أيامنا بتمر سنه ورا سنه
حسيت بكده لما كنت في المسجد وكان حبيبي واقف بيصلي جنبي وأفتكرت من أكتر من عشر سنين لما كنت بقف في نفس المكان تقريبا وجنبي واحد كان برضه أيامها حبيبي
حسيت بكده لما لاقيت فاتت سنه على مدونتي دي واللي أبتديت بيها وانا مقيد وانتهيت بيها وأنا لسه مقيد بس ممكن أكون اكتر مقيد يتمتع بالحريه في الدنيا دي
حسيت بكده لما شفت المقلمه اللي أختي أشتريتها لأخويا الصغير عشان المدرسه وأفتكرت زمان والمقلمه اللي أتمنتها ومطولتش والمقلمه اللي طولتها ولا حبتهاش
على الهامش
أنا مزعلتش منك وأنت عارف كده كويس بس مبقتش مستحمل أني احس أنك أنت تحديدا بتشوفني غلط
14 comments:
كل سنه وانت طيب
الناس العواجيز بيبقوا يقولوا
ايام بتعد فينا
فعلا مش احنا اللى بنعدها
ربنا يسعد قلبك
رمضان كريم
قريت ردك على تعليقى
اسفه لان كلامى وجعك
بس اصلى كمان كنت موجوعه قوى
يلا
ادعيلى
يارب تكون ظروفك دلوقتى احسن
وان شالله دايما فى احسن حال
قبل اي حاجة خالص كل سنة وانت طيب
بمناسبة رمضان طبعا وبعدين بمنسبة مرور سنة على البلوج اللي باشوفه اكتر بلوجات الدنيا صراحة
كنت بتكتب حاجات تودي ف داهية انت
هههههه
ثانيا الاغنية يااااااااااه حلوة اوي حسستني اني ف رمضان فعلا وفكرتني بحاجة كنت عايز انساها الا وهي اني مش جيبت الفانوس اللي كنا متفقين هاجيبه
اسف بجد النهاردة هايكون عندك ان شاء الله
بس هو هتفضل نفس الفرحة زي لو كان جه قبل رمضان؟
ثالثا علشان انت مش كسرت الربع قرن هاتقعد بقى تفتكر من عشر سنين قال يعني كنت عيل وبتاع وبعدين انت بتصلي التراويح من وانت عندك خماشر سنة ؟
ماشاء الله انا لسه سامع عن صلاة التراويح دي قريب
من ييجي خماشر سنة برضه
رابعا تفتكر هو احنا ليه بنفتكر الحاجات اللي مش معانا وبعيده عنا وننسى الحاجات اللي معانا وقريبه مننا ؟
على الهامش
والله الحاجة الوحيدة اللي باشوفك غلط فيها هي ان انت غلطان ف اللي فهمته بس مش هاتقتنع بكده على العموم رمضان كريم بقى
انت مش كنت نايم امبارح زي ماقلت
صح ؟
هانخرج النهاردة ولا مش معاك فلوس ؟؟؟؟؟ اصلي لسه مش قبضت
اه صحيح انا قلتلك انا لا اقارن بحد تاني
وبعدين تتقال كده
"وجنبي واحد كنت فاكره أيامها انه حبيبي "
هو احنا كده نبقى بنتكلم عليه بحاجة وحشة
مش طالبه الصيام يضيع
اقولك قول اللي انت عايزه ونتفاهم بعد العيد
كل سنةو انت طيب وكل سنةومدونتك كمان طيبة
مدونة بيتكلم صاحبها من قلبه أوي و بحترمها أوي أوي
يارب يكون أحلى رمضان عدى في حياتك و تصلي دايما جنب حبيبكوتفضلوا مع بعض لحد ما تبقوا كباااار ومش تقدروا تصلوا التراويحكلها و انتو واقفين
:D
شفت بفوّل عليكوا ازاي؟؟ :). لأ بجد ربنا يسعد أيامكو كلها و يفضل حبيبك علطول
ابقى اكتب ومش تقلق المدونين عليك كدة
تحياتي
Happy Ramadan
كل سنة و انت طيب يا مقيد ، و كل سنة ومدونتك الجميلة طيبة ، و رمضان كريم ..
