أصرخ ولا لأ؟؟

آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه

أنا لازم ألاقي مكان أصرخ فيه
ولو مش في مدونتي فأنا مش عارف ممكن يكون فيه

كل مره أبدأ أحكي الحكايه من النهايه

مش عارف الموضوع بدأ من لحظه كتابتي للبوست اللي فات ولا من بعد كده

برضه مش برتب أفكاري

اللي حصل أني بعد كتابتي للبوست اللي فات مباشره أتخانقت أنا وحاتم وأتخانقت مع أخويا الصغير
فقررت أنام عشان اليوم بدأ أنه يتحول
وأمبارح حصلت كل الحاجات الغريبه


أمبارح وانا قاعد لا بيا ولا عليا
لاقيت الأخ هاري بينادي عليا
فقلت خير الله ما اجعله خير
فقالي تعالى كلم المدير العام
قلت يالهوي ليه يا بيه ده انا طيب ومؤدب وابن حلال
قالي أخرس ولد
لأ أنا دخلت على فيلم رد قلبي كده

الغريبه أن المدير العام ده مكتبه في وش مكتبي لزم
حاكم أنا واخد مكتب أنما أيه
واقع في كورنر في وشه كوريدور وعلى يمينه كوريدور
وانا طول النهار واخد الكرسي أبو عجل بتاعي وشغال زحاليق في الأتنين كوريدو
وياسلام بقى لما حد من الزملا يتعطف ويزق بتبقى المتعه مضاعفه

المهم
رغم موقع مكتب المتميز ورغم أن سابقا كان مكتبي في وشي الباب قبل ما ربنا يفتحها عليا كده وانقل على المكتب اللي في الجنب وكنت بشوف ايام زمان الله لا يرجعها المدير في الروحه والجايه وهو داخل لامؤاخذه الحمام او وهو مزوغ بدري وبيقول عندي أجتماع في الهيئه إلا أني مدخلتش مكتبه غير نادرا
أفتكر أطول مره فضلت في مكتبه لما ربنا فاتح عليه وجاب تليفون أخو تليفوني حاكم أنا دايما مبتكر وتليفوني كان فريد من نوعه وكان سعاده فخامه جناب سيادته عايز يشغل البلوتوث والحمد لله أنه ساعتها ماخدش باله اني وانا بشغله كان البلوتوث بتاعي مفتوح واني انا كنت صاحب الهاتف المسمى
Kiss Me
والا كان زماني في خبر كان
حاكم هو يعز الاحترام والادب زي عينه
مكنش هيكون أقل من الدش اللي أخدته من دكتور عبد العزيز وانا في سنه أولى لما لاقني قاعد على كوريدور السلم في الدور التاني وقالي جملته الشهيره بعدها لما جيت أسأله على حاجه في المنهج
أبقى روح أقعد على الســــــــــــــــــــــــــلم

المهم لما العم هاري قالي كلم سعادته قلت بس يبقى المره دي ربنا فتح عليه وجاب لاب توب وعايز يشغل الويرليس
وتلاقيه شم خبر بأني ربنا رزقني ببندق فقال يستغلني

دخلت وانا على وشي ابتسامتي للمناسبات السعيده واللي بتاكل كل وشي عشان مياخدش باله أن دقني طويله شويه ولا ان التي شيرت لونه روز ولا ياخد باله ان البنطلون جينز مش كلاسيك والاهم مياخدش باله أني مش لابس الجزمه

لأ مدخلتش حافي طبعا وهي دي تيجي
انا مبمشيش في الشركه حافي غير في الأجازات لكن في أيام العمل الرسميه بمشي بجزمه المكتب اللي هي مش جزمه هي سابو بس واللهي شكله جزمه مهوش مفتوح من قدام هو مفتوح من ورا بس

لاقيته بيقالي أقعد
قلت ياخراشي هي كمان فيها قعده طيب مش كان يقول كنت خلصت على مج النسكافيه وكنت جبتلي كيس شيبسي ولا حاجه من البوفيه
وبضرب بعيني كده ملقتش لاب توب ولا حتى الترلوب الشهير اللي عمل عشانه حسين فهمي فيلمه الشهير

فقلت ياواد طنش خالص هي بكبيرك أيه هتسمعلك كلمتين هتخرجهم من ودنك التانيه ويادار مدخلك شر

ببص الأقي سيادته بيقولي أيه مع العلم أن كان كلامه معظم الوقت بالعربي على أساس انه عايز ينمي ثقافه هاري العربيه

قالي هاري مبسوط منك
قلتله الحمد لله هذا من فضل ربي
ومبتبصليش بعين رديه بص للي أدفع فيا
وقال على رأي المثال ياحسدين الناس مالكم ومال الناس

ثم أما بعد يا عم الحاج
فقالي عايزك تشتغل في الجزء الجديد اللي الشركه أخدت حق أمتيازه

