شرم الشيخ

دوره تدريبيه تعقد في شرم الشيخ لمده أسبوع

هو ده كان الخبر اللي نزل عليا كالصاعقه ومع افتراب الموعد يزداد الخوف والقلق حتى جاءت اللحظه الحاسمه مساء يوم الأحد الماضي واستعذت بالله من الشيطان الرجيم واتجهت للحاج عبد المنعم رياض عشان اسافر إلا صحيح هو عبد المنعم رياض كان حاج ولا ملحقش؟

طبعا ونظرا لأن ميعاد سفري كان في الثانيه عشر بعد منتصف الليل فبعد ما ركبت الأتوبيس وقلت الدعاء لبست القناع على عنيا وقلت يانوم وفي ذهني تتردد الأغنيه الشهيره يا سواق ياشاطر ودينا القناطر ويا سواق يا بليد ودينا الصعيد بس مع التحريف بأني عايز السواق الشاطر يوديني بيتنا

أول انطباع كان لون التاكسي واستغربت هو لونه كده نسبتنا للعلم الأسرائيلي ولا لونه كده نسبه للون البحر والسما

وصلنا يوم الأتنين الصبح وبعد الدش المحترم والفطار المحترم برضه توجهنا للكونفرنس روم – حجره المؤتمرات بس طبعا لازم شويه أنجليزي- عشان نبدأ المحضرات اللي كانت كل يوم من تمانيه صباحاً حتى الثانيه ظهرا

من المواقف اللطيفه

توجهت للبار مش عشان أسكر لا سمح الله ولكن عشان أطلب واحد بيبسي وأستغربت أنه يشك في أني مش مصري رغم ان الواحد لما شاف الأجانب لاقى أن مفيش وجه مقارنه أطلاقا فأيه اللي يخليه يشك أنا مش عارف

من المواقف السخيفه

باب الاوضه عندي كان المفتاح بيعذبني لما يفتحه وفي يوم الساعه تمانيه الصبح أفتكرت أني لازم أرجع أخد حاجه من الاوضه وبعد أكتر من ربع ساعه من محاوله أدخال الكارت في الباب أتفاجأت بواحد محترم مضروب بالنار شكله عشان يقوم من النوم ويفتح الباب وطبعا أنا أول ما الباب أتفتح ولاقيته في وشي أشتغلت آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه وفي وسط ما أنا بصرخ ببص الاقي خير الله ما أجعله خير أن شم دي أوضتي
:))
فطبعا أعتذرت ومشيت بس الراجل لما لمحني بعدها على البيسين كان عايز يقتلني

من المواقف الغلسه

دخولي فيلم شبه منحرف ورغم مروري بكل أنواع الأفلام في حياتي السينمائيه بس ده كان أول فيلم ماستحملش أفضل للنهايه

من المواقف الغير مفهومه

في رحله العوده كان ورايا أتنين هنود واحد منهم مشغل الموبيل بتاعه بأغاني هندي ورغم أستياء الجميع إلا أنه رفض أنه يقفل الأغاني بس بعد شويه ومش عارف أشمعنى أنا لاقيته بيسألني إذا كان معايه أي أغاني عربي على تليفوني؟؟؟ مع العلم انه لا يتحدث العربيه ولا يفهمها

من تصرافاتي اللي بسميها تيبكال لأن هي دي تصرفاتي العاديه

بعد وصولي بيوم أنفجرت في حجرتي في نوبه بكاء حاد عشان حبيبي وحشني والبيت وحشني وأخواتي وحشوني وسريري وميشو وكوكي ومكتبي ومدونتي وحسيت أني وحيد

وفي لحظه الرجوع وتحديدا أول ما دخلنا على كايرو حسيت بألم فظيع ورغبه في الهرب وده حالي دائما مع السفر كنت خايف أرجع لحياه ناس ممكن يكونوا كانوا مرتحين أكتر وأنا بعيد ويكونوا مش عايزين زي ما أنا عايز أكون معاهم

على الهامش أمبارح قضيت اليوم أحلى بكتيرررررررررر من أيام شرم الشيخ على الرغم من أننا أكلنا في نفس المطعم ونفس الوجبه بس كان أحساسي مختلف ورغم الفيلم الغريب اللي مش عارف كان أيه قصته تحديدا بس أنت عارف ليه كان أحساسي مختلف؟

لأ مش هقولك خلي العمده يقولك