
على الهامش
الله يرحمه أنا معرفش واللهي بس انتي كمان موضحتيش انتي بس قلتي لما زاد المرض
أسكنه الله فسيح جناته
انا فاكر الجزء ده أوي وهي واقفه قدامه بتتمالك نفسها عشان تجاوب على أسئلة المناقشه
لا برافو
بس انتي مش عندك مذاكره وترجعي تشتكي من الدكاتره ومن عبير ورغده ونورهان
:)
فعلا القرايه من الكاتب الطف واهو الواحد كمان يقلل القعده قدام الكمبيوتر شويه
على الهامش
رد كومبو مخصوص
حبيت البوست دة أوي
وصفك للضباب جميل :)،و إحساس إنك ماشي على السحاب دة بحبه أوي فعلا
الضباب بيفكرني بأيام المدرسة وأنا صغيرة أوي..عشان في ثانوي كنت في مدرسة قريبة من بيتي فكنت بنزل على آخر معاد الطابور علطول:) لكن قبل كدة كنت بصحى من بدرييي في الشتا أتفرج من الشباك لحد ماباقي العائلة تصحى
الضباب كمان بيفكرني بالكويت أوي
بجدحبيت البوست
حبيت أكتر إحساس الراحة اللي حاساه في البوست دة واللي قبله...وكنت بتمنى يستمر أكتر
عزيزتي الفراشه
بيتهيألي في ثانوي محدش كان بيحضر الطابور
أنا كنت في مدرسه في اولى ونقلت في تانيه وتالته لمدرسه تانيه ولما كنت في تانيه ثانوي مكنتش بحضر غير بعد الحصه التانيه
هو الاحساس بالراحه راح؟
:)
يالا الحمد لله على كل حال
انتي ناسيه ان الحياه يوم حلو ويوم مر
على الهامش
مش عايزين تأخير تاني في الرد بعد كده هحط صندوق واللي يتأخر يدفع غرامه
Post a Comment