أول يوم العيد

هو انا ليه بصدق؟
عشان انا عايز اصدق وبس ولا عشان بحس ان الكلام بجد رغم انه في الآخر بيطلع مجرد كلام

هو بجد زي ما بقول للناس ان مشكلتي اني بصدق ولا مشكلتي اني مش بصدق

سهر عيني ونام ما بيغفى الغرام ولا بغفى انا
عم بتأمل فيك شو بيعجبني فيك عم بسأل أنا
اليسا

في الكتاب الأخير لعمر طاهر كاتب فيه جمل من الأفلام وكاتب فيه جمله من فيلم سهر الليالي على لسان منى زكي وهي بتقول

ورحمة أبويا تعبت

والجمله دي بقالها شهور لازقه فيا ومعايه وبصرخ بيها –في سري لأنه لايجوز الحلف بغير الله- وبعيش معاها
ومش عارف ليه مكتبش جمله تانيه من الفيلم على لسان حنان ترك برضه بحبها ومعلقه معايا كتير وبالذات التعبير اللي كان على وش حنان وهي بتقولها

مكنتش اعرف اني زباله اوي كده

يا عالم بكره يا حبيبي مخبي لنا ايه يا خوفي بكره يا حبيبي مشوفكش فيه
ايامنا بجد بخاف منها مهما بتوعدنا بخونها وبخاف تنسى اللي بتوعد بيه
اليسا برضه

لسه فاكر لما رحت القناطر وانا في تالته اعدادي مع استاذ كامل وكلامه لسه بسمعه بيرن في وداني لما كنت بدندن بكلمات اغنيه وحشتني لسعاد محمد وهي بتقول من خوفي لبكره يفرقنا وقالي بكره ده احنا اللي بنعمله احنا مش مجبرين عليه

يااااااااه هو انا من زمان كده وانا بصدق؟

على طرف سريري موجود الشراب الجديد وكل ما ابصله افتكر بنت خيخه وعشقها للشرابات

يا حبيبي بعدك عني شو مجنني قلبي مشتاقلك يا حبيبي حتى وانت بعيد
يا غرامي انت بروحي بنسى جروحي وبحسك حدي يا حبيبي حتى وانت بعيد
لسه اليسا

عايز افتكر اشتري زهريه جديده لمكتبي بحب الورد اوي كنت زمان بشتري الورد ومبستناش حد يشتريهولي مش عارف ليه بطلت اعمل ده وبقيت استنى انه يجيلي ومبيجيش
لسه فاكر لما كنت في ثانويه عامه وكنت اروح اتمشى على الكورنيش واشتري لنفسي ورد واكلم نفسي واحكيلي واشكيلي وارجع من هناك مختلف

اديك عرفت اللي مكنتش عايزه انك تعرفه
اللي بقاله كتير في قلبي محيره ومخوفه
اليسا كمان وكمان

محتار اوي مش عارف ليه
ليه ساعات الواحد يبقى عارف تأثير تصرفاته ومع ذلك يتصرفها ومش عارف يرجع يندم انه اتصرفها ومع ذلك يرجع تاني يتصرفها تاني

كنا في اواخر الشتا قبل اللي فات
زي اليومين دول عشنا مع بعض حكايات
انا لما كنت احب اتونس معاه انا كنت باخد بعضي واروحله من سكات
الناس يا قلبي هما هما وهو فين
وانا ماشيه بتلفت وبسأل كل يوم بيعمل ايه دلوقت وبيحلم بمين
اليسا طبعا

الشارع غرقان في الصمت على غير العاده
وبيتنا غرقان في السكينه زي العاده
ومفيش غير صوت اليسا وانفاسي

وانا اقدر احب من تاني؟
ده انا من وقت للتاني بنديك
وانت اللي مش سامع وكل الدنيا سمعاني

مش محتاج اقول

كنت زمان بقدر اتكلم من غير صوت واتفهم
دلوقت بتكلم بصوت ومش بتفهم
ليه؟
الصور عماله تمر في ذهني
قاسيه بتجرح
مش عارف اوقف الشريط

تليفوني دلوقت اصابه الهوس مش عايز يبطل رن وانا مش عايز اتكلم ومع ذلك مش بقفله مستني مين يتصل عشان أرد؟

على الهامش

بيجرح أوي اني الواحد يحس انه ميسويش وان اي كلام مبيزيدش في الأخر عن كونه كلام مسيره يتعمله ديليت