ذكريات

لسه فاكر شويه ذكريات صغيرين عن أيام أمتحاناتي

فاكر كويس وانا في أبتدائيه سنه الزلزال وساعتها مدرسة الحساب كانت متفقه معانا اللي هيجيب الدرجة النهائيه في امتحان نص السنه في الحساب ليه هديه وطبعا كانت الامتحانات هيصه وغش فظيع كنوع من أنواع التعويض للطلاب وفاكر كويس ان الأمتحان ده بالذات مكنتش برضى اني اسمع كلمه من اللي بتتقال في اللجنه عشان أجيب الدرجة النهائيه بمجهودي وطبعا مجبتش الدرجه النهائيه في حين ان نص الفصل جاب الدرجة النهائيه
وفاكر كمان امتحان الأعداديه والليله اللي قبل أمتحان العربي وكان الجو حر ومستلقي انا على السرير واختي الكبيره عماله تكلمني عن المستقبل وعن الاحلام مش بنسى اللحظات دي ومش بنسى كمان المغص الرهيب اللي كان عندي تاني يوم في اللجنه نتيجه لنومي والشباك مفتوح واللي بسببه خرجت من اللجنه قبل ميعادي وعلى الرغم من ذلك جبت اكبر درجه في العربي مكنتش حصلت عليها قبلهاوفاكر كمان أمتحان الأجياء في الثانويه العامه وأضطراري اني اكتب طول الوقت من غير ما اسيب القلم عشان أحساسي بأني مش هلحق أخلص أبدا لدرجة أن لما جزام البنطلون أتفك ما حاولتش اني أعدله وكمان مش بنسى اللي حصل لما طلبت من مشرف اللجنه وهو شتيفني في الوضع ده من ساعه ما دخلت اللجنه وقولته هغسل وشي على العلم ان الحوض اللي هغسل عليه وشي هيكون قدامه بس طلبت اني أخرج كل اللي في جيوبي حتى الفلوس وكمان مد هو ايده جوه جيبي في نفس الوقت اللي ظبته فيه ولد في نفس اللجنه ومعاه ورق في ايديه بيغش منها ومعملوش ليه حاجه
لأ نسيت عملوا حاجه طلبوا ليه ليمون عشان يهدي أعصابه وجابوله ورقته يكمل نقل منها عشان كان عايز يدخل فنيه عسكريه او حتى شرطة ومكنوش عايزين مستقبله يضيع
وفاكر كمان أمتحان الكيمياء في الثانويه العامة وحاله التسمم اللي جاتلي يوم الامتحان نتيجه لأكله سمك اليوم السابق للأمتحان عشان ابطل طفاسه
وفاكر كمان الرياضه في ثالثه ثانوي لما انهرت قبل الامتحان بشهر وقلت خلاص انا مش هنجح فيها وأتفاجيء اني بخرج من كل امتحان بدون أي غلطات وكانت النتيجه دخولي هندسه بدل صيدله
فاكر كمان امتحان الاستاتيكا في اعدادي هندسه وكنا في رمضان وانهرت بسبب موجه برد رهيبه ولما الدكتور وصل اللجنه وصمم اني افطر وقالي هبعتلك دوا مع الداده بس لازم لما تروح تكشف لأن الحاله خطيره ولما وصلت الداده ومعاها الدوا كان في ايديها كوب من الماء الأصفر ولأننا في رمضان في كان صعب أني يكون معايه اي حاجه عشان ابلع بيها الدوا واضطريت اشرب الميه الصفر
فاكر كمان امتحان الرياضه في سنه اولى جامعه والناس عماله تضرب اخماس في اسداس عشان الامتحان غريب وانا بعد مرور اقل من ساعه بطالب بكراسه اجابه كمان وبعد انتهاء نص الوقت مباشره بسيب للجنه واخرج
فاكر كمان ماده الجيولوجيا في سنه تانيه وشكوى الجميع من الدكتور ورعبهم منه ومع ذلك الحضور أجباري عشان درجه اعمال السنه ورغم عدم حضوري ولكن في المحاضره الاخيره وعشان كان لازم اعرض الموضوع الخاص بي حضرت وقبل ما اصحابي يتفاجؤا كنت انا ازبهليت لما لاقيت الدكتور داخل عليا وبيقولي كنت كويس ورغم رفاضه الاجابه على اي سؤال من اسئلتهم جاوب على اسئلتي وحتى بعد الامتحان الاخير اللي تقريبا ما حليتش فيه حاجه لاقتني جبت تقدير في الماده
فاكر كمان سنه تالته وامتحان التحليل العددي واللي كان فيه اثبات الدكتور قاله في ثماني محاضرات وبيتكتب في اكتر من عشر ورقات من الحجم الكبير ونوبه الضحك اللي انتابتني في اللجنه لدرجه ان دكتور اللجنه وصل وبيقولي هو الامتحان في نكت ولا سهل اوي للدرجه دي قلتله لأ هو في كلام تسميع ما يخصنيش انا مليش في نظلم التسميع وكان رده خلاص حل اللي ممكن ينجحك واي نعم مكنش تقديري في الماده امتياز بس كتت فخور انه مكنش مقبول
فاكر كمان البكالوريوس والممقررالاختياري اللي قبل المتحان بيومين قررت اني خلاص مش عايز ادخله وكانت المفاجأه هي الامتياز في الماده
زي مافاكر تمام في نفس السنه مادة اختبارات الابار اللي كنت تقريبا بشرحها للدفعه كلها واتفجئت بمعظمهم جاب فيها امتياز واكتفيت انا بالجيد جد
ياه كانت ايام افتكرت حاجات كتير من ده لما النهرده شفت بنت صغيره لابسه في شعرها شريطة حمرا زي بنات المدارس زمان وكمان افتكرت لما اختي الكبيره وكانت في السنه الاخيره في كليه التربيه وكانت تدريب في احد المدارس الثانويه بنات وطردت بنت من الفصل وبعتتها على الناظره عشان البنت قلعت التوكه من شعرها وفضلت تلعب في شعرها جوه الفصل
ولما شفت مذكرة من مذكرات اخوايا اللي في الاعداديه واللي المدرس ملقاش اسم ليها غير
البهروزه
وكتب عليها والبنبط العريض وبكل فخر
طول ما معايا البهروزه

