النهارده أول يوم مدارس

النهارده أول يوم مدارس
ياااه فات وقت طويل أوي من ساعه ما كنت في مدرسه، لسه فاكر مدرستي الأبتدائي والمريله البني اللي فضلت ألبسها تلات سنين علشان هو ده الزي وفي السنتين الأخريتين في الأبتدائي ألبس القميص البيج والبنطلون البني وأبله ماجده اللي فضلت تدرسلنا كل المواد من أولى أبتدائي لغايه تالته أبتدائي ماعدا الدين عشان مكنتش مسلمه وأستاذ ناصر اللي كان بيدرسلي الحساب في رابعه أبتدائي واللي كان اول واحد أعرف معاه أني بحب الحساب وبكره الدراسات الأجتماعيه واللي كان بيدرسهالي مدرس مش فاكر أسمه بس فاكر شكله ونظارته المميزه ولسه فاكر كمان شهرتي في المدرسه مش عشاني أنا ولكن عشان أختي اللي كانت أكبر مني بتلات سنين تعليميه بس كانوا كل المدرسين والمدرسات يعرفوها عشان كانت دايما من الأوائل وعشان ملامحنا قريبه من بعض فكان سهل يربطوا بينا وأبقى معروف عشان خاطرها وكمان فاكر زمايلي في الفصل ولسه فاكر وليد كان بيقعد فين ورفيق ومحمود وحسن ورشا واسماء ورانيا ونشوى ومي وتحديدا مي بفتكرلها المره اللي تعبت فيها واتبرعت أنها تشيلني لغايعه ابيت وفاكر مايسه وخلود الفلسيطنيه وفاكر الزلزال والطلبه الجداد بعد الزلزال وفاكر المراجيح وحمص الشاي والكاراتيه اللي كان دايما موجود معايه في الشنطه ولسه فاكر الصداقات البريئه وأول هديه من صديق في عيد ميلادي وكانت عباره عن كراسه موسيقى عشان كنت بحب حصص الموسيقى رغم أني عمري ما كانت بشارك فعليا بس كنت بحبها وأكتر رحله أفتكرها هي الرحله للملاهي واللي أفتكر أنها كانت للسندباد

فاكرالأعداديه يعني بدايه مرحله جديده وأزاي أبتديت أحس أن اليوم بقى أقصر كتير وفاكر أماكن الفصول اللي كنت فيها بأرقمها وفاكر المدرسين ، لسه فاكر أستاذ خالد بتاع العلوم وأمتحاناته اللي كنت بنجح فيها بأعجوبه وأنا في أولى أعدادي ولسه فاكر أبله نيفين بتاعت الدراسات وأنها كانت دايما بتقول بطلوا ظن ياعيال وكان نفسي حد يقنعها انه أسمه زن مش ظنوأستاذ محسن بتاع العربي باللكنه الصعيدي والشنب المميز وأنه كان أول واحد يخليني أشترك في مسابقات إلقاء الشعر وأستاذ محمد علي بتاع الرياضيات وحنان الأب اللي مقدرتوش في وقته وساعتها مكنتش بشيل هم لشيء وكانت كل تصرفاتي فيها ثقه أكتر ومكنتش بتردد أني أتكلم في الفصل بل بالعكس أنا كان المدرسين بيقولوا أني هطلع محامي عشان لو مدرس حب أنه يعاقب الفصل كله لغلط أرتكبه مجموعه أشخاص هو مش قادر يحددهم مكنتش أسكت وكنت أقوله أنا مغلطتش عشان أتعاقب وكون حضرتك مش قادر تحدد مين اللي غلط ميديش لحضرتك الحق أنك تظلمني وأنا مغلطتش ، كنت كثير الثرثره وكان ممكن الوقت اللي هيستغرقه المدرس في ضرب الفصل كله هيستغرق أده أو أكتر منه عشان يقنعني أو أقنعه بضروره عقابي أو بضروره عدم عقابي وسندوتشات الطعميه بعد المدرسه واللوليته والايس كريم طول الصيف وأكتر رحله أفتكرها رحله الفيوم واللي يومها أتصالحنا أنا واستاذ كامل بعد فتره خلاف وأعترافات وتقارب وأغنيه وحشتني بصوت خالد عجاج مش بصوت سعاد محمد في الخلفيه وكتاب لأشعار فاروق جويده ومراسلات وهمسات

والثانوي والعزله وأد أيه الانسان ممكن يحس بالغربه وهو وسط ناس وصديق مع بدأيه كل سنه دراسيه ونهايه صداقه بنهايه السنه الدراسيه يعني أحمد وشيماء وخلاف كبير وصداقه أكبر تتحطم عشان شويه اسباب تافهه ، يعني ألتزام ويعني غربه وفراق مع أختي بعد جوازها ومراسلات بينا ويعني مصير جديد بيتكون والأهم يعني معرفه معني الخوف والأنطواء وأزاي تخاف حتى أنك تعبر عن رأيك بعد ما كنت متعود أنك تجادل أي شخص عشان تثبت وجهة نظر عندك

والجامعه وأول سنه جامعه والتي شيرت اللي أشتريته من مكس ومحبتوش وبرضه رحت بيه أول يوم الجامعه بلونه الأخضر الغريب والسفر كل يوم من القاهره للزقازيق رايح جاي يعني المدينه الجامعيه وذكرى يوم واحد بس في المدينه الجامعيه والعوده من تاني بصدر رحب للسفر رايح جاي والبعد عن نار المدينه الجامعيه يعني أول مره فشل حقيقي والسنه اللي بعدها يعني تفرغ سنه كامله من اتعليم قضيته بين جدران المكتبه في فرع الجيزه حيث النيل والمنظر الخلاب وقصص يوسف السباعي وكتب أنيس منصور اللي هتجنن وأفهم هو عايز مني أيه وروايات كتابي وعالم خيال أتفتح ومن يومها مش عارف أقفله وجامعه القاهره بعد كده

ياه كل دي سنين فاتت

على الهامش

كنت زمان مبحسش أني ممكن أتفهم غلط دلوقت دايما شايف أني بتفهم غلط حتى من أقرب الناس شكلي أنا اللي بعبر عن نفسي غلط