اليوم أبتدى بدش دافي يمكن يخلي حياتي ادفى
روحت على المكتبه لاقيتها للاسف قافله لاسبوع عشان الصيانه
في الشغل كان الجو هادي مش عشان يوم جمعه وبس بيتهيألي يمكن لأني كنت محتاج الهدوء
فضلت في المكتب مش قادر أعمل حاجه مش قادر اركز في كلمه من المذاكره
مش عارف أعمل أيه لاقتني نزلت وقلت أروح سينما
بقالي فتره أقول هدخل الفيلم ده ويحصل حاجه ومدخلش أو أدخل فيلم تاني
خلت القاعه لاقتني لوحدي قلت كويس
شويه وبدأت الأفواج وكان كالعاده كلهم ياتنين مخطوبين باتنين نفسهم يتخطبوا
كان ورايا اتنين وعجبني جدا الحوار الداير
هي على فكره ماما هي اللي نقتلك الهديه دي
هو ايه ده بجد؟
هي أه أصلها بدأت تحبك لما لاقتني متمسكه بيك
هو طيب كويس
هي تفتكر اجيب لماما هديه ايه في عيد الأم
هو بيتهيألي لسه بدري على التفكير في الموضوع مش بيتهيألي عيد الأم ده في اتنين وعشرين او تلاته وعشرين تلاته
هي لأ واحد وعشرين هو انت هتجيب ايه لمامتك
هو لأ أنا قبلها بيوم او اتنين بسأل ماما هي عايزه ايه واجيبهولها
هي خلاص نبقى نجيبه سوا عشان أنا محتاره كمان هجيب لمامتك أيه
هو سكــــــــــــــــــــــــــــــــــــــــــــــوت
بدا الفيلم وكنت معظم الوقت بلعب في الموبيل
الفيلم كان عادي كان هادي
بس انا اللي دماغي كانت شويه مشغوله
خرجت من السينما قلت اتمشى بس حسيت اني خلاص مش هقدر
روحت وبعدها بشويتين لاقيت تليفون من حاتم
عدى عليا
مكنتش هقدر اتكلم وكان نفسي ساعتها اني اكون اتأخرت بره عشان اتجنب الموقف
سألني على الكومنتس وعرف اني رديت خفت لما لاقيته بيفتح المدونه حسيت اني عايز اقوله اقراه لما تروح عشان اتجنب الموقف فساعتها حسيت اني كنت رخم في ردي
وفعلا قراه وسكت
وبعدها قالي جمله واحده
حسيت انك بتهزئني في الرد
ملخص المقابله مكنش لطيف
حاولت أني امسك اعصابي اكتر من مره بس التوتر اللي كنت فيه في انتظار يوم السبت كان اقوى شويه من احتمالي
سألته لو هيضايق اني اطلب منه ميدخلش المدونه قالي لأ
فقلت خلاص ياريت متدخلهاش تاني
وقالي ماشي
حسيت اني كده هكون براحتي أكتر لما أكتب
مينفعش اكتب هنا الصبح أني مخنوق واشوفه بليل واضحك في وشه وقاله كله تمام
هعرف امثل اكتر وانا عارف انه مقراش كلامي اللي هنا
حاسس ان السبب الرئيسي اني مكنتش بقدر اتمالك نفسي كتير وانا معاه هو اني عارف انه عارف اني بمثل عشان بس قرا كلامي المكتوب
حصلت حاجه غريبه وانا معاه
تليفوني رن وكان أحمد
رديت وتعمدت مقولش اسم اللي بكلمه عشان هو مش يضايق من طريقه كلامي مع اللي بكلامه
كنت بين نارين
أني أقفل مع أحمد على طول أو أني أطول في الكلام مع أحمد
أحمد كان بيقول أنه في أخر مره وهو ماشي حسني كأني كنت بمثل عليه عشان لما خلاص كنت همشي لاقني حطيت وشي في الارض ومشيت بسرعه
قلتله بس ده الطبيعي بتاعي
قالي طيب ليه مأتصلتش تطمن عليا قالتله أني أستنيته هو يتصل
قال كلام كتير
وكنت برد بالحدود اللي لا تزعله ولا تضايق حاتم ومع ذلك لاقيته طلع على البلكونه
وبعد المكالمه قالي انا مكنتش عايز اسمع المكالمه فقلت أبعد لغايه ما تخلص فندمت أني أنا اللي مبعدتش وانا بتكلم
كان يوم صعب
أصعب حاجه لما الواحد يحاول يخبي حاجه جواه وهو قاصد
سألت حاتم قبل ما يمشي قالي انه مش مبسوط بس كمان مش زعلان
وان كنت مش متخيل الحاله اللي يقصدها
بس هو أكدلي أن حالته وهو نازل أفضل من حالته لما جالي
يمكن يكون بيخبي عليا زي ما انا كمان خبيت عليه
أحتمال
بس الاكيد اننا خلاص بقينا السبت واني لازم ألبس وأروح على الشغل وأكلم احمد وأشوف هنتقابل أمتى عشان اليوم ده يعدي
أنا عارف اني مكنش مفروض اطلب من حاتم انه ميدخلش هنا لاني مش بحب كده
بس كمان مكنتش هقدر أكتب براحتي وانا دلوقت أكتر وقت محتاج أكتب براحتي لان مفيش الحد اللي ممكن احكي وياه براحتي
ان شاء الله فتره وهتعدي
5 comments:
حاسه انى ماليش مكان النهارده لان الكلام تقريبا كله على حاتم ولما بتيجى سيره حاتم بحس انى مش مفروض اتدخل
مش عارفه مالكوا بس ؟
ماله هو ومالك انت كمان؟!!