اعصابي مش مهزوزه
افتكرت على طول اعلانات الفنكوش

تم ترارارا تم تم

الشيطان الصغير

امبارح مديري طلب مني طلب انا بصراحه شفته طلب خارج
مديري السابق كان عايز يقدم على مصيف تبع الشركة بأسمي وانا وافقت وبعدها لاقت أحد الزمله بيبلغني ان مديرنا الجديد طلب منه أنه يبلغنا كلنا أن لو المدير السابق طلب من حد مننا انه يقدم على مصيف بأسمه فيرفض
وفؤجئت ساعتها ان فعلا مديري السابق طلب من غيري قبلي ورفض
بس ساعتها انا قلت لزميلي اني بالفعل وافقت وكنت ساعتها بعمل الاوراق
فقالي كده هتعمل مشكله مع المدير بس انا مهتمتش وقبل ما أخلص شغل لاقيت مديري بيقولي لو مديؤك لاسابق طلب منك انه يقد على مصيف بأسمك أرفض
قلتله بس هو فعلا طلب وانا وافقت وقدمت الأورق
فقالي أسحب الأوراق
فأنزهلت بصراحه
وسكت وهو تقريبا حس بنفسه أخيرا فقال
دي فرصه ليك وليه تضيعها منك وانت أولى وشويه كلام من هذه العينه
فقلتله بس احنا مش بنحب نصيف
ودي حقيقه مش كدبه قلتها
فقالي انت حر وانصرف
بس انا كنت متأكد أن الموضوع مش هينتهي
انا مش بحب كتير المصيف ومش بحب زحمة المصيف وغير ده وده فين الإيثار
انا جايز أكون الشر جوايا كتير بس واللهي لما بقدر وبالذات لو الموضوع بالنسبه لي مش ذو أهميه بحاول أعمل حاجه كويسه
المهم النهارده من الصبح كلام مديري معايه مختلف هو والحق يقال موصلش لدرجة الأذيه بس برضه مختلف والسبب معروف برضه
ليه نكره حد ونجبر اللي قدامنا بأي شكل انه هو كمان يكرهه
ليه منحترمش ان فروق السن لازم تفضل محفوظه
ليه كل مدير ميفكرش انه هيكون في يوم مدير سابق
ليه تحدديا انا اللي مديري الجديد أكد معايه تاني أني موافقش


بقالي فتره بقرأ في قصه لأحسان أسمها الحياه فوق السحاب
انا في فتره من الفترات كانت كل الروايات اللي بقراها بدور على فتره ما قبل الثوره وصولا للثوره بس القصه دي شويه مختلفه
بطل القصه منير ورغم أني مش بحب الأسم أوي بس شخصيه كويسه كتير ريحتني الى حد ما من شويه القلق اللي كانوا لسه عندي بعد أنتهاء ثقوب في الثوب الاسود

على الهامش

انا عارف اني شرير بس دلوقت حاسس بالشر اكتر كنت في اجتماع مع زمايلي عند مديري وبعدين في وسط الكلام حد منهم بيتكلمن عني فقعد وقت طويل يقول لأ إلا محمد ده بالذات الوحيد اللي محدش منكم يكلمه

