شغل وكبت وسينما

بقالي فتره كده مش مظبوط

أنا عارفني لما بكون مش مظبوط

وعارف اني مش مظبوط بسبب زميلي اللي في الشغل اللي مش قادر أتعامل معاه عادي ولأني مش بتكلم وأخرج اللي جوايا معاه مش لسبب غير أني فجأه أكتشفت أن كل كلامنا بيطير في الهواء فقررت أني أبطل أتكلم معاه عن نفسي كفايه نبقى زمايل شغل مفيش داعي انه يدخل جوايا ويتفرج عليا من جوه لأنه في الأخر بيفضل زيهم شايفني من بره

الموضوع ده أثر عليا لأننا في الشغل أكتر من عشر ساعات وأحيانا أتناشر لدرجه أن الفتره الأخيره عدد ساعات نومي زاد بصوره كبيره جدا

أنا العادي بتاعي اني أنام ثماني ساعات متصله عشان أكبر

هما بيقولوا كده في الأعلانات

أه على اساس أني لسه طفل واللي مش عاجبه هو حر

بس بقالي فتره ممكن أنام أكتر من عشر ساعات متصله حتى مع نوبات الحر الأخيره

المهم اويك أند الاخير قلت مبدهاش أخرج أشم شويه هوا أحسن لو فضلت كده يمكن يجرالي حاجه

وكالعاده نزلت على وسط البلد عشان رغم كل عيوبها برتاح فيها

وكالعاده مشيت أتفرج على كل حاجه وكل حد

بس حصل كذا حاجه غريبه

الأول لاقيت واحد عربي ومراته وكانوا بيسألوا البائعين عن مكان عماره يعقوبيان فأنا طبعا شدني الموضوع جدا لأدرجه أني مشيت وراهم

أه وأيه اللي هيمنعني صديقي الصدوق وصوت العقل كان غايب فأنطلقت وفضلت وراهم وصلوا عند باب العنماره وأستغربت أنها طلعت نفس العماره اللي ياما وقفت قداما وأتمشيت من جنبها بس لاقيتهم كملوا تمشيه وطبعا وانا وراهم وكان في عماره تانيه فيها دار نشر وقفوا قدامها شويه وبعدين بصراحه حسيت انهم ملاحظين اني ماشي معاهم

وانا بصراحه منفعش مخبر سري بالمره فقلت أريح نفسي وأمشي أنا ليه حاسس أن الموضوع فيه إن

المهم قلت أشتري مياه عشان كنت عطشان موت ومش كان ليا نفس أتكلم فأخدت المياه من الثلاجه وشورت للولد اللي واقف بأيدي ما معناه كام

أصل أسعار المياه اليومين دول كل يوم سعر

فلاقيته بيقولي ويلكم إن أيجيبت

هالو

فطبعا أنا سخست من الضحك

على

أماره أيه؟

أه يمكن أفتكرني من أيطاليا على أساس أنهم شبه المصريين واللي خلاه يحس بكده أني مبتكلمش بس كان من الأسهل أنه يفتكرني أخرس

مشيت وانا بضحك وهو ورايا بيقولي

From Canda?

المهم قلت ادخل السينما كان في فيلمين مفيش غيرهم واحد هيبدأ بعد ساعه والتاني بعد ساعه ونص وبعد مكالمه طويله مع صديقي حول أختياري لأيهم قررت أني أختار اللي وقت عرضه أسرع عشان مستناش كتير

وكان في سينما مترو

وطبعا أنا من عادتي أنب يقطع تذكرة في أخر صف في السينما

أه بتاع الحبيبه والمخطوبين

بس هو مش حكر ليهم

ثم أنا بحب أتفرج على القاعه كامله

وكنت من أول الناس اللي دخلو ولفت نظري دخول تلات بنات وقاعدوا في كراسي على الممر فأفتكرت فيلم المراهقات لما ماجده كانت هتروح سينما مع أخوها ومامتها وصته أنه يقعدها على الممر ولو ملقاش يقعدها بس يحجز كرسي جنبها ويسيبه فاضي

مكنتش تعرف أن أخر كراسي بتتملي دلوقت هي الكراسي اللي على الممر

وكان في بنت وولد مش عارف ليه لفتوا نظري يمكن عشان كنت أول ما فتحوا باب السينما أول واحد يدخل ومع ذلك لأقيتهم موجودين جوه بس قلت مش مشكله يمكن كانوا في كافيتريا السينما من قبلها

المهم كانوا في الصف اللي قدامي والصف طووووووويل ومع ذلك تقريبا محبوش أني أبقى وراهم فأنتقلوا لنفس صفي بس بعيد عني

وبعد شويه ومع أزدحام المكان أنتقلوا جنبي

بس كان ساعتها للأسف ياما البنت هتقعد جنبي ويفصلها عني كرسي فاضي يأما أنتقل أنا من مكاني وأقعد جنب الأخ السوداني وأنتقلت وانا أرسم على وشي أكبر أبتسامه رغم أني مكنتش عايز أقوم

وانا ذنبي أيه أنك عمال تنتقل من مكانك أنت وفتاتك

لو حد قرأ فتاتك بضم الفاء بدل من فتحها

هههههههههه

المهم الولد والبنت هاتك يا كلام طول الفيلم وطبعا بيعلو صوتهم عشان يسمعوا بعض تقريبا كان في مشاكل في الأذن الوسطى

وانا طبعا بغني ظلموه

بس مش كانوا هما مصدر أزعاجي الوحيد

كان في قدامي بنتين وولدين وحد ضحك عليهم وقالهم أنه مينفعش تقعد تتفرج على فيلم من غير ماتأكل

حد يقولي أيه المشكله

هقوله أنا عن نفسي بخلي صديقي الصدوق كل مره يجيبلي أتنين فشار الحجم الجامبو على أساس واحد ليه وواحد ليا وأكلهم الأتنين

بس الفشار سيدي الفاضل مبيطلعش صوت وهو بيتأكل ده غير أنهم كانوا بيتناولوا منتجات نفاذة الرائحة وأنا عندي حساسيه من الروائح النفاذه ولاقيت فيوزاتي بتضرب ولاقيت اللمبات اللي في نافوخي بتنور

ويااااااااااااااااااااااااااااااااااااااااااااااااااااااااااااااااااااااااه

لأ طبعا مصرختش في السينما بس كانت صرخه مكتوبه وطلعتها دلوقت

وطبعا عشان المعاناه تكمل كان لازم يحضر الجد ومعاه الأحفاد ومن ضمنهم رضيع

وزياده عن دكه حضور خمسه من الشباب اللي واضح انهم مش هيبطلوا تعليقات طول الفيلم

وبدأ الفيلم

وكانت المفاجأه منتهى الكآبة

وأخر نص ساعه هاتك ياعياط مش من تأثير صوت الأخ والأخت اللي جنبي ولا من تأثير صوت الأكل ورائحته من الكرسي اللي قدامي ولكن من كآبة الفيلم

هو انا كنت ناقص