أنا عارف انه عيد ومش مفروض حد يزعل حد لأ ده مفروض اننا نفرح اللي حوالينا بس غصب عني متضايق ومش قادر أخرج نفسي من المود ده
عيد ميلادي بكره
دلوقت اقدر اقول ان سني سته وعشرين
وانا بطفي الشموع السته وعشرين هيكون من حقي سته وعشرين امنيه
نفسي ان ابطل استنى تصرف معين من حد معين
نفسي ابطل اصدق اللي معرفهمش واشك في كلام اللي اعرفهم
نفسي ابطل اعيش بشكل حتى اللي بحبهم شافينه غلط
نفسي اصدق اني ممكن بجد اتحب عشان شيء كويس في تصرفاتي مش عشان اي حاجه تانيه
نفسي اقدر اقول لأ لما بيكون لازم اقولها وابطل اقول اللي تشوفوه مكانها
نفسي عقده لساني تتحل واقدر اعبر عن اللي جوايا بطريقه توصل مشاعري زي ما بحسها
نفسي احس اني ليا قيمه في حياه اللي بحبهم
نفسي ربنا يرضى عني
ياه كل دي امنيات ولسه امنيات اكتر بس قبل ما اتمنى لازم اعرف انا ازاي هحقق اللي بتمناه
هوانا هفضل لغايه امتى احس ان جوايا لسه موجود الطفل الصغير
يمكن اكون كتبت اللي كتبته في لحظه انفعال وارجع اندم عليه بس الاكيد اني كتبته النهارده ومش بكره عشان بكره ميكونش جوايا اي احساس وحش
على الهامش
كنت بضايق لما اقول لحد على مشاعري واسمع الرد المعهود وانا كمان وافتكر عيسوي في فيلم يارب ولد بس ساعات كمان بفتقد الرد ده وبيكون احساس وحش اوي
16 comments:
لازم فى الاول احيى نفسى على انى اول حد يقولك كل سنه وانت طيب
وبعد كده نعلق
:)
انا جيت اهه
اولا كل سنه وانت طيب وعيد ميلاد سعيد ويارب عيد ميلادك ال 96 مش 26 بس
وتبقى عجوز وكركوب فى بلوجر وتكلم كل البلوجاريه تقولهم بدال عزيزى وعزيزتى
حفيدى وحفيدتى :)
وبمناسبه عيد ميلادكم الكريم التعليق انهارده اكسكلوزيف
على كل جزء ف البوست هو اه تعب قلب ليا بس لا كل فداك يامحمد:)
ودلوقت نبدأ التحليل
"نفسي ان ابطل استنى تصرف معين من حد معين"
ماينفعش خالص
لسبب هو ان الحد المعين ده مادام معين عندك وبتفتكره وبتستناه يبق اكيد و يستاهل انه يكون فى عشم بينك وبينه وانك تستنى منه التصرف ده ايا كان
وان كان عدم انتظارك هيريحك بس صدقنى ماتقدرش تعيش زى مابتتمنى لانك جربت تستنى حد وحد يستناك
"نفسي ابطل اصدق اللي معرفهمش واشك في كلام اللي اعرفهم"
الحاله دى صعبه فعلا ومش صح لكنك بتقع فيها نتيجه ان الل ماتعرفوش مش يهمك وبالتالى مالوش مصلحه فى انه يكدب او يغش وحتى لو ده حصل فهو اولا واخيرا لا يعنيك ف شئ يعنى مش هتتجرح ممكن تدايق شويه وخلاص او مش تدايق اصلا انما اللى تعرفه بتشك فى مصداقيته لانك بحكم حبك ليه بيكون فى نوع من الحساسيه والخوف من الصدمه فيه
يعنى ده امر طبيعى لكن لو زاد عن حده هيتعبك يعنى الكترول مهم جدااااااااا
"نفسي ابطل اعيش بشكل حتى اللي بحبهم شافينه غلط"
لو انت شايف نفسك صح ومتاكد ان دينك واخلاقك مش يمنعوك من الشكل ده يبقى عادى عيش بالشكل اللى يريحك ومايهمكش حد :)
"نفسي اصدق اني ممكن بجد اتحب عشان شيء كويس في تصرفاتي مش عشان اي حاجه تانيه"
تفتكر اصحابك كلهم بيحبوك حب مصلحه ولا علشان شكلك امور وعسول ؟ اكيد لا اللى بيحبك بيبقى علشان شايفك تستاهل تتحب ولو ماطلعتش من الدنيا الا بواحد بس يحبك فى الله ده كفايه وبعدين امال حاتم راح فين ده هو اصلا كفايه وانت عارف قيمته كويس -ايوووووه بالظبط-يشل اى حد ههههههه
وبعدين تعالى هنا امال الناس الل بتدخل البلوج بتاعك وبتهتم تقرا كلامك وحكاياتك ده علشان ايه؟؟؟؟ ماهو علشان هو بيحبوك فى الله علشان انت من جواك تتحب مش علشان اى حاجه تانيه
"نفسي اقدر اقول لأ لما بيكون لازم اقولها وابطل اقول اللي تشوفوه مكانها
نفسي عقده لساني تتحل واقدر اعبر عن اللي جوايا بطريقه توصل مشاعري زي ما بحسها"
لا بجد فى دى حاول الحكايه دى صعبه
وربنا معاك فيها لكن عليك انك تبقى مصر تتغير
"نفسي احس اني ليا قيمه في حياه اللي بحبهم"
مش بيقولوا من القلب للقلب رسول ؟؟؟
يبقى اللى بتحبهم اكيد بيحبوك
وماداموا بيحبوك بقى اكييييييييد ليك قيمه فى حياتهم يمكن انت ماتشوفهاش تحت ضغط عصبيه ومود وحش انما الحقيقه هى موجوده