انا بحتقرني

العقل الواعي والعقل اللاوعي

بقالي فتره كده كنت ماسك قصه لإحسان أسمها ثقوب في الثوب الأسود ومش عارف أزاي مشفتهاش قبل كده رغم أني كنت قضيت من زمان على قصص احسان كلها
المهم القصه دي هو فيها بيقوم بدور طبيب نفساني ودي طبعا مش أول قصه ليه بالشكل ده ومش ده هو اللي شدني في القصه ولكن اللي شدني هي شخصيه الأبطال اللي هما نفسهم المرضى النفسيين كانوا أخ وأخت سامي وساميه الأتنين مرضى بس كل منهم بمرض مختلف
سامي كان بيعاني من أزدواج تام في الشخصية بحيث لا تدري كل شخصية بوجود الاخرى بينما ساميه كانت تعاني من توقف في نمو الشخصية عند سن العاشرة
وأي نعم أنا من الناس اللي أول ما تقرا عن أعراض مرض ما إلا وبقدرة قادر وسبحان الله كده الاقي نفسي بعاني منه بس المرة دي الموضوع مختلف
حسيت مع كل مراحل تتطور مرض سامي أنه بيتكلم عن حاجات فيا مع الأختلاف طبعا بس أي شيء في الدنيا ممكن أخليه يدور حواليا
هو ده انا
ياه الجمله دي بقيت كتير بقالها دلوقت عشان أفهم اللي حوايلا ان هو ده انا بس ده مش موضوعنا دي جمله أعتراضيه في الحوار
المهم اني تعاطفت مع سامي وأنا اللي نادرا ما أتعاطف مع بطل ده حتلى في أنا كارنينا اتعاطفت مع الزوجه الخائنه وما أتعاطفتش مع جوزها رغم ان القصه كانت تختلف تماما عن نهر الحب لأن في نهر الحب زكي رستم كان يستاهل أنه يتكره لكن في القصه الأصليه كان راجل طيوب أو هكذا خُيل لي من الترجمة وعلى ما أتذكر أني قراتها ضمن سلسله كتابي اللي بيترجمها حلمي مراد
ده انا تماديت واتعاطفت مع مدام بوفاري
بس المره دي تعاطفت مع سامي يمكن عشان مكنش في صراع في القصه بين سامي وبين احد الأبطال ولكن كان صراعه مع نفسه وعشان كده أتعاطفت معاه وحسيت أني أنا كمان أعاني من نفس الأزدواج وإن كان في حالتي مش أزدواج تام ولكن كل شخصيه عندي عارفه الأخرى ولكن مش قابلها
المهم كان سامي عقله الباطن أضعف من عقله الواعي
بينما ساميه كانت العكس وكان عقلها اللاوعي أقوى من عقلها الواعي
وساميه كمان في القصه حكايتها حكايه
أتعرضت لصدمة رجعتها تعيش في عمر العاشره وتقف عنده
وانا كمان بحس اني نموي وقف لغايه العاشره وعشان كده كل تصرفاتي اللي كنت بتصرفها في سن العاشره لسه بتصرفها لغايه دلوقت وده اللي عاملي مشاكل مع اللي حواليا
بس بصراحه ساميه كانت لسه بتحط صوابعينها بين شفايفها لغايه العاشره بس أنا لأ عشان كده ده كان اختلاف بيني وبينها
المهم ان في القصه عقدة الأخ سامي والاخت ساميه أتحلت الحمد لله عقبال قيوديأنا كمان يارب


أمبارح في لحظة تجلي نادراما تنتابني وأنا بكوي الهدوم قدام التي في لاقيت برنامج شبابيك مستضيف ياسمين أنا كنت شفتها مره قبل كده بس كانت بتتكلم عن الحب أو شيء من هذا القبيل
على ذكر شيء من هذا القبيل ولأنها جمله غريبه كنت بكلم واحد زميلي وفي وسط الكلام بقوله وأنا في خذم المعمه إذ بي أفاجأ فقالي دي من تأثير القصص اللي بتقراها
أيه المشكله لما أعبر عن موقف بجمله من عينه وفي خضم المعمه إذ بي أفاجأ ده حتى كلام عربي لطيف
المهم ماما لما سمعت يامسين بتتكلم عن الحب من فتره كانت شايفه انه عيب فساعتها مكملتش فرجة
المهم أمبارح قلت أتفرج بما أن ماما مش موجوده –رغم أنها فريش والله دي كانت بتتفرج معايه أمبارح على أنف وثلاثه عيون رغم أنه يندرج تحت بند الأفلام الخليعه هي أي نعم كانت بتقول تعليقات من عينة أيه القرف ده بس كانت مستسلمه- المهم لاقيت ياسمين كانت برضه بتتكلم عن العقل الواعي والعقل اللاوعي قلت لأ ده أستنصاد بقى وركزت جامد لدرجة كادت أن تلحق الضرر بأحب قمصاني لي بس ولو كله فداء للمعرفه
أنا عجبني في حوار يا سمين حاجه كويسه أوي كانت بتتكلم أن لو مثلا الواحد قاعد لوحده وساعتها حتى قالت لسلمى المذيعه لو انتي مستنيه جوزك اللي أتأخر وفضلتي تفكري فسلمى قالتلها أه أن في صراصير هتهجم عليا أصل بخاف منهم موووووت فقلتلها عشان تتغلبي على ده أفضل حل أنك تخرجي أفكارك على الورق وتعملي الحوار اللي داير جواكي على الورق
وقالت أن جوانا صوتين
صوت بيشجعنا وصوت بيحبطنا وان افضل حل أني اخرجهم من جوايا واحطهم على الورق عشان أقدر امسكهم
الموضوع كان كبير شويتين وانا بصراحه تعبت من كتر الكتابه
بس ملخص القول ان الفضفضه بتنقينا من جوه

