أسئله من غير أجوبه

هو لو الواحد يطلب من الناس متعملوش بالمثل يبقى بيكيل بمكيالين؟

القصه تبدأ بأن ليا أسلوب مميز إلى حد ما في التهرب من الأسئله وبيريحني شويتين ومع ذلك تلاقني لما أستعمله ما حد كتير يبدأ هو كمان يستعمله معايه ومش بتضايق بس اللي بيضايقني أنه مش بصمه اللي قدامه وانه بيستعمله وهو متضايق بس بيستعمله عشان بس يعاملني بالمثل

هو ليه الواحد بيحاسب ناس بذنب ناس تانيه؟

ساعات واحد يعمل موقف يضايقني فأبتسم في وشه وأعدي الموضوع والحمد لله بنجح في ده من وجهة نظري حتى لو كنت فاشل في ده من وجهة نظر ناس تانيه بس لأني بشوف أني مش مفروض أفقد أعصابي ولازم أكظم غيظي فتلاقيني وبكل بساطه أتحاملت على نفسي وضحكت وأتكلمت او أضعف الإيمان سكت خالص وألتزمت الصمت بس بمجرد أني أتعامل مع شخص غير اللي مضايقني – بس لازم الجديد يكون شخص من القريبين لقلبي- إلا وأنفجر فيه بدون داعي في الغالب ، يعني مثلا وهو زميلي مضايقني بتصرف فأكمل اليوم عادي جدا و اول ما أشوف صديقي اللدود ومن غير ما يعمل أي حاجه أنفجر فيه ونتخانق

هو ليه الواحد ساعات بيرمي بحمله على ناس؟

أول ما أعرف حد جديد مش بزعل منه لو عمل أيه وبمجرد أن معرفتنا تتحسن شويتين تلاته أربعه إلا وألاقي نفسي كل ما تحصلي مشكله أروح أصدع دماغه بيها وأفضل أحكيهاله بادق التفاصيل فيتخنق فأنا أتخنق أني خنقته وأرجع أفكر هو أنا مش مفروض أفضفض معاه ولا أيه

هو ليه الواحد ممكن يسكت عن حاجه كبيره أوي ويزعل من حاجه صغيره أوي؟

في زميل عمل موقف جامد جدا ومتكلمتش معاه عليه ورفضت أنه هو يتكلم معايه فيه وعملت مع نفس الشخص مشكله كبيره جدا في مره تانيه والسبب من وجهة نظره كان تافهة جدا ولا يستدعي أطلاقا أننا حتى نتكلم فيه

هو ليه دايما البدايه والنهايه دايما قصه مكرره ومع ذلك تفضل الأحداث الداخليه توجعنا أوي؟

من زمان من ثانوي تقريباً لأ من قبل ثانوي كمان وأنا ماشي على نظام ثابت مبيتغيرش في التعرف على الأصدقاء والبدايه دايما ثابته

الأول ملفتش النظر

وبعدين أبدأ أنا أقرب شويه بشويه وأتصرف تصرفات الطرف التاني يعتبرها غريبه شويتين ويعبر عن ده بأني حد مختلف وعندها تبدأ المرحله التانيه واللي فيها

يبدأ يصاب بالخوف عليا من كل شيء ووصل في أحيان كتيره من الخوف من اللآخرين لدرجه أن واحد مره قالي أنه ميحبش أني اتعامل مع أي حد تاني عشان ممكن أتجرح وأنا - من وجهة نظره - مستحملش وكنت أيامها أصغر من دلوقت بكتير بس أنا دلوقت واثق أني أيامها كنت أقوى من دلوقت

ويبدأ فيها يتصرف تصرفات – هيعترف هو بعد كده أنها مش طبيعيه فيه ولكنها جديده عليه- ويقول كلام وفي الغالب التصرفات والكلام بالنسبه لي معاد بس وكالعاده هبدأ أحكي كل اللي عندي وساعتها هيديني العذر دايما وهيقول أن كل اللي فات مكنتش فيه غلط مني

وبعدها يبدأ يقرب هو أكتر وأكتر فيبدأ يشوف أني مش الصوره اللي رسمهالي في خيالي وأني مازالت بشر ممكن أزعل ساعات زي ما ممكن أفرح أوقات و ممكن أغضب زي تماما مما ممكن أعدي وأسامح ومع ذلك هستمر أنا أفتح قلبي واحكي دايما اللي بيحصلني لأني هكون خلاص أتعود على ده وعندها نبدأ المرحله الثالثه والأخيره واللي فيها
هيبدأ هو يبعد شويه وبشويه ويتهمني بكل التهم اللي ممكن يلاقيها في شكته ومش هينسى طبعا أني وللأسف غيرته لأنسان سيء وأني خدعته وكدبته عليه ومش بس كده لازم ما ينساش قبل ما يمشي أنه يقولي أنه مغلطش فيا وأني أنا اللي غلطت فيه

القصه محفوظه من سنين فعشان أيه لسه بتوجع؟


ليه بيكون الناس ساعات بيهتموا بالصراحه وينسوا ساعتاها الوقاحه؟

تلاقي حد بيقولك كلام كتير يجرح ويقولك ببساطه هو ليه الصراحه بتجرح وهو بينسى ساعتها أن الوقاحه هي كمان بتجرح

مش عارف أيه اللي خلاني أكتب الكلام ده ولا عشان أيه أنا كتبته ولا ليه الأسئله السخيفه دي بتفضل تدور في دماغي وأفضل أدور لها على أجابه رغم أني عارف أن التدوير على الاجابه بيتعب وعمر الأجابه بعد كده ما هتريح لأني ساعتها هلاقي أسئله تانيه أتعب بيها نفسي من تاني

أنا اللي غلطان
أيوه أنا اللي غلطان عشان من البدايه بسيب نفسي أصدق كل الكلام اللي بسمعه رغم أن بيكون فيه حتى ما معرفش في قلبي ولا في عقلي بتقولي أن مش لازم طكل اللي بيتقال يكون صدق أكيد في غرض تاني من ورا الكلام اللي بسمعه ومع ذلك أصدق الكلام أول ما أسمعه فيبقى أنا أكيد اللي غلطان