يوميات

الأربعاء 13/4

حتى أنت يا أرماندوا

النهارده حصل موقف غريب دخلت أكلم أحمد محي في حاجه

وفي وسط الكلام لاقيت مستر ارماندوا بيتكلم وكأنه بيكلم الكمبيوتر وبيقول فين محمدسمير أنا مش بقيت بشوفه حد يعرف راح فين ؟

محمد اللي مش بيبطل جري في الدور وحركه رايح جاي

وكل شويه موجود في كل مكان بيعمل حاجه

انكسفت وخرجت

هو انا فعلا خلاص اتغيرت

الخميس 14/4

الصبح وانا في طريقي للمترو شفت حاجه غريبه

واحد معلق في مرايه العربيه

حبل مشنقه

استغربت اوي ليه النهارده بالذات شفته وانا بجي نفس المكان كل يوم والعربيه دي مفروض انها راكنه في نفس المكان كل يوم

الجمعه 15/4

خطبة الجمعه وأول ما دخلت والخطيب بيصرخ وهو متنرفز

مفيش مسلم حق يصاب بالاكتئاب

إن الله يعلم ما تسرون وما تعلنون

صدق الله العظيم

استغربت لأن موضوع الخطبه مكنش ليه علاقه بالاكتئاب اصلا بس مش عارف ليه الشيخ قال الجمله دي

ماما كمان كانت زمان تقول التعب النفسي ضعف ايمان في الاول

السبت 16/4

القمر النهارده بدر بس لأول مره من فتره طويله مشفوش وش بيضحك أو وش مكشر

وأشوفه مجرد من أي تعبير

زي تمام وش اتمحت كل ملامحه فمش فاضل فيه غير تدويرته ولونه

عندي أرق وانا نادرا ما اصاب بالارق

ملوش علاقه بأن الجو النهارده حر أوي ولا أن عندنا ضيوف صوتهم عالي ولا أنهم بيتكلموا علي رغم أنهم مش مفروض يتكلموا علي

يمكن يكون عشان القمر فقد ملامحه؟