هلوسه

السفر بكره
بطني بتوجعني
مش عاوز اسافر
مش متفائل
أمبارح شفت في المكتبه عدد من كتب فلاش بتاعت زمان كان فيها واحد اسمه علام بيتهيالي انه كان مكتئب على طول حاسس أني شبهه
عاوز أنام
عاوز أروح البيت
مش عارف مالي
مش عارف زعلان ليه
:(
خايف أوي
كنت زمان بتأثر أوي بجمله في أغنيه سعاد محمد بتاعت وحشتني لما كانت بتقول
من خوفي لبكره يفرقنا وأحنا يروح قلبي ما صدقنا
دلوقت مش بقيت بخاف من بكره بس
بخاف من بكره
ومن أمبارح
ومن الناس
بخاف من الناس أوي معرفش ليه
ليه؟
أمتر كلمه بتنرفزني وأكتر كلمه بقولها حتى لنفسي
بعد كل كلمه في ميت ليه ودايما مفيش إجابه
إمبارح قررت أني أرجع تاني لأحلام اليقظه او تحديدا لحلمي الوحيد
بحلمه من وانا عندي عشر سنين
كل ما أحب افصل عن كل الدنيا أحلم نفس الحلم وأعيش في الخيال مع ناس تانين بشخصيات مختلفه
أمبارح قررت أني أرجع تاني أحلمه بس من غير ما أندم بعد ماأحلمه وأقول لنفسي أن مينفعش أحلم تاني
أنا كبرت
هو انا فعلا كبرت؟

النهارده كان في بنتين تدريب ومستر برند دخل وانا استغربت انه طول في الوقفه فقلتله تدريب فأستفسر اكتر تدريب معانا ولا تدريب جامعه قولتله لأ تدريب جامعه فشكر في وأقولهم أني حد كويس وأنهم محظوظين وفرحت بس زي ما توقعت
طلع بعدها أنه كان بيعاكس مش أكتر
شفت بنت جميله وحب يقف شويه معاها
طول الوقت أقول أني بكره حد ياخد ميزه ميتسحقهاش عشان حاجه ملوش يد فيها انا اخدت مدح عشان موجوده بنت حد شافها جميله والبنت اخدت أهتمام عشان حد شافها جميله
أنا مش بكره مستر برند ولا اتضايقت لما عرفت انه بس كان عاوز يعاكس بنت اد اولاده بس كرهت نفسي اني فرحت شويه لحاجه مستحقهاش

نفسي أرتاح
نفسي اعيط اوي من غير ما حد يسألني ليه
أو يقولي عيب
أو يقولي بس كفايه

خلاص هسافر بكره
عارف انهم يومين بس
وعارف انها يمكن تكون فرصه في نظر ناس كتير

بس مش عاوز اروح في حته
مش عاوز حاجه
عاوز افتح الاب توب واتفرج على اي مسلسل
او امسك اي روايه واسرح في شخصياتها
وبس
مش عاوز ناس
تعبت