التصرفات كلها صغيره وممكن تعدى
لكن حاسه ان كل واحد فيكوا بقى حاسس ان الامر المسلم بيه هو انكوا بعدتوا عن بعض ومابقيتوش زى الاول
علشان كده انتوا الاتنين بقيتوا بتتعاملوا واتوا مركبين وشوش تانيه غير محمد وحاتم الحقيقين
مش قادره اقولك غير حاول ماتحسش ان حاتم بيبعد عنك اكتر واكتر علشان تفضل فاكرله انه حبيبك
يارب يكون النهارده ماشى كويس
بتمنى يومك يكون مشي حلو أوي و أحسن من اللي اتخيلته كمان
بصراحة أنا مستغربة أوي إنكو أصحاب في الحقيقة بس تبعدوا في العالم دة!! موضوع إنه مش يزورك دي غريبة جدا... بس أكيد انت حر، وفاهمة قصدك في إنك عايز تبقى براحتك
ربنا يزيل عنكو انتو الاتنين كل هم. بجد يارب
طيب ممكن أزور مدونتك و لا مش حابب بس مش قلت؟؟
كل تحياتي
عزيزتي حبيبه
معلش هو أنا اسف لو كان في كلام كتير عن حاتم بس دي مشكله شويه يمكن بعد كده أبقى أقدر أحلها وأكتب بأسماء مستعاره
:)
أحنا الحمد لله بخير
بس هي الدنيا كده مبتدومش على حال واحد
انا غبي شويتين ومش بشوف غير مشكلي معظم الوقت وبنسى أن كل واحد عنده همومه
انا أناني شويه وساعات بنسى أن مش أحنا بس اللي بنحب الطرف الآخر وأكيد هو بيحملنا شويه حب
هحاول بجدأكون كويس ولو أني متأكد أني مش هقدر أوي بس الحمد لله على كل حال
عزيزتي الفراشه
الحمد لله اليوم خلص وهو حلو أو وهو وحش بس الحمد لله خلاص والنهارده الحمد لله لسه عايش
بيبقى صعب شويه أني أتكلم عنه وانا عارف انه ممكن يقرا اللي هكتبه ويرجع يكلمني بناء عليه
بيبقى صعب عليا ولأني أناني مفكرتش غير في نفسي ومفكرتش أني ممكن أكون بتضايقه بتصرفي ده
انا قلتله أني غيرت رأيي وحقيقي معرفش اذا كان هيدخل المدونه تاني ولا لأ بس على العموم ده قرار يخصه وكان غلط من الأول أني أطلب طلب زي ده
أنتي بتسألي تدخلي مدونتي ولا لأ
:(
طيب واللهي زعلت
طيب ما أقفلها بقى
:)
ده أنا كنت هقولك متعرفيش ناس بالأجره يدخلوا المدونه كده ويعملولي حس
:)
على الهامش
النهارده بيتهيألي أول يوم في أمتحانات قلب ينبض مفيش أخبار عن الأمتحان كان عامل أيه؟
عجبني الحوار اللي بين الولد و البنت :). بس عارف؟
حسيت إن البنت بتحب الولد أكتر
و إن الولد كمان مش بيفكر في المستقبل بطريقة صح. مش ليه رؤية للي جاي فعلا يعني. حسيتها؟؟
:)
بالنسبة للناس اللي بالأجرة عشان يزوروا المدونة:)) ... عارفة كويس أوي إنك مش حابب كدة أصلا. لو كنت عايز كتير يعرفوا مدونتك كنت "على الأقل" علقت عند الناس التانية بلينك
بس راحتك في الكتابة أكتر منها في سماع رأي الناس
يبقى خليك على راحتك:)،ومش تزعل لما اسأل كدة
كل تحياتي
Post a Comment