بندق

بندق

كان في كارتون زمان أسمه بندق وأخته بندقه وكان بصوت عبد الرحمن أبو زهره
ورغم اني بقالي أسبوع بدور على ان شالله صوره للكارتون ومش لاقي بس لسه على أصراري أني أسمي الكمبيوتر الجديد بندق

نزلت من البيت يوم الجمعه وانا مش مخطط اني أشتري لاب توب تحديدا بس عارف اني كنت نازل ومصمم أشتري حاجه جديده تخرجني من حاله قديمه

حاولت أني أرسم في شفايفي بسمه وأنا بشتريه وأستمتع باللحظه بس مش عارف ليه بعدها حسيت أني في حاجه في قلبي مش مبسوطه

مش حاسس أن شراء حاجه جدديه المره دي خرجني من حالتي

حتى بعد ما أشتريت الشنطه اللي كانت عجباني ليه شويه وفقدت أستمتعي بيها هي كمان

فكرت أني بعد الشغل النهارده أنزل أشتري حاجه جديده في اللبس
أي حاجه حتى لو مجرد كوفيه جديده
بس مش متأكد أن الشراء في حد ذاتها بقى فعال

مش عندي أكتئاب
مش متضايق من شيء محدد
حاسس أني بنزل من فوق مكان عالي
وعمال أنزل مش قادر أقف

أمبارح حاولت أفضل طول اليوم مع بندق – كمبيوتري الجديد لسه مش واخد أني أناديله ببندق- يمكن أخد عليه
يمكن نبقى أصحاب
برضه مقدرتش

فجأه حسيت بالكآبه ورغم أني نزلت تحت الميه السخنه واستمتعت بأحساسي بطبيتها فتره طويله بس برضه مستريحتش

رغيت مع أختي كتير أمبارح رغم أن بقالنا فتره الدنيا واخد كل واحد مننا في سكه رغم ان طول عمرنا قريبين جدا من بعض

حكيتلها عن تصرفات زمايلي السخيفه وشفت الدموع في عينيها وحسيت أهتمامها الجاد ورغم كده بعد ما سيبتها ونمت محلمتش غير بالكوابيس

صحيت الصبح ونزلت من البيت وبحاول ارسم الابتسامه اللي قالت عنها ذات القلب النابض قبل كده

قد تعني أبتسامتك للآخرين أمل لكنها تعني لك الحياه

وحاولت أني أسمع النصيحه وأحاول يكون عندي شويه طموح زياده

وصلت الشغل وشفت بوست عند جيرنيمو
حسيت أنها بتتكلم بصوتي
دي حتى كانت بتتكلم بصيغه المذكر على غير عادتها وطبيعتها

بعدها شفت بوست غاده عن أبنها تميم وحياتها بعد ما أصبحت أم
واد ايه حلو أوي أنك تفيد غيرك لكن متضيعش نفسك

عندي أحساس بالتوهان

يمكن محتاج أحكي
يمكن محتاج أسكت

يمكن محتاج أضحك
يمكن محتاج أعيط

مش عارف أيه اللي ناقص في القصه

مكنتش بفكر أبدا ان قصة أحمد شبه قصة حسين لغايه ما حاتم قالي
فعلا
مش بس كده ده فيه قصص كتير في حياتي شبه بعضها

كان نفسي أكتب عن بندق
وأحلامي ليه
وطموحاتي بيه

بس مش عارف مالي

نفسي أعرف أكتب براحتي من غير خوف

نفسي أقدر من تاني أتعامل مع الناس من غير ما أحس الرعشه في جسمي

كنت حاسس أنها فرصه عظيمه أن أحمد غايب من أول النهارده ولمده أسبوعين عشان كورس الأنجليزي وبكده هقدر أقيم الموضوع من بعيد واخد قراراتي براحتي

بس مش المشكله أني أحدد

ودلوقت كمان بقى في الموضوع الجديد

على الهامش

مش عارف أيه اللي خلاني أنشر الكلام

رغم أني من يوم الجمعه وانا بمسح اللي أكتبه

بس يمكن محتاج أكتب زي زمان