مش عارف مالي
أختار الأختيار وأرجع احتار
وأفضل أسأل هو كان صح ولا غلط
بقالي كم يوم بيدور في بالي أغنيه ماجده الرومي شكرا لطوق الياسمين
شكراً.. لطوق الياسمين
وضحكت لي
وظننت أنك تعرفين
معنى سوار الياسمين
يأتي به رجل إليك
ظننت أنك تدركين
وجلست في ركن ركين
تسرحين
وتنقطين العطر من قارورة و تدمدمين
لحناً فرنسي الرنين
لحناً كأيامي حزين
قدماك في الخف المقصب
جدولان من الحنين
وقصدت دولاب الملابس
تقلعين .. وترتدين
وطلبت أن أختار ماذا تلبسين
أفلي إذن ؟
أفلي أنا تتجملين ؟
ووقفت .. في دوامة الأوان ملتهب الجبين
الأسود المكشوف من كتفيه
هل ترتدين ؟
لكنه لون حزين
لون كأيامي حزين
ولبسته
وربطت طوق الياسمين
وظننت أنك تعرفين
معنى سوار الياسمين
يأتي به رجل إليك
ظننت أنك تدركين
هذا المساءبحانة صغرى رأيتك ترقصين
تتكسرين على زنود المعجبين
تتكسرين وتدمدمين
في أذن فارسك الأمين
لحناً فرنسي الرنين
لحناً كأيامي حزين
وبدأت أكتشف اليقين
وعرفت أنك لسوى تتجملين
وله ترشي العطور
وتقلعين وترتدين
ولمحت طوق الياسمين
في الأرض .. مكتوم الأنين
كالجثة البيضاءتدفعه جموع الراقصين
ويهم فارسك الجميل بأخذه
فتمانعين
وتقهقهين
" لاشيء يستدعي انحناْكذاك طوق الياسمين .. "
مش عارف كنت مستغرب انها بتقولها كده ببساطه
انا شكلي لسعت القصه الجديده مأثره عليا
ساره ونورا ودينا التلاته كل منهم حكايه لوحدها
مش عارف ايه اللي بيحصلي دلوقت
مش عارف ليه الأغنيه فكرتني بساره في القصه رغم ان في القصه ساره أتغدر بيها مغدرتش بس بحس انها زي بطله طوق الياسمين
تقريبا الأغنيه كانت بتدور في ذهمي عشان نفسي في الورد والياسمين تحديدا بيني وبينه عشق
بحب ملمسه
بردان أوي رغم اني تحت البطانيه والباب مقفول والبلكونه مقفوله
من يومين راجع من الشغل بعد ما شفت أحمد
هو انا هعمل ايه في موضوع أحمد؟
لما صدقت أنه أجازه الأسبوع ده والأسبوع اللي جاي كمان عشان أقدر أفكر كويس
رغم أني عارف نفسي أن في البعد بيكون فيه أحلام ورديه أول ما هتحط في واجهه هتنهار بس برضه كان عندي أطمئنان
ولما وصل الشغل أمبارح قبل الأنصراف بشويه صغيره حمدت ربنا أن كان في أيدي شغل وبعدها هربت وروحت
والنهارده اتكرر نفس السيناريو
بس هقدر أكمل لغايه أمتى على كده
إذا كنت دلوقت مش بستحمل نص ساعه اشوفه واحس انه ممكن يكون متضايق واني انا السبب والموضوع مش متعب مش هيكلفني اكتر من ابتسامه وشويه ضغط على اعصابي هيرتاح هو بعدها وهنسى انا كمان بعدهم
بس انا مبقتش عارف
هو ده حل؟
هو ده هدف او غرض مفروض احطه دايما قدام عيني وهو اني مسيبش حد متضايق وانا عارف اني طرف في ده أو ممكن احل ده ولو الموضوع كده فليه سيبت حاتم يمشي زعلان يوم الأتنين
