عندي أحساس بالغرق
مش من ساعه ما أترميت في البيسين وكنت بغرق فعلا وانا في شرم الشيخ
ولا من ساعه ما خرجت من المكتبه أمبارح ولاقيت الأمطار نازله عليا وكان أول يوم من ساعه ما أبتدى شهر أكتوبر اللي أخرج فيه من غير ما يكون معايه حاجه بكم عشان البرد بل بالعكس ساعتها فضلت واقف تحت المطر وبقول ياريت مياه المطر تخترقني وتغسلني من جوه لأنها أنقى ميه ممكن أشوفها
ولا من ساعه ما رجعت من شغلي أمبارح بليل ولاقيت الأمطار غرقت كل الشوارع المحيطه بالبيت وبقى الوصول للبيت مشيا يكاد يكون مستحيل ولازم أوصله عوم
ولا حتى من الكتب اللي غرقت نفسي فيها ورغم أني رجعت اقرى روايات طويله بدلا عن القصص القصيره لأن الروايه بتغرقني في أحداثها وبكده هنسى حاله الغرق اللي أنا فيها بس برضه فضلت أحس بنفس حاله الغرق
بشتغل أكتر من سبعين ساعه في الاسبوع
وبنام أكتر من خمسين ساعه
وبركب مواصلات على الأقل عشر ساعات في الأسبوع
ومع ذلك بغرق
بضحك كتير وبهزر أكتر ومع ذلك بتلازمني حاله الغرق
حاله الغرق مش مزعلاني بس مش عارف ايه مصدرها
من فتره طويله يمكن من يوم عيد ميلادي وأنا لما بضحك بضحك من قلبي بجد وده شيء مفرحني
ومن فتره طويله وتحديدا من يوم ما حبيبي قالي أنه كان واخد على نفسه عهد أنه مش هيزعلني في شهر أكتوبر خالص وانا مش بخبي عليه تقريبا حاجه عشان ميكونش في جوايا شيء بيضيقني بس برضه بحس أني بغرق
عندي نفس الأحساس اللي ممكن يحسه أنسان لاقى ننفسه في دوامه ميه في وسط البحر ودماغي بتلف مع الدوامه
طول اليوم بشغل ايدي وبشغل دماغي وبشغل قلبي كمان عشان محسش لحطه أن في حاجه خارجه عن السيطره وبرضه فجأه يرجعلي نفس الأحساس
يمكن أكون بحب الدوامه
على الهامش
كنت استغرب زمان من اللي بيقول أنه بيحلم حلم وبيتكرر أمبارح حلمت نفس الحلم مرتين وهو نفس الحلم اللي كتير بحلمه وهو أني بطير وفجأه الأمور تخرج عن السيطره ومقدرش أنزل برجلي تاني على الأرض إلا لو قررت أن أكسر رقبتي