خلص الكلام

بقى هما الناس كده؟

سعاجد حسني كانت في الاغنيه مستغربه هما ليه بقوا كده

وكانت مستخسره فرحتها عشان مش في أوانها

بس يمكن تكون هي اللي غلطانه

أنا بقول ايه

انا بضحك على نفسي

أخيرا نقلت شويه لينكات بس للاسف في كتير لينكات ضاعت مني عشان كانت على الديبو لسه في شويه لينكات بس مش دلوقت شعان انا تعبت

يارب ارحمني

كنت زمان برد على اي حد يعلق على تصرف من تصرفاتي وأقول هو ده أنا

بس دلوقت بفتقدني

يمكن اكون عشان حاسس اني غريب دلوقت اكتر من الاول

يمكن عشان هو دلوقت بعيد وعارف انه تعبان وانا مش قادر اعمل حاجه

يمكن عشان مش شفته لغايه دلوقت رغم انه موجود في كايرو من يومين

يمكن عشان كل الناس دلوقت ماشيين ورايا يقولوا انت كبرت انت كبرت

هو انا مش عايز اكبر؟

هما بجد ليه الناس كده

هو ده اللي انا فتحت عشان اكتبه وعمال اكتب اي كلام شعان مش اقوله

اه انا غريب

بس مش كائن فضائي على الرغم من ان سكان الفضا ممكن يكونوا كويسين

كل ما اتحرك في مكان اسمع كلام لطيف وفي نفس الوقت اشوف تصرفات تصدم

الشغل مجنمع غريب

الناس في كل مكان بره الشغل غريبه

انا بجد عايز ارجع تاني ابعد تاني عن كل الناس واعيش في عزلتي

مكنتش بتجرح اوي لما كنت بعيد مكنش بيهمني من كلامهم ولا تصرفاتهم كنت بشوف انهم مش بيشوفوا غير ملامحي فحكمهم أكيد منقوص

انا بكدب تاني على نفسي

أكتر لحظاتي بؤس وانا لوحدي

كان نفسي اكون معاه

محتار

بجد محتار اوي

كل حاجه بتحصل فجاه

محتاجك اوي جنبي

عارف انك انت يمكن يتكون محتاجني

لأ

أنا متأكد انك محتاجني جنبك وده بيضايقني لأني مش عارف أكون جنبك

أه أنا جبان بس صدقني دي اول مره أحس اني مش عايز اكون كده

نفسي أشوفك

أنا زعلان

لأ أنا مش زعلان

كنت عايز اقولك أني مش ضعيف

كنت عايز اقولك ايه اللي بيحصلي عشان تكون فخور بيا

فاكر لما كلمتك من حوالي عشر أيام كان يوم الجمعه بيتهيألي أتناشر في الشهر

وقولتلك خلاص تاقصه القديمة خلصت خلاص

تعرف التليفون رن أمبارح وانا مش ضعفت ومش رديت والنهارده كمان

كان نفسي تكون موجود

كان نفسي تكون معايه وانا في المترو أمبارح وانا بلعب بالزرار اللعبه القديمه فاكرها؟

وبحاول اخلي الزرار يدور وانا بشد الفتله وارخيها عشان تلعب معايه

انت عارف فجأه بطلت لعب لاقيت عربيه المترو كلها بتبصلي وكان في واحد شفته قبل ما العب بيقرا في المصحف لاقيته بيبصلي ويبتسم

وأتكسفت

عارف انك كنت هتضايق مني بس كنت هتدافع عني

عارف انك مش كنت هتسبني احس ان حد بيبصلي بصه مش كويسه

كان نفسي تكون موجود

كان نفسي النهارده وانا في الشغل اكلمك واقولك على زمايلي وعمايلهم معايه

تخيل انهم بيتهموني اني مش بشرح لمسعود كتير

تخيل ان منهم اللي شايف ان تصرفاتي الطفوليه ممكن تجرح لدرجة انهم شبهوا تأثيرها بتأثير الناس اللي مش بحبهم اللي بيتصور ان الارض منديل كبير ممكن يستعملوا بحريه

كان نفسي تكون موجود

لأني عارف انك متضايق وبتضطر تكدب عليا في كل مره بكلمك فيها

كان نفسي تكون موجود عشان اقولك مش تزعل

الموت

النهارده كان يوم غريب من بدايته

أمبارح رجعت بدر عشان اقعد على النت براحتي وعشان كلم اختي على النت بس النت مش كان عايز يشتغل

نمت من المغرب على اساس ساعه وأقوم مش صحيت غير بليل خالص بعد تلاته

مش فضلت صاحي كتير وبعدين نمت على طول

قررت فجأه اروح السينما

ويدوب دخلت وقعدت على الكرسي لاقيت موبيلي بيرن رقم غريب ولاني بخاف كان ممكن مردش بس مش عارف ليه قررت ارد

طلع اخو حاتم الصغير وبلغني خبر صدمني

جد حاتم توفى

كنت واقف وانا بتكلم بس حسيت اني مش قادر اقف اكتر من كده محتاج اقعد

دي مش اول مره اسمع خبر وفاه

افتكر اول خبر وفاه وكنت واعي كان خبر وفاه عمة بابا وانا في ثانويه عامة وكان كل اللي شاغلني ايامها الاضطرار لسفر البلد في البرد