انا بس ليا تعليق وغنطوط اوي ...
احساسك انك ما طولتش اللي نفسك فيه ، و لا حتى لما طولت حاجه مش هيه اللي اتمنتها ، اسمحلي ده عامل زي البكاء على الاطلال ، زي اللي بينادي على الموتى ، اللي فات مات ، ماتزعلش على حاجه راحت منك ،لانها ببساطة مش مقدر لها تكون ليك ، المهم لما تعوز حاجه تدور ازاي تحقق غايتك دي ، لكن طبعا بوسيلة مشروعة ، المهم تحاول و تسيب الباقي لله ..
تحياتي و رومضان كريم ..
و اخر الكلام سلااااام ..!!!
كل سنة وأنت طيب وعئبال مايعدي عليك 100 رمضان
ويكونوا كلهم في طاعة الله
واللي أبتديت بيها وانا مقيد وانتهيت بيها وأنا لسه مقيد بس ممكن أكون اكتر مقيد يتمتع بالحريه في الدنيا دي
حلوة أوي الجمله دي
وكل ماتزيد مساحة الحرية عندك كل ماتقل مساحة التقييد
سلام
محمد
بقالك كام يوم غايب
لا بوستات ولا ردود
يارب يكون غيابك خير
دمت فى امان الله ورعايته
حبيبه
كل سنه وانتي طيبه يارب ولو انها متأخره كتيررررر بس أنا كده دايما كان ترتيب الاخير
عندهم حق جدا
ويسعد قلبك يارب
تحياتي
على الهامش
مفيش داعي للأسف أنتي مكنش قصدك توجعيني
ويارب تكوني أنتي كمان مبقتيش موجوعه
ولو
وانت طيب بس أنا مبكتبش بصراحه أوي
أو يمكن أكون بكتب بصراحه وأنا مش واخد بالي
أنا منستش على فكره الفانوس ودي مش أول مره تطنشني رغم أني كمان المره دي طلبته منك وقولتلك أنا عايز فانوس وكنا ساعتها عند بتاع الفوانيس وأنت قولتلي بعدين وطنشت ورغم أن بابا جبلي فانوس بس برضه أضايقت انك أنت مجبتليش فانوس
ورغم أنك كاتب الكومنت من أسبوع وبرضه مجبتش الفانوس
يابخيل
ممكن فعلا بس عشان اللي معانا بنشوفه دايما فمش بنكون حسينه لغايه ما منلاقيهوش معانا فنبدأ نفتقده
زي ما أنا بفتقدك دلوقت كده
فاكر الخروجه اللي كنت هنا بتتكلم عليها وفاكر أن خناقتنا فيها كانت أكبر من الخناقه اللي بسببها كتبت البوست ده وفاكر أنها كانت برضه بنفس السبب
على الهامش
نفسي أسألك من ساعه الخروجه الأخيره ومكسوف انت بجد شايفني زي ما قلتلي يومها ولا كان كلام في لحظه أنفعال وهل مفروض أفكر في كل مره بتقولي فيها كلمه كويسه أنك بتقول كده عشان تريح دماغك ولا عشان أنت شايف كده
تفتكر أسأل ولا بلاش؟
عزيزتي الفراشه
كل سنه وأنتي طيبه وبألف خير أن شاء الله
شكرا على الكلام الجميل وبجد أحترامك للمدونه غالي جدا جدا عندي
اللهم أمين
يارب يتقبل دعاءك وأنا من زمان عارف أنك مبروكه
:)
نورتي بجد
عزيزتي صوره
كل سنه وأنتي طيبه والله أكرم
كلامك أكيد صح بس المشكله فيا أنا
تحياتي
عزيزتي ذات القلب النابض
كل سنه وأنتي طيبه يارب
أنا معاكي بس ولو هو اللي مختلف لأنه شايف أني فاتح المدونه على البحري
تحياتي
على الهامش
أنا مليش دعوه أنا كنت عايز اكون أول تعليق على اول بوست في المدونه بس سابقوني
حبيبه
معلش عشان الغياب هو خير الحمد لله وانشاء الله البوست الجديد قريب انشاء الله
Post a Comment