مجي حبيبي

أخيرا بكتب
وعلى وشي أكبر ابتسامه ممكن أرسمها لأكتر من سبب بس أهمهم أني بكتب
وتانيهم اني في أيدي في مج النسكافيه وعشان مشربتوش امبارح الصبح كان مزاجي شويه مش عال بس على الرغم من اني لما وصلت البيت أمبارح وبعد ما ربنا فتح عليا وكملت الصيام-اللهم تقبله- لأن شهر رجب بدء ومفروض ان الواحد يحترم نفسه شويه بس هي الفكره مش في مج النسكافيه نفسه ولكن في المج اللي بشرب فيه يمكن عشان بحسه بيبعبر عني هو ده انا ممكن في مره احط صوره ليه هو مج تقليدي عليه ورده حمرا مرسومه بالأيد واللون الأحمر هو اللي طاغي وانا كمان بحس اكتر لون بيعبر عني هو الأحمر مش عشان بيعبر عن الحب بس عشان بيعبر عن الجنون والمج فيه كتير لون ابيض

لونه من جوه ابيض

ارضيته من بره ابيض

وانا بعشق اللون الابيض وبحسه انه بيعبر عني مش في بياض قلبي ولكن في بياض عقلي حيث ان عقلي ابيض يا ورد


وفيه خطوط خضرا وانا بحب اللون الاخضر مبنساش ايام ما كنت بسافر للبلد او بعد كده للجامعه وانا في اول سنواتي الجامعيه ومنظر الارض وهي مزروعه رز وكأنك فرشت سجاده خضرا كبيره تحس انك لو مشيت عليها رجلك هتغوص جواها وكأنك بتعملها مساج ومن أكتر الالوان اللي بحس انها بتخلي مخي اهدى شويه
كمان مجي في خطوط أزرق فاتح وانا بحب اللون ده لأني بيحسسني اني دايما تحت الميه ودي تقريبا الطف شيء بيلمسني الميه عمرها ما تجرح


الورقه ممكن تجرح وشعاع الشمس ممكن يجرح انا القمر نفسه ساعات بيخوفني وأحس انه بيبرقلي
بس الميه دايما معايه حنينه


فيه مسحه من اللون البرتقالي على المج وده بقى اللون اللي الناس بتفضل انهم يوصوفوني بيه وده لأني ربنا أبتلاني بشعر مش أسود وبالتالي الناس بتفضل انها تعبر عني بلون شعري وعشان كده ورغم كرهي ليه بس برضه منكرش انه لون بيعبر عني وموجود في مجي الحبيب

أخر درجة لون موجوده في مجي حبيبي هو اللون الاسود واحس حاجه انه مش موجود بكثره ولكن بقعه صغيره في المنتصف تماما ودي اللي كتير أبصلها واتمنى أنها تكون بنفس الصغر جوه قلبي

وجزء صغير تاني على حرف المج وكل ما تمس شفايفي اتمنى ان يكون السواد اللي بيخرج منهم يكون بنفس الصغر ودايما لساني ميحدفش الطوب بتاعه على الناس

واخير بقعه تانيه صغيره على قاعده المج ودي اللي دايما بتمنى انها بس تكون تأثيري عند أي حد بيعرفني او بيتعامل معايه ولو أني عارف كويس ان تأثيري الأسود أعمق وأكبر

ياااه انا اتكلمت كتير ونسيت نفسي وانا كنت عايز أحكي عن حاجات كتير

بس مش مشكله هرجع تاني وأحكي تانيوان شاء الله تاني مش هغيب كتير عشان انا بيوحشني الكلام هنا كتير

على الهامش

في العادي بكتب أسم البوست قبل ما أمكتب لأني ببقى عارف أنا هكتب عن أيه النهارده مكنتش عارف غير اني هكتب وبس

على الهامش كمان

لكل اصحابي اللي بقرالهم اللي بيعلقوا عندي واللي مبيعلقوش – لأني مش دايما متوقع أن حد يقرا- الفتره اللي فاتت غبت عشان الأول الكمبيوتر في البيت والشغل عطل في وقت واحد وبعد ما الكمبيوتر اتصلح كانت مشكله النت لأني طبعا دايما في الشغل ولما النت بيفصل عني في الشغل بغني ظلموه ولما النت ربنا فتح عليه وأشتغل زورت كل اصحابي اللي لينكتهم في مدونتي دي وفي مدونتي القديمه والجدد اللي نفسي انقلهم من على الكمبيوتر للمدونه بس مش قبل ما أمارس هواياتي وأقرالهم كل البوستات القديمه والتعليقات كمان بس معلقتش عند حد وبصراحه كان فيه أكتر من سبب بس انا خلاص الساعه بقت تمانيه ولازم ألحق أقفل المدونه وأبدأ شغلي