والخبر التاني كان خبر وفاه جدو بابا ماما وفاكر يومها كويس كنت بعد التخرج في رحله البحث عن عمل وكنت صاعتها مستني حاتم قدام الشركة اللي اشتغل فيها بعد كده شغله الاول

وساعتها بابا قالي مش ضروري انت تسافر

ومش سافرت فعلا ايامها

والخبر الثالث كانت تيته والده بابا وكنت ايامها بشتغل في القاهره وكنت في وسط البحر كان عندي شغل ولاقيت بابا بيبلغني الخبر ومنزلتش غير بعدها بيومين ومش سافرت البلد غير بعدها بأكتر من اسبوعين وكنا في العيد

بس يمكن عشانكل مره من دول كان في مقدمات

عمة بابا كانت تعبانة مش بفاكر بأيه

وجدو كان عنده سرطان وتيته كانت تعاني من محموعه كبيره من الامراض ولفتره زادت عن العشر سنوات عشان كده مش اتهزيت زي المره دي

انا مش شفت جد حاتم غير مرات معدوده

بعد ما قفلت خط التليفون خرجت من السينما كانوا الناس بيبصولي بأستغلااب لان كانت لسه الناس بتدخل وانا بخرج

وقفت اول تاكسي

وانا في التاكسي كنت حاسس اني مش قادر افكر ولا اتصرف

وانا في الحالات دي مش بيكون قدامي غير حاتم الجأ ليه

كلمته حسيت من صوته انه مش يعرف حاجه فمش قلتله

بس هو حس من صوتي ان في حاجه

رجعت على البيت

وقلت لاخو حاتم الدفن امتى والعزا

بس مش كان يعرف

غيرت هدومي عشان مش كان ينفع اروح بلبس اللي عليا واترددت كتير بس مش عارف ليه اخترت القميص الابيض

وحاولت اكلم اخو حاتم تاني بس هو مش رد عليا

حستني مش قادر اخد نفسي فرحت على المكتبه رغم اني كنت عديت عليها الصبح

فضلت في المكتبه شويه وحاولت ادخل على النت من هناك بس كان سيء جدا

وحاتم كلمني وقالي اكلمه لما اروح

روحت وكان في اكتر من حاجه عماله تزن في دماغي

حاتم كان مفروض ينول من يوم الاربعاء ونزوله اتأجل

سبحان الله

لا حول ولا قوة الا بالله

انا مش بعرف افكر في المواقف الصعبه وبلاقيني بكلمه هو بس هو اخر واحد مفروض ازعجه

حاولت اعمل اي حاجه

وفي الاخر دخلت انام شويه وحسيت كاني نمت قرن فقمت

وفضلت شويه تايهه

وكلمني حاتم

ومن صوته عرفت انه عرف

وسـلني انت ليه مش قلتلي

هو كده كده قبل اي شيء كان مفروض هينزل بكره وبعد ما حصل اللي حصل هما بس قالوله ان جدو تعبان فقال هينزل النهارده بليل

انا عارف حاتم كويس

زمانه دلوقت منهار

انا مكنتش احب انه يحصله كده

لا اله الا الله استغفر الله

زمانه لسه في الطريق يارب تهون عليهاللهم ارحم موتانا وموتى المسلمين

اخيرا

أخيرا النت شاتغل في البيت

مش فاضل كده غير اني اجيب كل اللينكات عشان اقرى مدونات اصحابي براحتي

اي نعم من امبارح والحوادث الغريبه متتاليه عليا بس الحمد لله دلوقت النت أشتغل

على الهامش

امبارح اول ما نزلت من البيت لاقيت فوق العربيه اللي واقفه قدام البيت اللي جنب اللي جنينا