"نفسي ربنا يرضى عني"
لو سعيت لها اكيد هيرضى عنك
واذا اتانى ركضا اتيته هرولا
ده حديث قدسى وربنا معاك وربنا يرضى عنك يارب
"هوانا هفضل لغايه امتى احس ان جوايا لسه موجود الطفل الصغير"
وهى دى وحشه طب لو كانت دى امنيه عندك ربنا مش يحققهالك ابدا :)
فاكر لما حسدتك على برائتك؟؟
حقيقى مش وحش الطفل اللى جواك ربنا يديمه عليك ويديم عليك جمال روحك
ربنا يحققلك كل احلامك يامحمد يارب وافرح بيك قريب هههههههه
قلب ام بقى :)
وماتعملش ف لحظه انفعالك حاجه تندم عليها بعدين لكن مطلوب كمان انك ماتخزنش زعلك علشان ماتتعبش والجا للى بيحبوك هتلاقيهم بحسوا بيك
كل سنه وانت بكل خير
لعيد ميلادك مره
وللعيد مره
ومره من عندى زياده
:):)
يالهوى
ايه ده كله؟؟
التعليق طويل اوى :(
معلش هبنيلك بلوج تانيه ماتتزعلش :)
حبيبه بالتلاته :)
سبق وقلتلك انتي دايما اول كومنت وبالتالي فأنتي كمان اول حد يقولي كل سنه وانا طيب بس انا للاسف مش بعترف بيها غير بعد الساعه اتناشر فهستنى مره كمان كل سنه وانت طيب
:)
بس انتظار تصرف من الاخر بيكون مر كعاده الانتظار وبيكون جارح لما ميتحققش اللي بننتظره
بس انا الشك عندي في اللي اعرفهم كبير
مش يعرفوني عشان مصلحه بس احيانا بحس اني انا اللي بفرض وجودي على اللي حواليا ثم مين قال ان حد هيعرفني عشان انا عسول وامور واصلا انا لا عسول ولا امور :)
قلب ام؟ :))
ده انا اكبر منك بعلى الاقل خمس سنين
حاضر مش هخزن زعلي بس استحملوني بقى لما كل شويه اشتكلكوا كده
نورتيني اوي اوي
يانهار أبيض
بكرة عيد ميلادك
كل سنة وأنت طيب ومبسوط وسعيد وفرحان وكويس وبتحقق اللي نفسك فيه وقريب من الناس اللي بتحبهم وبيحبوك
بس أنت كدا طلعت برج الميزان:(
يلا حصل خير هههههههههههه
أنا بهزر
برج الميزان دا من الأبراج الجميله واللي فيها مميزات كتيرة علي فكرة
عزيزتي ذات القلب النابض
كل سنه وانتي طيبه
بس ليه الو المكشر عشان برج الميزان ما انا لو مكنتش الميزان كنت هكون العقرب
هو العقرب احسن ولا الميزان؟
:)
ده غير لني بحب شهر عشره جدا ومبسوط اني من مواليد شهر عشره
:)
كل سنه وانتي طيبه كمان مره
3
2
1
الساعه 12
وبقولك كل سنه وانت طيب
هيييييييييييييييييييييييييه
كل سنة واحنااخوات و اصحاب واحباب
كل سنة وانت مش زعلان مني
كل سنة وانا مش مزعلك
كل سنة واحنا مع بعض
كل سنة وانت طيب
عزيزتي حبيبه
بجد متشكر اوي
على الهامش انتي سبقتي حاتم ازاي؟
حبيبة قبلي
عااااااااااااااااا
ليه كده ؟
اهو موقفك ده هايفضل مأرقني لحد السنة الجاية ان شاء الله لما اقول انا الاول
اصلها اول مرة يقوله
كل سنة وانت طيب قبلي
ماشي يا حبيبه
لن انسى لكي هذا الموقف
انت عايز رد؟
تعيش وتاخد غيرها ياحتوووووووم
انت عارفنى قصدى ايه؟
ايووووووووة اهدى النفوس بينك وبين محمد ههههههههههه
والله يامحم دعيت ربنا اقدر ابعتلك السساعه 12 بالظبط واهور بنا استجاب وفوق قدره موبايل حاتم :)
حبيبة ليكي عندي كلمة
لا يا ماما لا
مش انا
انا موبايلي باعت الرسالة الساعه اتناشر وعشر ثواني بالظبط
وانا الميقاتي الوحيد وعلى المتضرر اللجوء للقضاء
واحب اقولك كمان
ان انا القاضي
يعني قضيتك خسرانة
واوعي تتخيلي انك ممكن تسبقيني
مش انا
دانا اولع ف بلوجر علشان محدش يسبقني
هو انا قليل ولا ايه ؟
قال تسبقني قال
كل سنة وانتي طيبه
كل سنة وانت طيب يا باشمهندس
أتمنى تحقق كل اللي بتحلم بيه ويفضل حواليك الناس اللي بتحبهم و اللي بيحبوك
مش محتاجة أقول أكتر عشان أكيد الباقي عملوا الواجب وزيادة
حبيبه
حاتم
شكرا بجد بس انا مبحبش الخناق :)
بس تعرفوا انا لغايه دلوقت مش قادر احدد مين فيكوا قالها قبل التاني
عزيزتي فراشه
كل سنه وانتي كمان طيبه يا افندم :$
لا انتي مش محتاجه تقولي اكتر بس انا مستني اسمع اكتر والا مفيش تورته انا نبهت اهو :))
مين الباقي؟
ده انا حتى عيد ميلادي السنه دي ناس كتير نسيوه :(
بس ربنا عوضني بأني سمعتها من ناس بجد أحبهم في الله كثير
تحياتي
Post a Comment