يوم الثلاثاء وانا مروح سمعت في الميكروباس-أصل ساعات ذوقهم بيتحسن- أغنيه أصاله يا صابره يانا
في ناس ظلمها النصيب
وناس ظلمها الغريـب
لكـن يـا عيـنـي آه
آه عاللي أنظلم من الحبيب
ويا صبره يانا يا مداريـه
يا محيره كـل المداويـة
النـاس بتمسـح دمعتـي
وحبايبي ولا سألوا عليّـه
روح يـا نــدم بعـيـد
روح يـا ألــم بعـيـد
قلبـي الجديـد عنـيـد
مــش زى زمـــان يرضـى بـأي هــوان
أنا خلاص فـاض بيـه وصعبـت نفسـي عليّـه
وقلت لإمتى رح أفضـل صبره وعليـك مداريـه
شوف كنا بنحكـي فإيـه أنا وأنـت مـن يوميـن
وشوف النهار ده يا حبيبي أنـا فيـن وأنـت فيـن
شـوف عنـادك ضيـع الـحــب الـكـبـيـر
كـان عنـادك أقــوى مـن صبـري بكتـيـر
خـلـى قلـبـي مــن عمايـلـك مستـجـيـر
سعيتها قلبي وجعني رغم اني كنت لسه واخد شحنه تفاؤل من أيميل وصلني قبل ما أنزل
وساعتها حسيت انها كالعاده رساله مفروض افهمها كويس بس تفكيري وقف لغايه اني خلاص فاض بيا
والهي العظيم فاض بيا
بس رجعت بصيت تاني وفهمت من تاني كلام تاني
ورجعت أحتار
حيران أوي رغم ان الأجوبه كتير بس دايما الأسئله أكتر
النهارده كان جيبيلنا مهندس جديد أصغر مني بدفعتين بس أخوه كان دفعتي
مكنتش بستلطفه كتير
بس أخوه ملوش ذنب وكالعاده لأن الأوضه الوحيده اللي فيها مكتب فاضي هي أوضتي فالمدير قال يقعد معايه وكمان يشتغل معايا
بس أنا عارف اني أوضتي مش بيعيش فيها حد غيري
مر على المكتب ده تلات مهندسين ومحدش كمل عليه اللي ساب الشركه وسافر واللي سابها وراح شركه تانيه واللي أضعف الإيميان راح مكتب تاني فمقلقتش
حاسس اني بتوه على نفسي عشان كعادتي مقولش اللي بحسه
بس مش عارف من ساعه ما حاتم كومنت المره اللي فاتت وانا مش حاسس اني ممكن أكتب براحتي
مش مفروض اسيب نفسي للتفكير ده
أول مره أعملها وأكتب كلام وبعدين أمسح منه هو اللي أنا عملته دلوقت
أنا مش عارف اعمل ايه مع أحمد
ولا عارف أعمل أيه مع حاتم
ولا حتى عارف هشرح أيه للمهندس الجديد بكره
أه أفتكرت خالد-المهندس الجديد- أنا كنت كتبت على ورقه في الشغل أحنا هنشتغل في أيه بكره بالأضافه الى أن بكره الخميس يعني آخر الأسبوع يعني الدنيا بتكون هاديه
ساعات أفضي الدنيا كلها حواليا من الناس وافضل اشتك اني دايما لوحدي
أترددت كتير أني أكتب الجمله دي عشان عارف ان بسببها ممكن نتقابل بكره ولو متقبلناش فبرضه هقول انها هي السبب او أنت اللي هتقول انها السبب
مش عارف ليه انا احتديت في الرد عليك المره اللي فاتت رغم انه خلاص بقى أمر واقع
أنا هنا محمد مش مقيد على الاقل بالنسبه لك
وأنت هنا حاتم مش ولو
وحتى لما كنت زمان بكتبلك كومنتات كنت محمد وكنت أنت حاتم