كلب

وكان واقف في العربيه زي الاسد

وكان اسود فاحم

وقفت شويه وبعدين قررت امشي من الناحيه التانيه من الشارع

وبعد مالتفت قلت ابصله بصه اخيره

والتفت تاني ابص عليه

لاقيته اختفى

أنا وحشتني

أنا وحشتني
على عكس أغنية تامر حسني كنت بقول انا مش عايز اتغير
أول ما أتخرجت سجلت دراسات عليا وكنت بضطر ساعتها وانا في التمهيدي أني أحضر محاضرات يومين في الأسبوع وكنت كل ما أتعامل مع حد يقولي
أنت أكيد لسه مشتغلتش
القطاع لسه مش بهت عليك
وحاولت كتير افهمهم ان تصرفات الفرد مهياش انعاكس عنه او عن بيئته اد ما بتكون أنعكاس عن طريقة تفكيره وده ملوش علاقه بشكل كبير على الوسط اللي بيعيش فيه
وفاتت سنه واشتغلت بعد تخرجي بسنه واول ما اشتغلت كان الناس اللي في الشركة القديمة يقولوا الغربال الجددي ليه شده وبكره يرخي
على أساس ان تصرفاتي مش هتصمد كتير قدام القطاع
ومرات شهور وغيرت الشركة ورحت شركة جديده وكنت أختبار أشد لأني مكنتش في الشركة الجديده في القاهرة ولكن كنت في الحقول
والحقول دي حاجه كده أشبه بالمعتقلات
وخرجت من الحقول بسلام واتنقلت القاهره ومرت سنه ونص مش عارف ازاي بس مروا
بس خلاص زهقت
أنا مش ملاك وتصرفاتي مش صح بس انا مش عايز اتغير
أنا مش عارف أيه المطلوب مني تحديدا
من يومين أشرف جابلي حاجه ساقعه واحنا العادي ان الحاجه الساقعه بتكون بعد صلاة الضهر بس كنا يوم خميش واشرف قال يعطف علينا ويوزعلنا الحاجه الساقعه بدري شويتين
اه اشرف تبع البوفيه عندنا
المهم كان المهندس الجديد المقيم معايه في نفس المكتب
اه طبعا مقيمين انا بقعد في الشركة اكتر من اتناشر ساعه يوميا حتى ايام الجمع والاجازات
انا من يوم ما بقيت موظف حكومة وتحدديا من العاشر من مارس لعام الفين وثمانيه وانا موجود في الشركة كل يوم وللحق فيما عدى يومين
يعني ستين يوم كنت في الشركة منهم ثمانيه وخمسين يوم يبقى مقيم ولا لأ
المهم كان الاخ الجديد موجود في المكتب المجاور فقلت اوديله الحاجه الساقعه بدل ما تبرد وكمان عشان هو كان شكله هيطول في المكتب اللي جنبي ودخلت عليه بالحاجه الساقعه ومن سكوت سيبتها وقبل ما أخرج إذ بي أفأجأ بدعابه سمجه من أحد الزمله الموجودين
هو انت شغال مع أشرف النهارده؟
طبعا انا والحق يقال متملكتش نفسي
لأ طبعا مضربتوش
بس أعطيته نظره ناريه وخرجت وده في نظري عدم تحكم في الأعصاب أنا محبوش
واللي غاظني أكتر ان الزميل ده هو اللي اتقمص لاني غيرت طريقه تعاملي معاه
وده مش الموقف الوحيد لكن الموقفف كتير وافظعهم ما يتعلق بصلاحيات العمل
مديرنا الجديد بيتوهم اوقات اني مش بشري ولكن حاجه أقرب للضفادع البشريه
مش عشان موضوع العوم لاني مش بعرف أعوم ولكن عشان لاضفادع البشريه تجمع في صفاتها بين صفات البشر وصفات الحيوانات
وانا مش عارف أي كائن اخر مديري شايف اني بجمع بينه وبين الصفه البشريه فيا بس انا ملاحظ انه مش بيعتبرني بشري عادي
ساعات بحس انه متخيل اني من سكان الكواكب الاخرى على غرار الصور في الافلام الامريكاني اللي لا أعتقد انه بيتابعها بس يمكن بيشوف اعلانتها ويشوف الاشخاص الغربيه اللي عندها اكتر من عين واكتر من ايد واحيانا أكتر من رجل
وساعات بحس انه بيتخيل اني من بني الجان واستطيع قراءه افكاره قبل النطق بيها
وساعات بحس انه متخيل أمتلك سرعه الفهد وسكون القطط
بس ساعات بدي لمديري العذر هو راجل مظلوم وصل لاقى انه لو طلب حاجه من حد ممكن يعملها في ساعه مش عشان هي تستاهل ساعه ولكن شعان يحرم يطلب النوعيه دي من العمل من حد منهم ولكن طبعا هو بيتوهم أنهم مش عندهم القدر من السرعه اللي تخليهم يخلصوها في دقايق ولاقى على الصعيد الاخر انه لو طلب مني ايه هشتغل بايديا الاتنين واحيانا برجليا كمان عشان اخلص الحاجه بسرعه فتخيل اني ممكن انجزله شغله بسرعه اكبر
وهي دي اكبر مشاكلي
انا لما بحاول اجتهد في شيء مهما كان تافهة وغبي او زي ما بنقول عليه عندنا هسس فده عشان انا كده مش عشان مديري يستاهل كده ومش عشان اسمع كلمه حلوه ومش عشان اضر زمايلي ومش ومش ومش
من يومين واحد من زمايلي بيقولي مشكلتك انك نضفت الحمامات كويس
اه الافيه المشهور من الفيلم الاكثر سفاله سوق المتعه لمحمود والهام
كان شايف اني عملت الشغل الهسس كويس لدرجة خلتني تخصص هسس
ودي حاجه تضايقني
انا ميضايقنيش اني اشتغل شغل روتين-مصطلح بديل للهسس- بس يضايقني اني يطلع عليا سمعه اني روتيني
وكمان مين يطلعها عليا زمايلي ده انا مستحملوش
بس في نفس الوقت انا مش عايز اتغير انا بحب اعمل شغلي مهما كان بشكل كويس
بلاش
النهارده طلب مديري من احد الزمله انه يقوم بترجمه جزء من الأنجليزيه الى العربيه والواد عمل المستحيل عشان يخلي الترجمة بتاعته قطعه من جحيم يكوي بيها المدير عشان يبطل يطلب منه هذه النوعيه من الشغل مره تانيه
أنا التصرف ده يضايقني ليه متعملش شغلك صح؟
بس انا مليش حكم على حد
بس يايقني ان يجي حد منهم انا اعرف انه متهموش مصلحتي في شيء بل على العكس كل واحد فيهم وقت المصلحه أنا أول واحد هيبعيه وتلاقيه جاي يقولي انت مفروض تتغير مينفعش تتعامل كده
بيفكروني بأيام الحقول لما كانت كل جريمتي في نظرهم اني بقوم لحد كبير في السن بيدخل علينا المكتب وان ميصحش كده ويقولوا
عيب انت مهندس وهو تكنشن
وده مش معناه انهم وحشين بل هم احسن مني بكتير بس احنا مش على نفس الموجه
هما بيتخيلوا ان تصرفي ضعف وانا بشوفه احترام
بحاول بيه اعوض نفسي حاجه من حاجات كتير فقدتها في وسط الزحمه
بحاول أحافظ على المظهر مش هبقى من جوه خراب ومن بره خراب