سكت

أنا كنت حمدت ربنا أن لما العم هاري طلب كده من مديري المباشر – المدير العام المساعد- وهو رفض
وهاري استغل أن المدير العام المساعد الأسبوع ده في أجازه ودخل للمدير العام وقاله أنا عايز ده وهو ده
وانا عايز من ده يا حزمبل أنا عايز من ده

فطبعا الموضوع دلوقت خرج من ايدي ومش عارف دخل فين

انا مش عارف ايه اللي مضايقني ومخليني بشتكي من امبارح كل اللي يسمع يقولي طيب كويس اوي واللهي يا مقيد انت طيب وتستاهل
وبغض النظر عن خبايا النفوس
بس انا مش عارف

طبعا شيء كويس أنه يطلبني بالأسم بغض النظر عن أسبابه
هو بصراحه الراجل لما قعد معايه قالي أنه شايف أني لهلوبه ومن عيله التوشيبا أم روحين
ويتمنى أني أفضل كده
والموضوع فيه خبره عمليه كبيره بالأضافه إلى الماديات الأحسن

وأنا أسمع كلمه ماديات يجيلي أرتكاريا بصراحه
فصرخ وأقوله


انا مبحبش الفلــــــــــــــــــــــــــــــــــــــــــــــــــــــــــوس
بس أنا مش عارف

هستفيد لو اشتغلت
أه هستفيد ودي حاجه ناس كتير يتمنوها
وده أول عيب

أنا عارف أني معملتش حاجه عشان أخد حاجه كانت ممكن تكون راحه لغيري أو غيري أحق بيها
يعني أنا مرحتش وقلتله أبوس رجلك يا عم هاري شغلني معاك في المشروع الجديد

بس أنا مضمنش الناس بصراحه
واخاف أكون باخد حق حد المشكله أنه يكون هو نفسه شايفه كده

مش عارف
خايف لأفشل
خايف أني مكنش أد المسئوليه
انا اصلا اصلا عارف اني فاشل

عارف انه في يوم هيكتشف حقيقتي ويعرف أني فاشل فاشل فاشل


الموضوع كان مأثر عليا أوي لدرجه أني كنت بدور على ملف في اوضه الملفات ومندمج تماما لسببين
أول سبب أن ده طبعي لما بشتغل في حاجه حتى لو عبيطه بندمج بكل جوارحي
والتاني أني كنت ساعتها بدور على ملف أطلع منه معلومات مديري المباشر – المدير العام المساعد يعني- طلبها مني بالتليفون لأنه في أجازه وطلب أني أطلعها لرئيس مجلس الأداره وبكده هكون أنا بتخطى مديره اللي هو المدير العام واللي بيكره ان حد فينا يكون ليه أي صله بالأدارات العليا
رغم أن أصلا أصلا أنا مكنتش هشوف رئيس مجلس الأداره انا كنت هسيب الشغل مع السكرتيره
فكنت حاسس أني بعمل حاجه غلط
وانا مندمج في البحث وسط أكوام الملفات ومتقمص دور الموظف الطحون في أفلام الستينات
وبدندن برائعه ام كلثوم
أهو بين ده وده الشغل كده

وبفكر في كلمات أغنيه الرائعه هدى
أنا بين نارين

إذا بي أفأجأ

ان ان أن أن آن

واحد واقف ورايا بيقولي بتعمل أيه
وده طبعا كان أحمد زميلي

والناس كلها في الشركه عارفين أني بتخض جدا
لدرجه أني مره كنت في البيت وبلتفت ونسيت أني سايب باب الدولاب مفتوح يعني اللي في ضهري المرايه وأنا بلف لاقيت حد في وشي قبل ما أكتشف أنه صورتي في المرايه كنت طبعا

آه تمام
آآآآآآآآآآآآآآآآآآآآآآآآآآآآآآآآآآآآه

وده اللي حصل لما دخل عليا أحمد سألني بتعمل أيه
بس مش زي كل مره في الشغل بتمالك نفسي بسرعه قبل ما تكون الصرخه لميت كل الدور والأدور الستاشر اللي تحته والادور الثمانيه اللي فوقه
بس المره دي ولأن الموضوع كان أكبر من قوه أحتمالي مع ضغط الموضوع الجديد
تركت لنفسي العنان
وكانت الصره
وستر ربنا أن معظم الأداره في أجازات


مش عارف حاسس أني يمكن أكون ببالغ
بس أهو النهارده هاري تعبني طول اليوم شغل
ودايما احس انه مش راضي عني
ودايما قلقان
ودلوقت قلقي مضاعف
أنه يكتشف حقيقتي واني مش شاطر ولا مجتهد ولا من عيله التوشيبا أم روحين

على الهامش

كتبت الكلام ده أمبارح وخفت أنشره أحسن حاتم يفتكر أني لسه زعلان أنه قالي أني لو فشلت هفشل عشان أنا عايز أفشل
وعشان هكمل في التصرفات اللي بعملها
ونسي أن التصرفات دي جزء مني

مقدرش معملهاش

أنا لسه خايف