بس يمكن عشان الموضوع فيه زعل فأضايقت انك أخدت من كلام هنا كتبته عشان أفضفض وأرتاح سبب أو دليل
تعرف في الروايه الجديده نورا بتكون متجوزه خالد ولما بيحصل خلاف بيروح لأهلها ويقولهم على أسرار في حياتها هي اللي حكيتهاله مختاره مش مضطره ومع ذذلك وقت الزعل أختار كلمها عشان يحاربها بيه
جرحني أوي تصرفه ده
بس فعلا كلنا بنغلط وكلنا لازم نسامح
سألتني لما أتقابلنا يوم الأتنين إذا كنت عملت حاجه مزعلاني وقلتلي انك المره دي بجد مش عارف وان لو في مرات كنت عارف فالمره دي مش عارف
مريحتكش ساعتها وقلتلك لأ واللي يمكن بتعني آه أكتر ممابتعني لأ
بس الحقيقه اننا مش قريبين أوي زي ما أنت فاكر
فاكر المره اللي مش بتحب أفكرك بيها
آه لما وقفتني تحاسبني وقلتلي أنا أعرف عنك أيه
أيوه أنت كان عندك حق
أنت بتحكي لما بيكون في أزمه
وانا سبق وقلتلك يمكن من يوم ما عرفنا بعض
أنا مش عايز أعرف حاجه أنت مش عايز تقولها
ولا كمان يوم مقلتلي أني مقدرش أساعدك في اللي معرفوش
حسيت اني عايز اعرف أكتر من اللي بتقوله
بس يوم الخميس
فاكر
أول يوم أتقابلنا بعد ما أنت رجعت من السفر
وبعد كم يوم كان كل اللي بينا فيه رسايل موبيل
وبعد يوم الأربعاء يوم عاشوراء لما فطرت مع أحمد وقضيت معه اليوم
فاكر يومها أنت قلتلي أيه
قلتلي كلام كتير حلو
قلتلي ان الكم يوم اللي فاتوا افتكرت فيهم حاجات كتير
وقلتلي ان اللي بينا كبير
وقلتلي انك مش عايزني اتعب لأنك عارف لما بتعب بتكون حالتي أيه
وساعتها خلتني أخد بالي أن موضوع أحمد زي موضوع حسين
يومها خفت
خفت يكون تأثيري عليك أوحش من توقعاتي
يوم الجمعه لما كنا رايحين نشتري بندق
يومها حسيت ان اللي بينا مش كبير زي ما بتقول
يومها قلت اديك الفرصه انك تشوف وانا كمان اشوف
أشوف ممكن فعلا أحاول أكون حد أفضل وأتعامل معاك أفضل وأقدملك أفضل
وأشوف فعلا أنا بالنسبه لك فين
يومها حستنا بنبعد
مش بنبعد عشان في مشكله
بس بنبعد عشان مينفعش نقرب
يوم السبت حاولت أتناسى الموضوع بس لاقتني باتقوقع امتر لأقتني بجد مش قادر أتعامل وكأن مفيش حاجه
وفي نفس الوقت مش هقدر اقولك ان في حاجه
لأني مش محتاج أنك تكدبني او تقول أحساسي غلط
لأن الموضوع مبقاش حاجه تخبيها وأعرفها بالصدفه او معرفهاش
أنا فعلا أبتديت أحس ساعتها أن خلاص
فاكر أيام شغلك الاولاني
فاكر الأجنده اللي كنت بتكتبلي فيها كل يوم طول الأربعتاشر يوم اللي كنت بتكون فيهم في الشغل وكنت أتخانق معاك لو يوم كسلت ومكتبتش
ده ملوش علاقه بحياتك عامله ازاي
ولا كان ليه علاقه بحالتي عامله ازاي
فاكر مدونتي القديمه
فاكر الأيميلات اللي كنت بتبعتها
أنا كمان فاكر حاجات كتير لينا كانت سوا ومبقتش
الموضوع ملوش علاقه بأني مكانتي أد أيه جوه قلبك ولا مكانتك أد أيه جوه قلبي