بتضايق جدا لما يبقى كل كلامهم محمد شاطر بس محترم زياده عن اللزوم
بحس بالكلمه دي صفعه على خدي
بحس انه بيقول بلسانه اني محترم وبيقول بعنيه اني خايب وضعيف
كل واحد منهم بيتخيل ان مديري بيستغلني وان زميلي التاني بيستغلني ومحدش فيهم بيفكر في نفسه هو بيعمل ايه

كنت عند مديري وكان في نفس الوقت موجود احد الزمله والمدير بيقوله اعمل كذا وكذا واستنى هدورلك على ورقه تاخدها عشان تشتغل منها قاله محمد يجبهالي وانا واقف
انا شفته تصرف في قمة الوقاحه
في في الدور اللي مكاتبنا فيه ناس مسئولة عن الشغل ده اسمهم عمال بريد وفي عمال بوفيه بالاضافه للشخص نفسه اللي هيشتغل في الشغل ده بس ليه ميخلنيش انا اللي اوديهالوه مهما متعودين اني لو معدي من جنب البرنتر ولاقيت ورق بتاع حد فيهم هاخده واوديه فليه ميطلبش اني اوديله الورق
انا عارف انه بلعن نفسي وانا بكتب الكلام ده بس مش همسحه
عارف ان لو حد قالي لو سمحت اعمل كده بحس انه حاطط حاجز بني وبينه واني اكيد انا السبب في انه يحط الحاجز ده
بس كمان احيانا بحب احس ان اللي معايه بيحترموني
ودلوقت كل اللي على لسانهم انت لازم تتغير
لأ مش هتغير
انا مش بعمل حد بشكل لطيف عشان هو لطيف ولا عشان حتى يستاهل يتعامل بشكل لطيف ولكن عشان هي دي اللي مفروض تكون عليها اخلاقنا
مش بحاول اكتم غيظي ونرفزتي عشان انا خايف انفجر فيهم ولكن عشان حديث الرسول علية الصلاة والسلام اتدرون من القوي فيكم؟
مش بحاول اعمل شغل الهسس والروتين عشان عايز اشتغل عمري كله في ده ولكن عشان حديث الرسول علية الصلاة والسلام
مش بستحمل كلامك السخيف عشان مقدرش ارد عليه ولكن عشان انا محبش أكون سخيف
أنا حقيقي بقيت محتار
الموضوع مش موضوع مشاكل في الشغل
الموضوع موضوع أشخاص
أنا بجد بقيت محتار
كنت الأول واخد جنب منهم كلهم وده كان بيخلي كلام الكل معايه بحساب اه كنت بسمع نفس الكلام بس على الاقل مكنش حد منهم بيطوع انه يجي ينصحني اني مكنش انا
بيتهيألي لما كنت واخد جنب منهم كان أفضل
لأني لما بقى في مجال للكلام بينا أديهم الحق انهم يدخلوا في حاجات انا بعتبرها خاصه
أان لما بشتغل في الروتين مش بطلب من حد منهم يساعدني مش بطلب من حد منهم يشيل بدالي شغل فبلاش يحسسوني انهم بيشفقوا عليا لان لما الاسبوع اللي فات المدير كان واضح اشتغلوا كلكم في موضوع زياره الوزير كله حاول يخلع ويقول محمد موجود يشيل هو الشغل
أنا كمان يسعدني اني مشتغلش في ده واشتغل بداله في الامور اللي هتخلي دماغي اكبر وافضل يمكن في يوم من الايام احقق الحلم الوحيد اللي حلمت بجد بيه واني اعمل اول كتاب يكون مرجع جيد لتخصصي
كل واحد فيهم بيشتغل وقته باللي عايز يشغل وقته بيه
اللي منهم بيلعب فيفا مبقلوش تعالى اشتغل بدالي في الشغل اللي هو اصلا من شغلي بدل اللعب
فبلاش يحسسوني انهم بيمنوا عليا
عمال اشتكي من الصبح لما بجد بقيت حاسس اني من ذوي الأربع
نسيت انهم محدش منهم بيقولي كلامه مش لطيفه
نسيت انهم بيسبوني العب في الكوريدور براحتي واجري واتنطط فيه
نسيت انهم دايما بيقولوا عني كلام كويس في حين انا من الصبح عمال اذم فيهم في مدونتي بحجه انها مكاني الخاص
حتى مديري لسه مكلمني دلوقت بيقولي خلاص روح متتأخرش اكتر من كده ومعلش تعبناك
انا خلاص نسيت التعب

