أبيض ..........أبيض

النهارده كنت متفاءل من اول ما صحيت من نومي وحسيت أنه يوم حلو مش مجرد يوم هعيشه لأ اليوم ده فيه شيء مختلف

بعد ما صحيت فتحت اللاب توب وبعت ايميل وبعدين لبست ونزلت اروح على شغلي وأول ما نزلت من البيت لاقيت حاجه غريبه

لاقيت نسمة الهوا صاحبتي بتسلم عليا وتقولي أنه يوم جميل فرديت عليها بأني حسيت بكده أول ما صحيت بس مكنتش أعرف أني هشوفها النهارده

حسيت حاجه غريبه وأنا ماشي في الشارع ، لاقيت في لون أبيض كتير أبتداءً من الكتاب اللي في أيدي اللي لونه أبيض وأسمه كمان في كلمة أبيض وهو عباره عن مجموعه قصصيه لأملي نصر الله وأسمه أسود وأبيض بس مشفتش أي سواد حتى وأنا بقرا كلمة أسود مشفتش بس غير اللون الأبيض

أنا بحب أحساس اللون الأبيض
أيه ده حتى البيوت لونهم أبيض
دي أول مره أكتشف أن في بيوت في منطقتي السكنيه لونها أبيض وكمان مش بيت واحد ده بيوت كتير ومش مجرد بيوت مدهونه أبيض لأ ده البيوت كأنهم لابسين أبيض
أيه ده كمان الناس في الشوارع لابسين أبيض
حتى الأولاد الصغيرين لابسين أبيض
حتى وأنا في المترو وأنا بكتب أنطباعي ده في النوته الصغيره بتاعتي العيون اللي كانت بتراقبني كمان فيها اللون الأبيض

ولأول مره أضحك وأنا بسمع أغنيه حزينه وأغنيه النهارده كانت لمحمد محي
أعاتبك علي أيه ولا أيه ولا أيه
ولما وصلت محطة مترو حسني مبارك أعلنوا أن المترو مش هيقف في محطة جيمي ومش عارف ليه هيقف في اللي قبلها واللي بعدها ولكن هي لأ ومع ذلك نزلت من المترو عشان اركب اللي هيجي بعده وأنا لسه على وشي ابتسامه وبدور على اللون الأبيض حواليا عشان أملى عيوني منه كمان وكمان

واستنيت وكل ما مترو يجي يعنوا نفس الاعلان فقررت أني أركب وخلاص وأنزل محطه أحمد وأتمشى المحطة دي على رجلي وخلاص وفعلا وبرضه لاقيت الشوارع مليانه باللون الأبيض بس اللي بعد كده كان فوق الوصف

وصلت أخيرا عند دار القضاء وصعقت من كتر اللون الأبيض ، لاقيت كميه بشر لابسين لون أبيض فوق الوصف بس مش عشان يتأنقوا ولكن عشان ده زيهم لانهم وببساطه كانوا رجال الشرطة