الموضوع أحنا أزاي بقينا بنعامل بعض
تعرف اني لما شفتك يوم الأتنين كان عصام وشريف لما شافوا الأفلام العربي على الاب توب سألوني من أين قالتهم من حاتم فكل واحد طلب منهم طلب وقلتلهم لما أشوفه ولما شفتك مقدرتش أطلب
كنت زمان بتمنى أني مبقاش متطلب عشان ساعتها هريحك من مشاكل كتير بعملها بكوني متطلب
بس ساعتها حسيت انه صعب عليا أطلب
صدقني حاولت في أكتر من مره أني اتكلم
بعد صلاه العصر حاولت أتكلم بس مقدرتش
لما قلتلك تعالى نمشي على كوبري قصر النيل لأني عارف أننا لو كنا نزلنا المترو مكنتش هقدر أتكلم وكنت هفضل ساكت كنت عشان أحاول أتكلم بس برضه مقدرتش
لما كنا في المترو ودموعي سهتني ونزلت قلت هتكلم وصدقني مكنش عند معاك بس لما مسألتنيش محبتش ساعتها أكون ممتطلب وأحكي
عشان كده مبقتش بقدر أحكي
اخيرا أرتحت
بقالي أسبوع نفسي أعيط لأن الدموع بتريح
أنا عارف كويس النوع ده من الدموع اللي بيحرق في القلب وهو بينزل بس زي أي جرح بعد الكي بيتطهر وبيكون أحسن
صدقني أنا عارف أني شرير من قبل ما أتكلم
عارف أني مش بقدر أي ظروف
مش هقولك أن أكبر مشاكلي أني بصدق بس هقولك أن بجد الموضوع واضح المره دي
كنت بتلومني أني بقيت مشغول رغم اني مش عارف مشغول في ايه وان ردودي على التليفون كلها بقيت ردود سريعه وكاني مضطر فيها أني أرد مش برد عشان عايز أرد
بس هي دي كل المكالمات اللي جمعتنا في الكام يوم اللي فاتوا
مكالمات من عينه أخبارك أيه
تمام الحمد لله
بتعمل ايه
مبعملش حاجه الحمد لله
كنت بطمن
عارف اني يمكن مكنتش صاحب المبادره في ولا مكالمه منهم
ومقدرتش أنك ممكن تكون لسه رجلك بتوجعك أو يكون البيت فيه مشكله
أو تكون أنت نفسيتك تعبانه لأي سبب
وهو ده اللي أقصده
أنا مبقدرش
وانت بتقدر تعيش
بردان
ممكن الواحد يكون عنده أكتفاء ذاتي من الأحساس بالأمان؟
كانت ايام صعبه شويه
بس كان لازم تمر عشان تعرف انك اهو تقدر تحافظ على حياتك بالشكل اللي تعوزه
قولتلي في رساله انك هتكون موجود لما أحتاجك
وساعتها زعلت أوي وقلتلك لو مش عايز تكون موجود عشان أنت عايز ده فبلاش
بس صدقني برضه صعب انك تكون موجود لما حد يحتاجك
أنا عارف نفسي عارف أني مكنتش موجود لما كنت بتحتجني
أو رسايلك بتقول كده
بس خلاص
أنا مش عايز أتكلم في كل التفاصيل دي
أحنا أصحاب وهنفضل أصحاب أن شاء الله
يمكن محتاجين بس فتره صمت
أو يمكن أنا بس اللي محتاج لفتره الصمت دي
ياريت أحمد هو كمان يفهم
اني كنت عايش قبل ما أعرفه
واني مش بالشر اللي بيشوفني عليه
ولا بالضعف اللي بيتوهمه
بس كمان مينفعش نكون اصحاب هي دي الحقيقه
مش كل البشر ينفعوا يكونوا اصحاب
في ناس الاختلافات بينهم بتفرق
ومش عايزه في يوم يحاسبني ويقول اني كنت السبب
