تاج قديــــــــــــــــــــــم

التاج ده جالي من ولو وكمان من فراشه

ولأني فاشل في الأجابه عن التاجات فكنت مش هرد لغايه ما من فتره وأنا و ولو قاعدين قعده صفا مع بعض فقررت أني أستلقي وهو يسأل وأنا أجاوب وكان بيكتب الأجابات في ورقه ولأنه كسول أستنيت أنه ينشرها في بوست بس هو مكسل فقررت أني أنشرها أنا دلوقت

أسيبكم مع التاج

هواياتي

بحب القرايه أوي وكتير هتلاقي في أيدي كتاب وخصوصا الكتب اللي فيها حكايات ويمكن دي أتعلمتها من أختي الكبيره لأني وأنا صغير كنت تقرالي روايات أدهم صبري وأتعلقت من صغري بيها وأفتكرت أول مره مسكت روايه منهم لوحدي وقريتها وكانت تقريبا العدد رقم 60 بأسم دونا كارولينا وكنت ساعتها في تالته أبتدائي
بحب المشي وبمشي كتير لأنه بيخليني أنسى الدنيا ، ساعات ناس تستغرب من المسافات اللي ممكن أمشيها ويسألوني مبتحسش بالتعب فبرد وبقول أني ساعتها بنسى التعب ويمكن دي أتعلمتها من أختي التانيه لأنها كانت تحب المشي كتير

اشهر عيوبي

مش بتعلم من أخطائي وممكن تلاقيني بغلط نفس الغلطه تاني وتالت ورابع
مش بعرف أحكم على الناس كويس وممكن أثق في حد معرفوش ولو حد أعرفه كويس أتردد ساعات في أني أثق فيه
وشي بيحمر على طول من اقل موقف وده بيعصبني عشان كل حاجه بحسها بتبان على طول واللي بكرهه أكتر من أن وشي بيحمر هي الحركه اللي أول ما وشي يحمر أعملها وهي عباره عن أني بتأكد بأيدي أن وشي لسه في مكانه وأجس خدودي وأخرج من المكان اللي أنا فيه لو الفرصه متاحه
مش بعرف أتعامل مع جماعه ، ممكن تلاقيني مع الأفراد تصرفاتي مقبوله لكن لو أتواجدت وسط مجموعه بكون متوتر ومش بعرف أتصرف
القلق والتوتر من عيوبي الرهيبه أنا ممكن أقلق لو درجه الحراره زادت درجه واحده وممكن أقلل حتى من نسمه الهوا صاحبتي
وكفايه لغايه كده عيوب بس حاجه أخيره هي أني مش بعرف أعبر كويس عن اللي جوايا أو عن مشاعري

حاجات بكرها جدا

أن حد يفرض فرض وبعدين يصدقه وبعدين يبدأ يحاسبني عليه
الموضوع ده بيجنني
أو أن حد يتهم حد بحاجه مش فيه
أن حد في الشغل يتكلم عن تصرفاتي أكتر ما يتكلم عن شغلي – وده اللي بيحصل في الغالب- وقيس على كده كمان النظره السطحيه للأمور أو الحكم على المظهر
بكره جدا الزحمه بتخنق منها
وكمان البرد وان كنت بحبه في اللحظه اللي ممكن أحس فيها أن هيكون الوسيله الوحيده أن أرتمي في حضن حد وأنا بتلكك أن البرد هو السبب في حاجتي لجرعه من الحنان والدفا

وأخيرا الأستنطاع – أنا لقيتها كده في الورقه اللي حاتم كتبها رغم أن بيتهيألي دي مش من مفرداتي ويمكن أنا بستعمل لفظ برود أكتر منها- في التصرفات وكمان التمادي في الغلط وأن حد ياخد حاجه أو يتصرف تصرف بسيف الحياء

حاجات بحبها قوي ومش بمل من تكرارها

الحميميه أو الأحساس بالألفه
الأحتواء
الأنتماء
التقارب
بحب الهواء النقي اللي مليان أوكسجين
بحب الأستقلاليه وعدم التدخل في خصوصيات الغير
بحب الميه رغم أني مش بحب رائحتها (لو هي في بحر أو نيل) بحس أن الميه طيبه مبتجرحش
بحب أحساس الفرح
بحب الأطفال
بحب الألوان وتنساقها
بحب أختار هدوم وأن كنت أشك في ذوقي بس برضه بحب

سؤال بيستفزني

ده صوتك؟
بس مش هو أكتر سؤال بيستفزني يعني بس ممكن أعتبر أن أي سؤال بيكون فيه أنتقاد لتصرفي مش لانه غلط ولكن لأنه غريب بالنسبه للسائل فبيستفزني
كمان سؤال هوده لون شعرك؟ كان بيستفزني زمان

امنيتي في الحياة
مش عارف
كان نفسي أبقى حد كويس
كان نفسي زمان في تأليف مرجع لتخصصي ينفع للدراسه ويكون مبسط

حاجات مؤمن بيها جدا

عمري ما هتغير الا لو الشكل اللي هكون عليه بعد التغيير أنا مقتنع بيه مش بس هتغير ليه شعان الناس عايزين مني ده وهيرضيهم كده

مهما عملت هيفضل الناس يبصوا ليا من بره
هيفضل أقتناعي بأن المبدأ مش ممكن تحكم أنه مبدأ في حياتك إلا لو أختبرته بجد
زي الي بيقول انا مش ممكن أخد رشوه ميقدرش يقول أن ده مبدأ صميم في حياته الا لما يختبره بجد

اكتر حاجة فاشل فيها

الرسم وكان نفسي زمان اكون بعرف أرسم وكنت بتضايق جدا في حصص الرسم وبعدها في الكليه في سكاشن الرسم رغم ان اللي في الكليه كان نوع أخر من الرسم والنوع الوحيد اللي حبيته من الرسم كان رسم الاستيل في اعدادي هندسه
الأتصال مع الأخرين حتى اللي بيمثلوا ركن أساسي من أركان حياتي أنا فاشل فشل ذريع في الأتصال مع الأخر
مش بتعلم الدروس كويس

وظيفة بحبها

غير وظيفتي فطبعا حلم حياتي وهو التدريس
كمان شغلانه الصيدلي مش الصيدلي اللي بيقف في الصيدليه ولكن الصيدلي اللي بيقف في معمل اة الكيميائي يعني
بحب الأرشاد السياحي رغم أن عمري ما أتمنتيت أشتغلها بس كنت أحب أتعرف على حد بيشتغلها كنت بشوفهم دماغ
وكمان الصحفي والمحامي في فذهني تصور للمهنتين دول وكنت أحب اتعرف على حد ينطبق عليه تصوري

مثلي الاعلي في الحياة

بيتهيألي أنا مفروض أقول حد أنا تعاملت معاه في حياتي مش رمز يعني فممكن نعتبر أنه استاذ كامل يمكن عشان أيامها كنت لسه بريء

"أستاذ كامل هو مدرس رياضيات درسلي وأنا في تالته أعدادي"