على الهامش البوست ده من يوم السبت بس لسوء الأحوال النتيه تعذر نشره وبالصدفه في مدونة راما النهارده الصبح لاقيت بوست بيتكلم عن الشغل انا خايف اطول في الهامش عن كده النت يفصل الحق انشر وبعدين اشوف

عيد العمال

النهارده عيد العمال
وانا من العمال
يبقى الليله دي عيد تيريرارام علينا سعيد
وحشني بلوجي
النت بقاله أكتر من أسبوع لا يطاق
وحتى لما ربنا فتح عليا واشتركت أخيرا في البيت التليفون عطلان يعني الدنيا معانده معايه خالص
وانا بصراحه مش بقى مودي مود سيبر خالص

قريت كتاب عمر طاهر التاني ليا
شكلها باظت كتاب ظريف في بدايه لدرجة أنه شدني أني أسجله بصوتي
بحب أقرا المقالات اللي بتعجبني للناس
وفي نص الكتاب كانت شايف انه مش ينفع غير للاولاد وبس أو تحدديا للي الخجل عندهم أقل
شكل معياري هتختل
انا لو كان حد قالي الجمله اللي أنا قلتها دي كنت على أتم أستعداد اني اسمعه محاضره يمكن تستمر لساعات أن مفيش فرق بين الولد والبنت في موضوع الخجل مفيش حاجه أسمها بنت بتتكسف أكتر من ولد مفيش حكم مطلق بس دلوقت مش بقى عندي أستعداد لده
الكتاب حلو وشدني وفي مره كنت في الميكروباص-انا بقضي نص وقتي في المواصلات – وكان جنبي واحد كالعاده حاطط عيناه جوه الورق وسألني هو أيه الكتاب قلتله شكلها باظت لعمر طاهر قالي ممكن أجيبه من أين قلتله من أي مكان هو بس بيتهيألي كان مستغرب من شكل الطباعه فقلتله أنه كان عندي على الكمبيو وانا طبعته

بعد أنتهائي من العزيز عمر طاهر كان موعدي مع الانسه كاف لمصطفى أمين
أنا حبيت مصطفى من أول كتاب كان أعتقد سنه أولى حب
وحبي زاد مع لا
وبعدها قريت الانسه هيام ودي كان ليها قصه
أصل أنا أخدتها من حاتم وهي أصلا كانت بتاعت بابا حاتم فالكتاب تحس أنه أثري بشكل تجليده ونوع ورقه وكمان ملاحظات بابا حاتم على الجوانب
أنا فاكر كويس أنه كان كاتب على الصفحه الأولى أنه بدأ قراءة هذه الروايه في يوم كذا الساعه كذا في فندق كذا دولة كذا
عشان أيامها كان بره مصر
وبيتهيألي في اليوم ده حبيت بابا حاتم أكتر
والروايه دي حبيتها لدرجة أني طلبتها تاني من حاتم بعد فتره وقريتها تاني واستمتعت بيه تاني
واستغربت وانا بدعبس على النت وقريت حد بيقول ان المقصود بالانسه هيام بطلة الروايه هي أم كلثوم
على العموم
قريت بعد كده صاحب الجلاله الحب
وفعلا كانت تحفه
حبيت الكتاب خلاص
وأخيرا وأثناء الدعبسه عن كتاب لاقيت الأنسه كاف وبحمد ربنا أني مش شفت المسلسل اللي بيقولوا عليه
الكتاب شدني من الوهلة الأولى
في قصه حب وفي قصور وبشوات وفي أميرات جميلات وكمان في قسمت
قسمت هي أكتر حد شدني من أول كلمه بغض النظر انها طبيعي تشد لأنها البطله بس شدني كل شيء في قسمت
البنت اللي تخليت عن كل ما يبرز جمالها وقررت أنها تبرز قبحها "الشكلي" عشان يجي واحد بس يقدر يشوفها من جوه مش من بره
يمكن لأن هي دي مشكلتي
بس مش ده موضوعنا
بحب جدا أقرى في المواصلات عشان حاجات كتير أهمها أنها بتسيني رجرجه العربيه وكأني راكب جمل وكمان بتسيني الشخص الراكب جنبي وكأنه جوه حضني مش جنبي
وكمان بتسيني الجو اللزج اللي مش فيه ولا نسمه هوا تيجي توشوشني وتضحكني
بس ساعات والواحد في قمة أندماجه يلاقي متطفل
زي اللي حصلي من كم يوم
والي هتكلم فيه بعدين لأني خايف النت يعملها ويفصل

على الهامش
وصل زميل ليا في اشلغل وأول ما وصل سألني هو صحيح العلاوه السنه دي تلاتين في الميه

احنا صحيح عمال