أصحاب ولكن

عندي مشكله؟
مش عايز حد يقول أوفت زهقانه والكلام ده
هي مش مشكله هي معضله
قلت مش عايز زمزئه
أمبارح خرجت أنا وصديقي اللدود ومعانا صديق ثالث من أيام الجامعه ولفينا وأتفسحنا ودخلت سينما وأكلت فشار وضحكت رغم سماجه الفيلم وأتفرجت على المحلات وطبعا صديقي اللدود مكنش بيقدر يمنعني من دخول المحلات لأن كان معانا ثالث هو اللي عايز يتفرج وأتكلمنا كلنا وسمعنا بعض كلنا وضحكنا كلنا

اللي بيشتم وبيقول طيب يا عم الكئيب فين المشكله
هقوله المشكله فيا وعشان تبان لازم أقولكم على البدايه

البدايه وأنا صغير وده مش من زمان أوي عشان أنا لسه صغير مكنش ليا أصحاب كتير ولما كبرت شويه وبقيت مدرك للأمور كنت عارف أني من اللي بيفضلوا الصداقات الفرديه
يعني مش ممكن تلاقيني في جروب أنت تلاقيني دايما مع شخص واحد اللي الناس أتفقوا أنهم يقولوا عليه الأنتيم وتمر بيا السنين وانا عارف ان اي انتيم مش بيستحمل يكون بره تيم لأكتر من سنه وعشان كده مع كل سنه ليا صديق جديد

برضه فين المشكله
المشكله أني بتعايش مع ده مش بضايق من ده المشكله أنه رغم اننا كنا امبارح ثلاثه أصحاب بس في وسط ضحكاتي أحس أني أفضل أننا نكون أتنين بس لأني هتكلم براحتي أكتر لأني هشكي وأحكي وأضحك وأعيط كمان براحتي أكتر
المشكله لما كنت بفكر فيها زمان مكنتش بشوفها مشكله لأن حتى أول صديق لفت نظري للموضوع ده قبل ما يهرب ويحصل اللي قبله مكنتش بشوفها مشكله لأني كنت بشوف انها حياتي وأني ادخل حياتي فرد واحد أو مجموعه أفراد دي مش مشكله دي حاجه بتريحني وبعملها لكن أمبارح أبتديت أفكر أني مش لوحدي ان صديقي اللدود هو كمان ليه حق عليا أنه يكون في وسط أكبر يكون حواليه ناس أكتر

جميل أن يكون في حياتي واحد بس برتاح ليه جدا وأنا عن نفسي بكتفي بده منكرش ان في فحياتي ناس تانيه بس مش الحد اللي بتكون معاه مرتاح تماما مش الحد اللي مفيش موضوع يخصك مش ممكن تتكلم معاه فيه مش الحد اللي مش هتفكر ولو للحظه انا لو انفعلت دلوقت هتفهم صح ولا غلط هزعل الطرف التاني عشان حاجه ملهاش لازمه ولا عشان حاجه ليها لازمه

بس كمان الحد التاني من حقه انه يكون في دنيته ناس تانيه وطول ما انا مدخل نفسي في كل التفاصيل وطول ما انا بعبر دايما من أستيائي من أني أخرج وسط مجموعه هيفضل هو مش شايف حد غيري وهيفضل هو مش حاسس بحريه الحركة

هي دي مشكله ولا مش مشكله؟