ثالث يوم العيد

النهارده كان يوم شغل
يعني صحيان من الساعه خمسه ونزول من البيت على الساعه سته
ولأن النهارده ييوم غير عادي فسواقن الميكروباس كانوا نايميين حبتين في العسل وأضطريت أقف في البرد - والجو النهارده الصبح كان برد جدا – لربع ساعه تقريبا
وصلت الشغل لاقيت اليوم موسم للأجازات واللي فرسني أن مديري – اللي كان عايز يجبني أول يوم العيد – أتصل على الساعه ثمانيه – يعني كنت في الشركه بقالي أكتر من ساعه- وبيقولي أنت في البيت ولا الشركه فقلتله لأ في الشركه طبعا فقالي طيب أعملي النهارده وبكره أجازه

اليوم هادي لدرجه ممله
واكتر حاجه متعبه أن نسيت الأدويه في البيت ودرجه الحراره عماله ترتفع كل شويه ولما أخذت القرار أخيراً أني أكلم العياده وأحجز عشان أنزل أكشف قالي الساعه بقيت عشره وحجز العياده بيخلص الساعه تسعه فغظني الراجل بصراحه وخصوصا اني عارف انه مبيخلصش الساعه تسعه ولا حاجه وكمان انا كل اللي كنت محتاجه حاجه للسخونيه لغايه ما أوصل البيت

فكرت رغم كده أني أنزل وانتهزها فرصه والف في الشوارع في فتره الضهر اللي هتكون اهدى شويه من الليل ومش بعيده ادخل سينما في حفله من الحفلات التنهاريه واللي بحبها عن الحفلات المسائيه بس لغيت الفكره لأني لاقيت اني ممكن أخرج أخر النهار زي أمبارح

آه فعلا أنا خرجت أمبارح ده مكنش حلم لأن مش معقوله الأحلام تتجسد لواقع لأني الصبح لاقيت في جيبي المصاصه اللي اشتراها أمبارح ليا وأكلتها من شويه وكانت جميله ورغم استغراب زميلي ليا في ألو مره شافوني بأكل فيها مصاصه في مكتبي بس النهارده كان عندي احساس انهم نفسهم يدوقوا اللي كانت معايه النهارده لأني كنت متلذذ جدا وانا باكلها

على الهامش

اي موقف بيكون بين شخصين مش شخص لوحده
وأي غلطه بيكون كمان سببها الطرفين مش طرف لوحده