كل اللي محتاجه دلوقت دش دافي يهديني
4 comments:
لما يكون اتنين عصبيين مش بينفع يفضلوا مع بعض
و لما يكون اتنين هاديين أوي أوي برده مش بينفع يفضلوا مع بعض
لازم يبقى فيه اختلاف عشان يبقى فيه أحداث و حياة بينهم
معلش... يمكن دة الطبيعي إن كل شوية تبعدوا و ترجعوا تاني. يمكن لما ترجعوا تاني ترجع صداقتكوا أكبر من الأول
يارب ربنا يسعدكوا انتو الاتنين أوي
بس بجد... انتو تستاهلوا بعض.ومحدش فيكوا المفروض يحس إنه وحش و بيدايق التاني. انتو الاتنين عارفين كويس أويييي أد إيه بتحبوا بعض
ياريت تبعدوا الشيطان دة بأة عنكوا
بحب أغنية طوق الياسمين جداااا من صغري.بجد جميلة
يارب يسعدكوا
عزيزتي الفراشه
تعرفي ان ده كأن رأي واحد صاحبي ان الأتفاق التام بين الشخصين بيكون مصدر بعد وكنت بقاوحه وأقوله لأ
أي نعم لو مثلا أنا شخص متطلب وبيكون نفسي في حاجات معينه بتديني أحساس معين بس برضه ده ميمنعش أن ده هيكون حاجه تقرب مش تبعد لأن الواحد هيكون متفهم ده أيه ده بيفرق مع الواحد
بس واللهي دلوقت مبقيت عارف ايه اللي بيفرق وايه اللي بيجمع
هو على العموم كنت بتكلم في الجزء ده عن زميلي في الشغل بس انا وحاتم مبقتش عارف بصراحه هو فعلا البعد بيقوي ولا بيضعف
بس بيتهيألي كل مره بيكون في خلاف والخلاف يكبر بيسيب حاجه جوانا
أنا منساش موقف مر عليه أكتر من سبع سنين من قبل ما نبقى أصحاب أوي أوي يعني كنا في تانيه جامعه وكنا بعد أمتحان غلس خرجت منه قبل نص الوقت ومستنتش حد ورحت المكتبه وبعدين روحت بس وانا جنب البيت قابلته هو وزميل وسألوني عملت أيه وكانت الأجابه على وشي بس اضايقت انه بعدها محاولش يكلمني لغايه ما كان صابح أمتحان الماده اللي بعدها واتصلت وانا من جوايا زعلان أنه محاولش يسأل عليا فأكتشفت أنه كان تعبان طول الأيام دي والدكتور قاله ان الموضوع أحتمال يكون محتاج عمليه ويومها أحتقرت نفسي أوي أني مكنتش جنبه في وقت زي ده لأني كنت مستني هو اللي يكون جنبي
هو ده اللي أقصده أن كل بعد بيسيب علامه حتى لو صغيره
والموضوع خلاص مبقاش صغير
ومش موضوع شيطان بينا
هو بيسأل أنا بقيت فين
وأنا أكتشفت أن مع الوقت فقدت حتى أبسط الحاجات
أنا مبقتش عارف نوع المزيكا اللي بيسمعها دلوقت شكلها أيه
معرفش أسبوعه الكامل في الشغل بيعمل فيه أيه رغم أننا في شركه واحده وبنشتغل نفس المجال
ده أحنا أيام ما هو كان بيشتغل حاجه وانا حاجه تانيه كنت أعرف عنه أكتر
أنا مش بتكلم في أسرار
أنا بتكلم في أبسط الحاجات
عن شكل يومه
عن طعم أيامه
عن أحساسه بالنهارده وبكره وأمبارح
مبقتش بتكلم عن أحساسه بيا عامل أزاي
بس بتكلم عن احساسه هو بنفسه عامل ازاي
ده اللي فقدته
وبيتهيألي الوقت صعب أننا نرجعه لورا عشان نعيشه
