بلا وجع بطن

يوم الأربع اللي فات كان يوم مميز مش عشان اليوم اللي وراه هيكون الخميس يعني نهايه اسبوع شغل ولكن عشان حبيبي هيرجع من السفر وبيبقى يوم وايت خالص بس الأربع اللي فات ممكن أقول أنه كان أوف وايت عشان عرفت أنه هيرجع بدري شويه وعلى خط سير مختلف وبالتالي مش هنتقابل ونروح سوا كعادتنا وأنا طبعا عارف أن طالما متقبلناش أول ما يوصل يبقى فرصه أننا نتقابل في يوم رجوعه معدومه تماما بس حافظت على تفاؤلي

نزلت من الشركة مع زميلي اللي حكاياتي معاه مش هتنتهي أبدا بيتهيألي وكعادتي من الكشك اللي قصاد الشركة أشتريت واحد كرانشي كبير وفضلت أتسلى رغم أني عارف أن معدتي شبه فاضيه وده بيضرها بس مش مشكله وبعد ما وصلنا عند المترو

الزميل العزيز صمم أنه يشرب عصير قالتله كلمتي المشهورة واللي بتنرفزه

بالتوفيق

المهم فضل يحسسني بالذنب واني لو مشربتش مش هيشرب وهو عطشان ألخ ألخ وعلى سبيل الترغيب قالي أنه مش هيشربني عصير قصب وأنا طبعا صممت على موقفي وبعدين بصراحه فضل ضميري يؤنبني ويقولي أفرض الواد كان عطشان لدرجة أنه يجيله جفاف ولا حاجه المهم وافقت ورحت معاه بس بعد ما نبهت عليه يأكد على الراجل أنه يغسل الاكواب جيدا

شربت العصير وانا ممتعض ويمكن ده السبب أني بعدها حسيت بمغص شويه مأهتمتش طبعا لأن المغص صديقي الدائم وروحت على البيت وبعد شويه كنت في السرير بأستمتع بنوم هاديء مريح بس شويه وكنت بحلم أحلام غريبه أنا عارفها كويس وعارف انها أحلام بوادر المرض وفعلا على الساعه أربعه فجرا كانت قوة احتمالي قلت للصفر وتحاملت على نفسي وقمت من سريري وقست درجة الحراره لاقيتها فوق الثمانيه وتلاتين ونص قلت مبدهاش واشتغلت كمدات تلج وده طبعا بعد ما اترميت في البانيو وهو فيه ميه ساقعه لما كنت هموت بالصدمه العصبيه مش بالسخونيه وأخدت كمان قرص كيتوفان عشان الحراره تهدى وأعرف أستريح وكل اللي في دماغي أنه برد لأن الجو مش لطيف بقاله فتره وانا من فتره كنت بحسد نفسي وأقول أني بقالي كتير خالي من البرد

على الساعه سته كنت بقيت أحسن لبست ونزلت شغلي بس يادوب وصلت وكان تأثير الكيتوفان أنتهى وبعد ما الحراره كانت نزلت لسبعه وتلاتنين ونص ارتفعت تاني لتمانيه وتلاتين وتلات شرط وطبعا لاقيت كل شويه حد في الشغل طيب وانت ايه اللي جابك طالما عيان وشويه كلام من ده المهم على الساعه تسعه كنت خلاص هودع فنزلت العياده والدكتوره اللي هناك كشفت عليه بالطريقه الحديثه من غير سماعه ولا ترمومتر بس يمكن عشان انا اديتها ملخص لتطور درجات حرارتي وللادويه اللي اخدتها وبالذات اني قبل ما انزلها بشويه كنت اخدت قرص ابيمول عشان الحراره

بس الغريبه اني لما قلتلها الاعراض واللي كنت متأكد أنها اعراض برد بغض النظر أن مش عندي أحتقان في الزور ولا عندي زكام بس أيه المشكله لما يكون عندي برد بس بس بصراحه كان عندي شويه مغص بس السؤال الوحيد اللي الدكتوره سألتهولي بعد ما شرحتلها الحاله هي أنت أكلت حاجه بره أمبارح قلتلها شربت عصير مكنتش مستلطفه وعليه كتبتلي على مطهر معوي وطبعا مضاد حيوي وكمان دوا للقولون مش عارف عرفت من اين رغم اني مشتكتلهاش منه رغم انه تعابني من فتره

وطبعا ده يعلمنا منشربش من الشارع تاني وبهذة المناسبه أذكر نفسي بالأغنية الشهيرة

كان في أرنب

طالع يلعب

لأقى بسكوتة

جنب الحيطة

مد وكلها

قال اه يا بطني

هتموتني

جابوله دكتور

أداله حقنه

حقنه كبيره

حرم ياكل حاجه من الأرض

وأنا مش هاكل حاجه من الأرض
او من الشارع

على الهامش

طبعا تكرما مني انا " ولـــو " وتعاطفا مع ظروف محمد علشان الشغل مرخمين عليه ف النت والبيت الكومبيوتر هو اللي مرخم فقررت اني اتفضل وانشرليه البوست ده علشان كان قرب يبوظ من الركنة ف الحر

لي جزيل الشكر وربنا مايحرموش مني واسف على الصورة

بصراحة وحشه اوي انا عارف بس اللي لقيتها