يوم الخميس بليل أو تحدديا فجر الجمعه حصل شيء مريب
أن أن آه
أنا طبعا في ميعاد زي ده بكون بغط في نوم عميق
وكنت بحلم خير الله ما أجعله خير
اني واقف في شارع جنب بتنا وكان في مشكله ما بصراحه ماأفتكرتهاش بعد ما صحيت المهم شفت واحد جارنا
هو مش جارنا وبس هو سبب معرفتنا بيه ان أحدى بناته صديقه مقربه من أختي الكبيره وبالتالي كانت بمثابه أخت لينا
المهم وانا واقف لاقيت الراجل ده فقلت أشاورله وأكلمه بس كان في صوت كلاكس عربيات جامد وفضلت أسمع صوت الكلاكس وفجأه فتحت عيني
وشويه وأكتشفت أن صوت الكلاكس اللي كنت بشمعه في الحلم هو في الواقع صوت جرس الباب
طيب أنا بكتب كل ده ليه
أه أفتكرت أنا بكتب عشان اللي حصل بعد كده
الباب فضل يخبط وطبعا في وقت زي ده لو الباب أتهد أنا مش هقوم أفتح ده أنا مبردش على الموبيل بعد تسعه بليل حتى لو اللي بيتصل زميل في الشغل فهفتح الباب وأحنا قرب الفجر فطبعا فضلت في سريري ومطنش لغايه ما لاقيت ماما بتسأل مين اللي على الباب
كنت عايز اخرج وأقولها يا ماما أرجعي كملي صلاه وطنشي هيكون مين يعني بس قبل ما اعمل كده لأقيت اللي على الباب هو
الفراغ اللي فات ده للتشويق برضه
ابن الراجل اللي انا لسه شايفه في الحلم مش بس كده لأ ده هو جاي عشان باباه اللي انا لسه شايفه في الحلم تعبان وعايز يشوف بابا
طيب أنا أعمل أيه
2 comments:
:))
مش عارفة
بس أنا كدةمعظم الوقت الحقيقة!! مرة حلمت بأن ناس معرفهاش قاعدة تنادي علينا من بعيد وتقول تعالوا بسرعة، وصحيت لقيت العمارة بتتحرق وفعلا جيراننا بيخبطواعلى الباب عشان يصحونا ننزل بسرعة:) بعد الشر عليك طبعا
و فجرالسبت برده حلمت بحد عمري ماشفته إلا ان ملامحه كانت واضحة جدا ومفهمتش دةإزاي كدة!! فعادي عني :) بتحصل كتير
عقبال ماتحلم أحلام تبشرك بالخير
عزيزتي الفراشه
أنا كان استغرابي ان مش دي نوعيه الاحلام اللي بحلمها عادة انا أحلامي شويه شبهة مكرره يمكن لأني بحب أتفرج على أي حاجه أكتر من مره
أنا ممكن أفضل أحلم نفس الحلم سنين مش بحلم بيه كل يوم لكن بحلم بيه كتير بنفس تفاصيله والغالب عندي بيكون أحلام الرعب يمكن عشان انا جبان في الحقيقه فكان صعب على أدراكي أني أحلم بحد وبعدين أصحى الاقيه في مشكله
وعشان كده يارب ما أحلم بحد أعرفه تاني
أما حلمك يوم السبت فسعاد حسني حلمت بحسين فهمي قبل ما تقابله في خلي بالك من زوزو
:)
مع الفارق طبعا
تحياتي
Post a Comment