والموضوع خرج بره حايز أننا فعلا بنحب بعض ولا لأ
الموضوع كمان بيتهيألي مش موضوع حقوقنا على بعض
والموضوع مبقاش وجودنا المادي في حياتنا
أحنا ممكن تبعد بينا أميال بس نحس أننا سوا وممكن يكون بينا شارعين ونكون أبعد ما نكون عن بعض
زي الأيام دي
على الهامش
في الخلفيه بالصدفه أغنيه سميره سعيد
نفسي أتكلم تاني معاك
نفسي عيوني تكون شايفك
ياللي بعدت عليا كتير
أرجع ليا لو وحشاك
يمكن فهمت اكتر من ردك على فراشه عن كلام البوست
حسيت انك تايه شويه ف البوست :(
مش هقولك زعلتنى زى كل مره لانك زعلتنى فعلا بس مش عايزة اقولك علشان مش تقولى انك شرير
انت عندك حق فى كل اللى قلته وان ابسط الحاجات اللى انت عايز تعرفها بتفرق كتير لما تعرفها رغم بساطتها بس هرد عليك بالموقف اللى انت حكيته بتاع الامتحان
اقصد اقول يعنى انك ماتحكمش من غير ماتعرف المانع علشان مش تتعب وتضط على اعصابك
يمكن يبدو الكلام اهل شويه من الفعل بس صدقنى ده منطق برضه
عايزه اقولك بس لما قريت البوست اتمنيت لو انى مكنتش قريته مكتش احب احس ان فى زعل بينك وبين حاتم لانى ببساطه مش انا اللى هقولك هو بيحبك ازاى؟
يكفى انى لما قلتله محمد احسن منك ده سأل على امتحانى وانت لا قالى انتى بتتكلمى فى ايه ماهو محمد احسن منى فعلا وانا عارف ده كويس :)
شفت بقى؟
الدموع بتريح بس غاليه دموعك اوى يامحمد
بلاش تسيب نفسك كده:(
عندى كلمه اخيره
بخصوص احمد اللى انا معرفش ايه سبب انك مش قادر تتحمله وحا انك انت وهو ماتنفعوش اصحاب
لو بجد حاسس انك مش قادر تكمل صارحه باللى مزعلك منك واستجمع جرأتك لده لانك مش هتقدر تصمد كتير قدام تصرفات بتتعبك
لا كلمه تانيه اخيره
ماتقولش كتير انا وحاتم ماننفعش نكمل اصحاب لانك مش تلاقى حد يحبك زيه هو بجد خساره ماتفرطش فى حد شايلك حب زيه فى قلبه :)
سلام ياعسل والبوست الجاى اتمنى تكون احسن يااااااااارب او طمنى فى الرد
حبيبه
عملتي أيه في أمتحان أمبارح يارب يكون كويس
معلش انا كنت لما بكتب في لحظه أنفعال بيكون كلامي مع نفسي مشوش شويتين وعشان كده البوستات دي بتكون شويه غريبه
وانا كده كده عارف اني شرير من غير ما تقولي اني زعلتك:)
المنطق صح بس أنفعالتنا في كتير من الوقت مبتخضعش للمنطق وبننسى نشغل في الوقت ده مخنا
صدقيني فعلا زي ما قلت لفراشه هو مش بقى موضوع بيحبني أد أيه ولا حتى بقى موضوع تعبير عن الحب ده بالكلام ولا بالتصرفات
بس الموضوع دلوقت هو واقع بنعيشه مش مفروض نضحك على نفسنا أكتر من كده
متقلقيش عليا أنا دموعي بتريحني اكتر من ما بتتعبني
وانا مش سايب نفسي لحاله من الحزن أنا الحمد لله زي ما قلتلك قبل كده بأكل كويس وبنام كويس وبعرف أبتسم في وش اللي حواليا كويس
:)
Post a Comment